கதிர்காம கந்தன் உற்சவம் இன்று ஆரம்பம்

கதிர்காம கந்தன் உற்சவம் இன்று ஆரம்பம்
கே. அசோக்குமார் - மாத்தறை தினகரன் நிருபர்
வரலாற்றுப் பிரசித்திபெற்ற கதிர்காமம் வருடாந்த உற்சவம் இன்று முதலாம் திகதி ஆரம்பமாகிறது. எதிர்வரும் 16 ஆம் திகதியுடன் உற்சவம் நிறைவுபெறுகிறது.

ஜுலை மாதம் 12 ஆம் திகதி தீமிதிப்பு உற்சவமும், 16 ஆம் திகதி தீர்த்தோற்சவமும் நடைபெறும்.

நாடு முழுவதிலுமிருந்து இலட்சக் கணக்கான அடியார்கள் இம்முறை இவ்வுற்சவத்தில் கலந்து கொள்வதால் விசேட போக்குவரத்து, பாதுகாப்பு ஏற்பாடுகள் செய்யப்பட்டுள்ளன.

மது மற்றும் போதைப் பொருட்கள் அற்ற பாதுகாப்பு பகுதியாக கதிர்காம புனித தலம் பிரகடனப்படுத்தப்பட்டுள்ளதாகவும் கதிர்காமம் வரும் அடியார்கள் பொலிஸாருக்கு ஒத்துழைப்பு வழங்குமாறும் கதிர்காம பொலிஸ் நிலைய பொறுப்பதிகாரி லக்சிறி சந்திமால் கேட்டுக்கொண்டுள்ளார்.

கதிர்காம உற்சவத்தை முன்னிட்டு சுமார் 1500 பொலிஸாரும் கடமையிலீடுபடுத்தப்பட்டுள்ளனர். இவர்களுடன் தேவைக்கேற்ப படையினரின் உதவிகளும் பெறப்படவுள்ளதாக தென் மாகாண பிரதி பொலிஸ் மா அதிபர் கிங்ஸ்லி விக்கிரமரட்ண தெரிவித்தார்.

வருடம் தோறும் கதிர்காம உற்சவத்துக்காக கொடியேற்றம் நடைபெற்ற தினம் முதல் பாத யாத்திரையாக தலம் நோக்கி செல்லும் அடியார்களும் இம்முறையும் கிழக்கிலிருந்து புறப்பட்டு சென்றுள்ளனர்.

வடபகுதி மற்றும் கிழக்கு பகுதிகளிலிருந்தும் கொழும்பிலிருந்தும் விசேட பஸ் சேவைகள் நடத்தப்படவுள்ளன.

கதிர்காமம் நகருக்குள் வரும் தனியார் பஸ் வண்டிகள், மற்றும் தனியாருக்கு சொந்தமான வாகனங்களுக்காக விசேட தரிப்பிடங்கள் ஏற்பாடு செய்யப் பட்டுள்ளன.