பாகிஸ்தான் நோயாளிக்கு "இந்திய இதயம்'

பாகிஸ்தானைச் சேர்ந்த 54 வயது நோயாளிக்கு இந்திய இதயத்தை இதய மாற்று அறுவைச் சிகிச்சை மூலம் டாக்டர் கே.எம்.செரியன் தலைமையிலான மருத்துவக் குழுவினர் வெற்றிகரமாகப் பொருத்தி மறுவாழ்வு அளித்துள்ளனர்.
இது தொடர்பாக பிராண்ட்டியர் லைஃப் லைன் இதய மருத்துவமனையின் தலைவர் டாக்டர் கே.எம்.செரியன், இதய

மாற்று சிகிச்சை நிபுணர் பிரஷாந்த் வைஜ்யநாத் ஆகியோர் செய்தியாளர்களிடம் கூறியதாவது:-
""பாகிஸ்தானைச் சேர்ந்த இதய நோயாளி ரியாஸ் முகம்மது, இதய மாற்று சிகிச்சை செய்து கொள்ள கடந்த ஜூன் 22-ஆம் தேதி பிராண்ட்டியர் லைஃப் லைன் மருத்துவமனைக்கு வந்தார்.

பொருத்தமான மாற்று இதயம் கிடைக்குமா என அவர் காத்திருந்தார்.இந்த நிலையில் சாலை விபத்தில் 32 வயது மதிக்கத்தக்க நபருக்கு தலைக் காயம் ஏற்பட்டு கடந்த ஜூலை 8-ஆம் தேதியன்று சென்னை பெரும்பாக்கம் குளோபல் மருத்துவமனையில் அனுமதிக்கப்பட்டார். அவருக்கு மூளைச் சாவு நிலை ஏற்பட்டது.
அவரது குடும்பத்தினர் இதயத்தைத் தானமாகக் கொடுக்க சம்மதித்தனர்.

இதையடுத்து கடந்த ஜூலை 10-ஆம் தேதி அதிகாலை 1.47 மணிக்கு, மூளைச் சாவு ஏற்பட்டவரின் இதயம் அறுவைச் சிகிச்சை மூலம் எடுக்கப்பட்டு 34.8 கிலோமீட்டர் தொலைவில் உள்ள முகப்பேர் பிராண்ட்டியர் லைஃப் லைன் மருத்துவமனைக்கு போக்குவரத்து போலீசாரின் முழு ஒத்துழைப்பு காரணமாக 24 நிமிஷத்தில் கொண்டுவரப்பட்டது.
உடனடியாக பாகிஸ்தான் நோயாளி ரியாஸ் முகமதுவின் பாதிப்புள்ள இதயம் அறுவைச் சிகிச்சை மூலம் அகற்றப்பட்டு, மாற்று சிகிச்சை மூலம் கொண்டுவரப்பட்ட இதயம் பொருத்தப்பட்டது. 2003-ஆம் ஆண்டு அவசர சிகிச்சை மூலம் ரியாஸ் முகம்மதுவுக்கு இதய பை-பாஸ் சிகிச்சை செய்யப்பட்டதால், இதய மாற்று சிகிச்சை செய்வது சற்று கடினமாக இருந்தது. எனினும் இதய மாற்று சிகிச்சைக்குப் பிறகு அவர் நலமாக உள்ளார்.

பிராண்ட்டியர் லைஃப் லைன் இதய மருத்துவமனையில் கடந்த ஆண்டு மட்டும் மொத்தம் 28 இதய மாற்று அறுவைச் சிகிச்சைகள் வெற்றிகரமாகச் செய்யப்பட்டன. இதுவரை மொத்தம் 42 இதய மாற்று அறுவைச் சிகிச்சைகள் செய்யப்பட்டுள்ளன.

இப்போது இதய மாற்று சிகிச்சைக்காக நான்கு இதய நோயாளிகள் மருத்துவமனையில் அனுமதிக்கப்பட்டுள்ளனர். பொருத்தமான மாற்று இதயம் கிடைக்கும் நிலையில், உடனடியாக அவர்களுக்கு இதய மாற்று அறுவைச் சிகிச்சை மேற்கொள்ளப்படும்'' என்று அவர்கள் தெரிவித்தனர்.

மகிழ்ச்சியான செய்தி அக்கா இப்பயாவது இரு நாடுகளும் ஒற்றுமையாக இருக்கட்டும்
:”@: