இந்தோனேசியாவில் கைதான ஈழத் தமிழர்களை காப்பாற்றுங்கள்: வைகோ

: இந்தோனேசியாவில் கைது செய்யப்பட்ட 89 ஈழத் தமிழர்களைக் காப்பாற்ற நடவடிக்கை எடுக்குமாறு பிரதமர் மன்மோகன் சிங்குக்கு மதிமுக பொதுச்செயலாளர் வைகோ வேண்டுகோள் விடுத்துள்ளார்.
இது குறித்து பிரதமருக்கு வியாழக்கிழமை அவர் எழுதிய கடிதத்தில் கூறியிருப்பது:
இலங்கையிலிருந்து பெண்கள், குழந்தைகள் உள்பட 89 ஈழத் தமிழர்கள் தங்களது உயிரைக் காப்பாற்றிக் கொள்வதற்காக கப்பல் மூலம் நியூசிலாந்துக்குப் பயணமானார்கள்.

அவர்களை சர்வதேச கடல் எல்லையில் இந்தோனேசிய கடற் படையினர் கைது செய்து அந்நாட்டு துறைமுகத்துக்கு அழைத்துச் சென்றுள்ளனர். அங்கிருந்து வலுக்கட்டாயமாக இலங்கைக்கு திருப்பி அனுப்புவதற்கு முயற்சித்து வருகின்றனர்.

89 ஈழத் தமிழர்களும் சட்ட விரோதமாகக் குடியேற வந்தவர்கள் அல்ல. சர்வதேச சட்டத்தின் அடிப்படையில் நியூசிலாந்தில் அகதியாக தஞ்சம் கேட்கிற உரிமையை தடுக்க முடியாது.
பயணத்தை தடுத்து நிறுத்திய இந்தோனேசிய அரசின் செயலுக்கு எதிர்ப்பு தெரிவித்து 89 தமிழர்களும் கப்பலை விட்டு இறங்க மாட்டோம் என்று போராடி வருகின்றனர்.

இந்திய அரசு தனது தூதரக உறவுகளின் மூலம் இந்தோனேசிய அரசுக்கு உரிய அழுத்தம் கொடுத்து ஈழத் தமிழர்கள் தங்களது பயணத்தைத் தொடர நடவடிக்கை எடுக்க வேண்டும் என்று வைகோ கேட்டுக் கொண்டுள்ளார்.