யார் மனதில் அணுவளவு பெருமை இருந்ததோ அவர் சுவனம் புகமாட்டார்”

நான் (அபூதர்ரு) நபி ஸல்லல்லாஹு அலைஹி வஸல்லம் அவர்களிடம் வந்தேன். அவர்கள் உறங்கிக்கொண்டு இருந்தனர். அவர்கள் வெள்ளை நிற உடையை அணிந்திருந்தனர். பிறகு (இரண்டாம் முறை) வந்தேன். அப்போதும் அவர்கள் உறங்கிக் கொண்டு இருந்தனர். மற்றொரு (மூன்றாம்)முறையும் வந்தேன். நபி ஸல்லல்லாஹு அலைஹி வஸல்லம் அவர்கள் தூக்கத்திலிருந்து விழித்து விட்டனர். அவர்களுக்கு அருகில் அமர்ந்தேன். (அப்போது) “எந்த அடியானும் லாஇலாஹ இல்லல்லாஹு எனக் கூறி அதன்பிறகு அதிலேயே இறந்துவிட்டாரேயானால் அவர் சுவனம் புகாமல் இருப்பதில்லை” எனக் கூறினார்கள்.

“அவர் விபச்சாரம் செய்தாலும் திருடினாலுமா?” எனக் கேட்டேன். அவர் விபச்சாரம் செய்தாலும் திருடினாலும் தான் என்றனர். இரண்டாம் முறையும் மூன்றாம் முறையும் கேட்டேன். அதே பதிலையே கூறினாhர்கள். நான்காவது முறையாக நான் கேட்கும்போது அபூதர்ரின் மூக்கு மண்ணைத்தொட (அவருக்கு அது இஷ்டமில்லையெனினும்) என்றார்கள். இதைக் கேட்ட நான் அபூதர்ரின் மூக்கு மண்ணைத்தொட்டாலும் (அவருக்கே அது இஷ்டமில்லையெனினும்) என்று கூறிக்கொண்டே நான் (அபூதர்ரு) அங்கிருந்து வெளியேறிவிட்டேன்.

இச்சம்பவத்தை அபூதர்ரு ரளியல்லாஹ் அன்ஹு அவர்களே தனக்கு அறிவித்ததாக அபுல் அஸ்வது அத்தீலி ரளியல்லாஹ் அன்ஹு அறிவிக்கிறார்கள்.

“யார் மனதில் அணுவளவு பெருமை இருந்ததோ அவர் சுவனம் புகமாட்டார்” என்பது பற்றிய பாடம்

“யார் மனதில் அணுவளவு பெருமை இருந்ததோ அவர் சுவனம் புகமாட்டார்” என நபி ஸல்லல்லாஹுஅலைஹி வஸல்லம் அவர்கள் கூறினார்கள்.

“நிச்சயமாக ஒரு மனிதன் தனது உடை அழகாக இருக்க வேண்டும் எனவும் தனது காலணி அழகாக இருக்க வேண்டுமெனவும் விரும்புகிறார்” (அது பற்றி என்ன?) என ஒரு மனிதர் கேட்டார்.

(அதற்கு நபி ஸல்லல்லாஹு அலைஹி வஸல்லம் அவர்கள் நிச்சயமாக அல்லாஹ் அழகானவன். (அவன்) அழகானதையே விரும்புகிறான். பெருமை என்பது அகம்பாவம் கொண்டவன் உண்மையை மறுப்பதும், மனிதர்களைக் கேவலமாக (இழிவாக)க் கருதுவதுமாகும் என்றனர்.

அறிவிப்பவர் : அப்துல்லாஹ் பின் மஸ்ஊது ரளியல்லாஹ் அன்ஹு