உதவி இயக்குனருக்கு வாய்ப்பளித்த சசிக்குமார்

பொதுவாக உதவி இயக்குநர்கள் பலருக்கு தங்களுக்கு ஒரு வாய்ப்பு தர யாரும் உதவ மாட்டார்களா? என்ற ஏக்கம் இருந்து கொண்டே இருக்கும்.
அந்தவகையில் தனது உதவி இயக்குநர் ஒருவரை இயக்குநராக அறிமுகப்படுத்த விரும்பினார் தயாரிப்பாளர், டைரக்டர், நடிகர் என்று பலமுகம் கொண்ட சசிகுமார்.

"சுப்ரமணியபுரம்" படத்தின் மூலம் பிரபலமான சசிகுமார், தற்போது தனது நண்பர் சமுத்திரகனி இயக்கும் "போராளி" என்ற படத்தில் வித்யாசமான கதாபாத்திரத்தில் நடித்து வருகிறார்.

இந்நிலையில் தன் உதவியாளர் பிரபு என்பவரை தன்னுடைய தயாரிப்பு நிறுவனத்தின் மூலம் இயக்குநராக அறிமுகப்படுத்த இருக்கிறார்.

இதுகுறித்து அவர் கூறியதாவது :

என்னிடம் உதவியாளராக இருப்பவர் பிரபு, மிகவும் திறமையானவர். அவர் ஒரு அருமையான கதை ஒன்றை ரெடி பண்ணி இருக்கிறார்.

இந்த கதையை கேட்டதும் எனக்கு பிடித்து போய்விட்டது. ஆகவே அவரை இயக்குநராக, என்னுடைய தயாரிப்பு நிறுவனத்தின் மூலம் அறிமுகம் செய்ய எண்ணியுள்ளேன்.

விரைவில் இதுகுறித்து அறிவிப்பு வெளியாகும். தற்போது எனது நண்பர் சமுத்திரகனி இயக்கும் "போராளி" படத்தில் நடித்து வருகிறேன்.

சமுதாயத்தை எதிர்த்து போராடும் ஒரு போராளியின் கதை இது. இந்தபடத்தில் நான் ஹீரோவாக நடித்தாலும், சமுத்திரகனியின் கதை தான் முதல் ஹீரோ. போராளியில் நடிப்பது சந்தோஷமாக இருக்கிறது என்று அவர் கூறினார்.