தென்கொரியா பொலிசிடம் சிக்கிய லாலி படக்குழு

பிரபல கவர்ச்சி நடிகை பபிதாவின் மகள், நடிகை லக்ஷா. இவரும் பல படங்களில் ஒரு பாடலுக்கு கவர்ச்சி நடனம் ஆடி வருகிறார்.
புதுமுகங்கள் நடிக்கும் ”லாலி” என்ற படத்தில் நடிக்க லஷ்கா ஒப்பந்தமானார். இப்படத்தின் படப்பிடிப்பையும், லக்ஷா சம்பந்தப்பட்ட பாடல் காட்சியையும் தென்கொரியாவில் படமாக்க படக்குழுவினர் திட்டமிட்டனர்.

இதற்காக லஷ்கா மற்றும் படக்குழுவினர் என மொத்தம் 13 பேர் தென்கொரியாவுக்கு புறப்பட்டுச் சென்றனர். மேலும் இவர்களுடன் துணை நடிகர்கள் என்ற பெயரில் 30 பேர் டெல்லியில் இருந்து தென்கொரியாவுக்கு அழைத்துச் செல்லப்பட்டிருந்தனர். தென்கொரியாவில் லக்ஷா சம்மந்தப்பட்ட காட்சிகள் நான்கு நாட்கள் படமாக்கப்பட்டது.

இதற்கிடையில் டெல்லியில் இருந்து இவர்களுடன் போனவர்கள் திடீரென மாயமானார்கள். இதனால் லக்ஷா உள்ளிட்ட சென்னையில் இருந்து சென்ற அனைவரும் இந்தியா திரும்ப நேற்று விமான நிலையம் சென்ற போது, அவர்களை அதிகாரிகள் தடுத்து நிறுத்தினார்கள். டெல்லியில் இருந்து வந்த 29 பேர் ஜாயிண்ட் விசாவில் வந்திருப்பதால் அவர்களும் வந்தால் தான் நாடு திரும்ப அனுமதிப்போம் என்று விமான நிலைய அதிகாரிகள் தெரிவித்திருக்கிறார்கள்.

லக்ஷா உள்ளிட்ட படக்குழுவினர் 13 பேரையும் அங்குள்ள ஓட்டல் ஒன்றில் தென்கொரியா பொலிசார் சிறை வைத்துள்ளனர். மாயமான 29 பேரும் வராவிட்டால் விசா மோசடியின் கீழ் லக்ஷா உள்ளிட்ட அனைவர் மீதும் நடவடிக்கை எடுக்கப்பட்டு கைது செய்யப்படுவார்கள் என்று தென்கொரியா பொலிஸ் தரப்பில் தெரிவிக்கப்பட்டு உள்ளது.

டெல்லியில் இருந்து வந்தவர்கள் யார்? எதற்காக படப்பிடிப்புக் குழுவினருடன் துணை நடிகர் என்ற பெயரில் வந்தார்கள் என்று விசாரனை நடந்து வருகிறது. மேலும் அந்த நாட்டில் தங்கி வேலை பார்ப்பதற்காக படக்குழுவினர் பெயரில் ஆள்மாறாட்டம் செய்து வந்திருக்கலாமோ என்றும் பொலிசார் சந்தேகிக்கிறார்கள். அவர்களை கண்டுபிடித்து கொடுக்காமல் நாடு திரும்ப விடமாட்டோம் என்று அதிகாரிகள் கண்டிப்புடன் கூறிவிட்டனர்.

இதை பற்றி அறிந்த லக்ஷாவின் அம்மா கதறி அழுதபடி பத்திரிகையாளர்களிடன் கூறுகையில், ”லாலி” படத்தில் என் மகள் நடிக்க 30 நாட்கள் கால்ஷூட் கொடுத்தோம். அதில் ஆறு நாட்கள் தென்கொரியாவில் படப்பிடிப்பு இருப்பதாக அழைத்துச் சென்றனர். இப்போது அங்கிருந்து வர முடியாமல் என் மகள் தவிக்கிறார். இதில் ஏதோ மோசடி நடந்து இருக்கிறது. நாங்கள் ஏமாற்றப்பட்டு இருக்கிறோம்.

படத்தின் தயாரிப்பாளர்கள் தென்கொரியாவுக்கு செல்லவில்லை. அவர்களை தொலைபேசியில் தொடர்புகொண்டாள் சுவிட் ஆப் செய்துள்ளார்கள் என்றார்.