நஞ்சற்ற உணவு, மாசற்ற சூழல்

நஞ்சற்ற உணவு, மாசற்ற சூழல்
அறுகம்பையில் கண்காட்சி
(அட்டாளைச்சேனை குறூப் நிருபர்)
“நஞ்சற்ற உணவு மாசற்ற சூழல்” எனும் தொனிப்பொருளை மையமாக வைத்து அறுகம்பே உல்லாசப் பயணிகள் சங்கத்தினர் ஸ்ரீலங்கா இயற்கை சார் உல்லாச அமைப்பினர் சமூகத்தின் முன்னோடிகள், விவசாய சங்கத்தினர் ஆகியோர் ஒருங்கிணைந்து ஐ.சீ.ஈ.ஐ. ஓவர்சீஸ் அன் சீரிஎஸ் (OVER SEAS AND CTS) என்ற சர்வதேச அரச சார்பற்ற நிறுவனத்தின் அனுசரணையுடன் ஒழுங்கு செய்த சேதனப் பசளை மூலம் உற்பத்தி செய்யப்பட்ட உணவுப் பொருட்கள் கண்காட்சி பெரு விழா அண்மையில் அறுகம்பே “கலாக்ஸி” உல்லாச விடுதியில் மிகச் சிறப்பாக நடைபெற்றது.

நிறுவனத்தின் நிகழ்ச்சித்திட்ட இணைப்பாளர் ஐ.எல்.எம். நஜீம் தலைமையில் நடைபெற்ற இந்நிகழ்விற்கு பொத்துவில் பிரதேச சபை தலைவர் எம்.எஸ். வாசித், ஓவர்சீஸ் அமைப்பின் திட்ட முகாமையாளர் சப்ரினா எஸ். பிலற்றா அறுகம்பே உல்லாசப் பயணிகள் சங்கத்தின் தலைவர் எம்.எச். றகீம் ஆகியோர் பிரதம விருந்தினர்களாக கலந்து கொண்டனர்.

“சேதன விவசாயத்தினூடாக எதிர்கால சந்ததியினருக்கு நஞ்சற்ற உணவையும் மாறச்ச சூழலையும் வழங்குவதற்காக கைகோர்ந்த்து நிற்போம்” என்ற பிரகடனத்திற்கு அதிதிகள், மற்றும் சமுகமளித்தோர் அனைவரும் கையொப்பமிட்டு உறுதி மொழி வழங்கியதையடுத்து ‘சேதன விவசாயம்’ தொடர்பான விளக்கவுரையை நஜீம் நிகழ்த்தினார்.

கலை நிகழ்ச்சிகள், சேதனப் பசளையைப் பாவித்து உருவாக்கப்படட வீட்டுத் தோட்ட உற்பத்திகளின் கண்காட்சி கலந்துரையாடல் என்பனவும் இடம்பெற்றன.

சேதனப் பசளையைப் பாவித்து உற்பத்தி செய்யப்பட்ட மரக்கறிகளால் சமைக்கப்பட்ட ‘பகல் உணவு’ விருந்தினர்களுக்குப் பரிமாறப்பட்டது. இப்பகல் உணவில் பெருந்தொகையான வெளிநாட்டு உல்லாசப் பிரயாணிகள் கலந்து கொண்டமை இங்கு விசேட அம்சமாகும்.