மாற்றப்பட்ட டிஆர்எஸ் முறைக்கு இந்திய வீரர்கள் வரவேற்பு

மாற்றப்பட்ட புதிய மறுபரிசீலனை முறைக்கு (டி.ஆர்.எஸ்.) இந்திய வீரர்கள் வரவேற்பு தெரிவித்துள்ளனர்.
டி.ஆர்.எஸ். முறையில் பந்து செல்லும் பாதையை, கணக்கிடும் முறையில் நம்பகத்தன்மை இல்லை என, துவக்கத்தில் இருந்தே இந்திய கிரிக்கட் வாரியம் (பி.சி.சி.ஐ.) எதிர்ப்பு தெரிவித்து வந்தது. இதையடுத்து பி.சி.சி.ஐ. கூறியபடி, சில மாற்றங்களை செய்ய சர்வதேச கிரிக்கட் கவுன்சில் (ஐ.சி.சி.) சம்மதித்தது. இதன் மூலம் பந்து செல்லும் பாதையை கணக்கிட புதியதாக சேர்க்கப்படும். இதனால் சந்தேகத்துக்கு இடமான "கேட்ச்”, பந்து மட்டையில் பட்டதா இல்லையா என்பதை தெளிவாக கண்டறியலாம்.

மாற்றப்பட்ட புதிய முறை, எதிர்வரும் இங்கிலாந்து தொடரில், பயன்படுத்தப்பட உள்ளது. இதனிடையே இந்த புதிய முறைக்கு, இந்திய வீரர்கள் மகிழ்ச்சி தெரிவித்துள்ளனர். இதுகுறித்து இந்திய அணியின் மூத்த வீரர் ஒருவர் கூறியது, எல்.பி.டபிள்யு. அவுட் முறையை கணக்கிடும் "பால் டிராக்கர்” முறையை நீக்க, ஐ.சி.சி. சம்மதித்து இருப்பது வரவேற்கத்தக்கது. இதைத் தான் இத்தனை நாள், நாங்கள் ஏற்றுக்கொள்ள மறுத்து வந்தோம். ஏனெனில் ஆரம்பத்தில் இருந்தே, இதில் குறைபாடு உள்ளது.

இதன் மூலம் பந்து செல்லும் பாதையை, துல்லியமாக கணக்கிட முடியாது. நடுவருக்கு அருகில் கமெரா, சரியான நேர்கோட்டில் பொருத்தப்படுவதில்லை. தவிர, பந்து ஆடுகளத்தில் பட்டவுடன், அது எந்தளவுக்கு உயர்ந்து செல்லும் என்பதை, சரியாக கணக்கிட முடியாது.

ஏனெனில் இயற்கையான காற்று, பந்துவீச்சாளர்களின் மாறுபட்ட வேகம், சரியற்ற முறையில் பந்து எகிறுதல் போன்ற காரணங்கள், அந்த பந்து ஸ்டம்சிற்கு அருகில் செல்லும் போது, எந்தளவுக்கு உயரமாக செல்லும் என்பதை திட்டமிட்டு தெரிவிக்க முடியாது. இத்தனை சிக்கல் உள்ள நிலையில், பந்து ஸ்டம்சை தகர்க்கிறதா, இல்லையா என்பதை சரியாக தெரிவிக்கும், என்பதற்கு என்ன உத்தரவாதம் உள்ளது.

சமீபத்தில் முடிந்த உலகக் கோப்பை அரையிறுதி போட்டியில், பாகிஸ்தான் வீரர் சயீத் அஜ்மல் வீசிய பந்தில், சச்சினுக்கு எல்.பி.டபிள்யு. அவுட் கொடுக்கப்பட்டது. இதை எதிர்த்து சச்சின் அப்பீல் செய்ய, பந்து ஸ்டம்ப்சில் இருந்து விலகிச் சென்றது தெளிவாகத் தெரிந்தது. பின் சச்சின் தொடர்ந்து துடுப்பாட்டம் செய்தார். இந்த அப்பீல் மூலம், எங்களுக்கு நன்மை தான் என்றாலும், சச்சின் விடயத்தில் "பால் டிராக்கர்” முறையில் தொழில்நுட்பத்தின் தவறு நன்றாக தெரிந்தது. பந்து சரியான இடத்தில் பிட்ச் ஆன பின்னும், விலகி சென்றது போல காட்டியது. மொத்தத்தில் தொழில்நுட்பம் சரியானது தான். ஆனால் இதை இயக்குவது மனிதன் தான். இது மனிதன் மூலம் மாற்றப்படுகிறது. இதுபோன்ற நிலையில், களத்தில் இருக்கும் நடுவர்கள் வழங்கும் தீர்ப்பை ஏற்றுக்கொள்வதே சிறந்தது என்று அந்த வீரர் தெரிவித்தார்.