சிறுநீரக செயலிழப்பு நோயாளிகள் தங்கள் இரத்தத்தில் பாஸ்பேட் சத்தைக் கட்டுப்படுத்தவது எப்படி.

சிறுநீரக செயலிழப்பு உள்ளவர்கள் இரத்தத்தில் பாஸ்பேட் இரசாயனத்தை எவ்வாறு கட்டுப்படுத்தவது?

பாஸ்பேட் என்பது நமது இரத்தத்தில் உள்ள ஒரு இரசாயனம். இது கால்சியம் என்ற சுண்ணாம்புச் சத்தினோடு சேர்ந்து எலும்புகளில் படிந்து அவற்றை உறுதியாக வைக்க உதவுகின்றது. தவிர தசைகள், மூளை, நரம்புகள், இவைகளின் சீரான இயக்கத்திற்கும் பாஸ்பேட் சரியான அளவு இரத்தத்தில் இருப்பது அவசியம். சிறுநீரக செயலிழப்பில் சிறுநீரகங்கள் இரத்தத்தில் அதிகமான பாஸ்பேட் இரசாயனத்தை வெளியேற்றும் சக்தியை இழந்து விடுகின்றன.இதனால் இரத்தத்தில் பாஸ்பேட் சத்தின் அளவு மிகவும் அதிகமாவது மட்டுமல்லாமல் கால்சியம் சத்தின் அளவும் குறைகின்றது.

இதற்கு காரணம் பாஸ்பேட் அளவும் கால்சியம் அளவும் சேர்ந்து நிலையாக இருக்க வேண்டியது அவசியம். இதற்கு பாராதைராயிட் என்ற சுரப்பியிலிருந்து உற்பத்தியாகும் பாராதார்மோன் என்ற ஹார்மோனும், சிறுநீரகங்களிலிருந்தே உற்பத்தியாகும் கால்சிட்ரியால் என்ற ஹார்மோனும், செயலாற்றுகின்றன.
இவைகளின் சுரப்பும் சிறுநீரக செயலிழப்பில் பாதிக்கப்படுகின்றது. இக்காரணங்களால் சிறுநீரக செயலிழப்பு உள்ளவர்களின் இரத்தத்தில் கால்சியம் குறைகின்றது. பாஸ்பேட் அதிகமாகின்றது. இதனால் எலும்புகள் வலுவிழத்தல், எலும்பு முறிவு, தசைகள் வலுவிழத்தல் ஆகியன நேரிடும். மேலும் அதிகமான பாஸ்பேட் சத்து இரத்தக் குழாய்கள் மூட்டுகள் கண்கள் ஆகியவற்றில் படிந்து பாதிப்பை உண்டாக்கலாம். பாஸ்பேட் சத்து பல உணவுகளில் காணப்படுகின்றது சிறுநீரக செயலிழப்பு நோயாளிகளும், டயாலிசிஸ் செய்து கொண்டிருப்பவர்களும் தங்கள் இரத்தத்தில் பாஸ்பேட் சத்தை சரியான அளவு கட்டுப்படுத்தி வைத்திருப்பது அவசியம்.

இரத்தத்தில் பாஸ்பேட் சத்தின் அளவை எவ்வாறு குறைப்பது?

முதலில் சிறுநீரக மருத்துவர் உங்கள் இரத்தத்தில் கால்சியம், பாஸ்பேட் சில சமயம் பாராதார்மோன் ஹார்மோன் இவைகளின் அளவை சோதித்துப் பார்ப்பார். பாஸ்பேட், பாராதார்மோன் இவை அதிகமாகவும், கால்சியம் குறைவாகவும் பொதுவாக இருக்கும். இதனுடைய மாறுபாடு எவ்வளவு தீவிரமாக உள்ளது என்பதைப் பொறுத்து அவர் உங்களுக்கு மருந்துகளின் அளவை முடிவு செய்வார்.

1. மருந்துகள்


சிறுநீரக மருத்துவரால் பரிந்துரைக்கப்படும் சில மாத்திரைகளை சாப்பாடுடன் எடுத்துக் கொள்வதால் அம்மருந்துகள் உணவிலுள்ள பாஸ்பேட்டுடன் இணைந்து அதை குடலிருந்து உடலிற்குள் கிரகிக்க விடாமல் தடுக்கின்றன. உதாரணம் லோ - பாஸ், ஹைபோபாஸ் போன்றவை. இப்போது செவல்மெர், லாந்தானம் என்ற புதிய மருந்துகளும் இந்தியாவில் கிடைக்கின்றன. ஆனால் இவற்றின் விலை தற்போது மிகவும் அதிகம் கால்சிட்ரியால் என்ற ஹார்மோன் மாத்திரையும் உங்களுக்கு கொடுக்கப்பட்டிருக்கும். இது மறைமுகமாக பாராதைராயிட் சுரப்பியின் இயக்கத்தை சீர்படுத்துவதன் மூலமும் உங்கள் இரத்தத்தில் பாஸ்பேட் சத்தின் அளவு கட்டுப்படும். இந்த மருந்துகளை ஆலோசனைப்படி தவறாமல் எடுத்துக் கொள்ள வேண்டும்.

2. உணவு கட்டுப்பாடு


பாஸ்பரஸ் அதிகமாக உள்ள உணவுகள் பெரும்பாலும் புரதச்சத்தும் மிகுந்தவை உதாரணமாக ஆடு, கோழி இறைச்சிகள், மீன், முட்டை, பால், பால் பொருட்கள். எனவே நீங்கள் பாஸ்பேட் சத்துள்ள உணவைக் குறைத்தல் உணவில் புரதச்சத்தும் குறைந்து விடும். புரதம் குறைந்தால் பலவீனம், ஆரோக்யக் குறைவு உண்டாகும் எனவே உங்கள் உணவியல் நிபுணரின் ஆலோசனையின்படி மட்டுமே நீங்கள் உணவுக் கட்டுப்பாட்டை மேற்கொள்ள வேண்டும். முக்கியமாக உணவில் உள்ள பாஸ்பேட் சத்தை உறிஞ்ச விடாமல் செய்யும் மருந்துகளை சரியானபடி சரியான சமயத்தில் எடுத்துக்கொள்ள வேண்டும். அதாவது உணவு உட்கொள்ளும் முன் 15நிமிடங்களுக்கு முன்பாக முக்கியமாக புரதம் அதிகம் உள்ள பால், இறைச்சி உள்ள உணவுகள் எடுத்துக் கொள்ளும்போது சரியான இடைவெளிகளில் இரத்தத்தில் கால்சியம் பாஸ்பேட் சத்துக்களின் அளவையும் சரிபார்த்து அலோசனைப்படி மருந்துகள், உணவு முறைகள் இவற்றை மாற்றிக் கொள்ள வேண்டும்.

நன்றி ரசிகன் சிறந்த கட்டுரைக்கு !

:”@: :”@:

நன்றி மறுமொழிக்கு....