அனுஷ்காவை வட்டமிட்ட கண்கள்

விக்ரமுடன் அனுஷ்கா முதல் முறையாக நடித்திருக்கும் 'தெய்வத்திருமகள்' படம் வரும் ஜூலை 15-ஆம் திகதி வெளியாகிறது.
இந்தப்படத்துக்குப் பிறகு அனுஷ்காக தமிழ் படங்கள் எதுவும் ஒப்புக்கொள்ளவில்லை.

இதற்குக் காரணம் இவருக்கும் நாகார்ஜுன் மகன் நாக சைதன்யாவிற்கும் நிச்சயதார்த்தம் ஆகிவிட்டதாக வெளியான செய்தி உண்மையாக இருக்கலாம் என்று தயாரிப்பாளர்களும், இயக்குநர்களும் நினைப்பதுதான்.

ஆனால் அனுஷ்கா நேரடியாகவே இந்த விவகாரத்தில் பதில் கூறிவிட்டார். ”நாக சைதன்யா என்னை விட வயது மிகவும் குறைந்தவர், அவருடன் எனக்கு எப்படி கல்யாணம் நடக்கும்?" என்று கேள்வி எழுப்பியுள்ளார்.

இந்நிலையில் சமீபத்தில் நடந்த தென்னிந்திய ஃபிலிம் பேர் விருது விழாவுக்கு நாக சைதன்யா தனது தந்தை நாகார்ஜுனாவுடன் வந்திருந்தார். விழாவில் எல்லோர் கண்களும் நாக சைதன்யாவையே பார்த்தன.

ஆனால் அவரோ சக நடிகர்களுடன் சந்தோஷமாக அரட்டை அடித்தபடி இருந்தார். அதன் பிறகு அனுஷ்கா விழா அரங்கிற்குள் நுழைந்தார்.

சக நடிகர், நடிகைகளிடம் சகஜமாகப் பேசினார். நாக சைதன்யா அருகில் உட்கார ஒரு இடம் காலியாக இருந்தது. அது அனுஷ்காவுக்குத்தான் ஒதுக்கப்பட்டிருக்கிறதோ என்று எல்லோரும் நினைத்தனர்.

ஆனால் அந்த இருக்கையை தவிர்த்து வேறு எங்காவது இடம் இருக்கிறதா என்று தேடினார் அனுஷ்கா. பின்னர் 'வானம்' பட இயக்குநர் கிரிஷ் அருகில் இருந்த இடத்தில் அமர்ந்து கொண்டார்.

கிரிஷ் விருது பெற்றபோது அனுஷ்காவிற்கு நன்றி தெரிவித்தார். விழாவில் அனுஷ்காவும், நாக சைதன்யாவும் பேசிக்கொள்ளவே இல்லை.

அனுஷ்கா சிறந்த நடிகைக்கான விருது வாங்கும்போது நாக சைதன்யா விருது வழங்கும் விழாவில் இருந்து வெளியேறிவிட்டார்.

தற்போது இந்த நிச்சயதார்த்த செய்தியை கிளப்பி விட்டதே நாக சைதன்யா தரப்பில் இருந்துதான் என்ற தகவல் கசிந்து வருகிறது.