பாசிப் பயறு சாலட்.

by **ஹம்னா** Mon 4 Jul 2011 - 6:08

சாலட் என்பது உணவுக்கு முன் எடுத்துக் கொள்வது மட்டுமல்ல... காலை நேர உணவாகவே சாப்பிடலாம். அதுவும் குட்டீஸ்கள், சாப்பிட அடம்பிடித்தால் பாசிப்பயறு சாலட்டை பிரெட் சாண்ட்விச் ஆகவோ, சப்பாத்தி ரோல் ஆகவோ செய்யலாம் என்கிறார், மதுரை பார்சூன் பாண்டியன் ஓட்டல் சமையல் நிபுணர் முருகசெல்வம்.

தேவையானவை:

முளைகட்டிய பாசிப்பயறு - 100 கிராம்
பச்சை, சிவப்பு, மஞ்சள் குடமிளகாய் - 100 கிராம்
நல்லெண்ணெய் - 50 மில்லி
வெள்ளரிக்காய் - 100 கிராம்
தக்காளி - 100 கிராம்
எலுமிச்சம்பழம் - ஒன்று
பார்ஸ்லி இலை - ஒரு கொத்து
சிறிய வெங்காயம் - இரண்டு
கறுப்பு மிளகுப்பொடி - ஒரு ஸ்பூன்
உப்பு - தேவையான அளவு

செய்முறை:
பாசிப்பயறை நன்கு கழுவி இரவில் ஊற வைக்க வேண்டும். மறுநாள் சல்லடையின் மீது ஈரத்துணியை பரப்பி, அதன்மீது வைக்க வேண்டும். ஒரு தட்டில் தண்ணீர் ஊற்றி அதன் மீது சல்லடை லேசாக தொடும்படி வைத்து, துணியால் மூட வேண்டும். காலை, மாலை இரண்டு முறையும் தட்டில் உள்ள தண்ணீரை மட்டும் மாற்ற வேண்டும். ஐந்து நாட்களில் பாசிப்பயறு ஒரு செ.மீ., அளவுக்கு நீளமாக முளைவிட்டிருக்கும். இதில் புரோட்டீன் சத்துகள் அதிகம் நிறைந்திருக்கும். குழந்தைகளுக்கு ஏற்ற உணவு இது.
வெங்காயம், தக்காளி, பச்சை மிளகாயை நேர்வாக்கில் நீளமாக நறுக்கவும்.
வெள்ளரியை சாய்வான மெல்லிய வட்டமாக வெட்ட வேண்டும்.
பார்ஸ்லி இலையை சிறிது சிறிதாக வெட்டி வைக்கவும்.
அனைத்தையும் எண்ணெய் ஊற்றி ஒன்றாக கலந்து வைத்தால், சாலட் தயார்.
எண்ணெய் கலக்கும் போது மினுமினுப்பாக இருக்கும்.
இரண்டு பிரட் துண்டுகளை தோசைக்கல்லில் திருப்பி போட்டு, நடுவில் பாசிப்பயறை வைத்து கொடுக்கலாம்.
கூடுதல் சுவைக்கு பேரீச்சம்பழங்களை சிறு துண்டுகளாக்கி சேர்க்கலாம்.
சப்பாத்தியின் நடுவில் சாலட் வைத்து சுற்றி, தக்காளி சாஸ் சாப்பிட சுவையாக இருக்கும்.
"டயட்' விரும்பும் பெரியவர்களுக்கும் சரியான காலை நேர உணவாகும்.

சமையல் நேரம்: ஊறவைப்பது தவிர, 10 நிமிடங்கள்.