தூத்துக்குடியில் பள்ளி மாணவன் நரபலியா?

by **நேசமுடன் ஹாசிம்** Mon 4 Jul 2011 - 7:09

தூத்துக்குடியில் பள்ளி மாணவன் நரபலி கொடுக்கப்பட்டதாக கோவிலுக்கு தீ வைத்து பூசாரி குடும்பத்தினரை தாக்கியதால் காவல்துறையினர் தடியடி நடத்தி கூட்டத்தை விரட்டியதால் பதட்டம், பரபரப்ப ஏற்பட்டது.

தூத்துக்குடி தாளமுத்துநகர் ஜோதிபாசு நகரில் வசிப்பவர் வேல்ராஜ். இவரது மகன் குணசேகர் ராஜ் (வயது 8). அங்குள்ள பள்ளியில் 4ஆம் வகுப்பு படித்து வருகிறான். கடந்த சனிக்கிழமை மாலை டியுசன் படிக்க வீட்டை விட்டு வெளியே சென்ற மாணவன் இரவு வீடு திரும்பவில்லை. இதனால் அவரது தந்தை வேல்ராஜ், டியூசன் படிக்க சென்ற வீட்டிற்கு சென்று தேடினார். அங்கு அவன் வரவில்லை என்றதும் வேல்ராஜ் ஜோதிபாசு நகர் முழுவதும் மகனைத் தேடியதில் அதே பகுதியிலுள்ள ஒரு கருமாரியம்மன் கோவில் அருகேயுள்ள கிணற்றுக்குள் கால்கள் வெளியே தெரிந்த நிலையில் பிணமாக கிடந்தான். இந்த தகவல் வேகமாக பரவவே அந்த பகுதியிலுள்ள மக்கள் அனைவரும் கிணறு நோக்கி படையெடுத்தனர்.

தகவல் அறிந்ததும் தாளமுத்துநகர் காவலர்கள் விரைந்து சென்று கிணற்றுக்குள் பிணமாக கிடந்த குணசேகர்ராஜ் பிணத்தை வெளியே எடுத்தனர். அப்போது மாணவன் தலையில் பலத்த காயமும், கையில் வெட்டு காயமும் இருந்ததாக கூறப்படுகிறது. இதனால் ஆத்திரமடைந்த அப்பகுதி மக்கள் கருமாரியம்மன் கோவிலைப் பாரமரித்துவரும் ஆறுமுகம் மற்றும் அவரது குடும்பத்தினர்தான் என எண்ணி கோவிலுக்கு தீ வைத்து கொளுத்தினார்கள். பின்னர் அவர்கள் பூசாரி ஆறுமுகம் மற்றும் அவரது மனைவி நாச்சியார், மகன்கள் ராமர் பாண்டியன், லட்சுமண பாண்டியன் ஆகியோர்தான் பில்லி சூனியம் வைத்து மாணவன் குணசேகர ராஜை அம்மனுக்கு நரபலி கொடுத்து பின்னர் பிணத்தை தலைகீழாக கிணற்றுக்குள் போட்டு உள்ளனர் என்றும் பொதுமக்கள் 4 பேரையும் பயங்கர ஆயுதங்களால் தாக்கினார்களாம். 4 பேரையும் கைது செய்ய வலியுறுத்தி போராட்டத்தில் குதித்தனர்.

இதற்கிடையே கோவிலுக்கு வைக்கப்பட்ட தீ வேகமாக எரிவதைக்கண்டு தீயணைப்பு நிலையத்திற்கு தகவல் கொடுத்தனர். தீயணைப்பு வீரர்கள் சம்பவ இடத்திற்கு சென்று தீயை அணைக்க முயன்ற போது பொதுமக்கள் அணைக்க விடாமல் மறித்தார்களாம். இதைத் தொடர்ந்து காவல் துணை கண்காணிப்பாளர் சோனல் சந்த்ரா தலைமையில் போலீசார் தடியடி நடத்தி கூட்டத்தை கலைத்தனர். இதனால் அப்பகுதி முழுவதும் பதட்டம் பரபரப்பு ஏற்பட்டது. இதைத் தொடர்ந்து ஏராளமான காவலர்கள் அப்பகுதியில் குவிக்கப்பட்டனர்.

சம்பவம் குறித்து தாளமுத்துநகர் போலீசார் மாணவன் சாவு சம்பந்தமாக தற்கொலை, மர்மசாவு என்று வழக்கு பதிவு செய்து மாணவன் பிணத்தை பிரேத பரிசோதணைக்கு அரசு மருத்துவமணைக்கு அனுப்பி வைத்தனர். மேலும் தாக்கப்பட்ட பூசாரி ஆறுமுகம் மற்றும் அவரது குடும்பத்தினரை அரசு மருத்துவமணைக்கு சிகிச்சைக்கு அனுப்பி வைத்தனர். அவர்களிடம் விசாரணை செய்து வருகிறார்கள். மாணவனின் பிரேத பரிசோதனை வந்த பின் தான் மாணவனின் மர்மசாவு குறித்து உண்மை வெளிவரும். தொடர்ந்து அப்பகுதியில் பதட்டம் பரபரப்பு ஏற்பட்டுள்ளது.