அமெரிக்க உயர் தொழில்நுட்ப ஒப்பந்தத்தில் எதிர்பார்த்த பலன் இல்லை: நிருபமா ராவ்

அமெரிக்காவுடனான உயர் தொழில்நுட்ப ஒப்பந்தத்தின் பலன் எதிர்பார்த்த அளவுக்கு இல்லை என்று வெளியுறவுச் செயலர் நிருபமா ராவ் கூறினார். ஆராய்ச்சி மற்றும் அபிவிருத்தி, வடிவமைப்பு உள்ளிட்ட துறைகளில் இந்திய நிறுவனங்களுடன் இணைந்து செயல்பட அமெரிக்கா முக்கியத்துவம் அளிக்க வேண்டும் என்று அவர் வலியுறுத்தினார்.

தில்லியில் திங்கள்கிழமை இந்தியா-அமெரிக்கா இடையிலான உயர் தொழில்நுட்ப வர்த்தகக் குழுவின் 8-வது கூட்டம் நடைபெற்றது. இக்குழு 2002-ம் ஆண்டில் ஏற்படுத்தப்பட்டதாகும். இக்கூட்டத்தில் நிருபமா ராவ் பேசியது: இரு நாடுகளிடையிலான ஒப்பந்தத்தில் சில துறைகளில் குறிப்பிடத்தக்க வளர்ச்சி எட்டப்படவில்லை என்று கருதப்படுகிறது.

குறிப்பாக வர்த்தகத் துறையில் வளர்ச்சி எதிர்பார்த்த அளவுக்கு இல்லை.

உயர் தொழில்நுட்ப வர்த்தகத்துக்கான ஒப்பந்தம் செய்து கொண்ட பிறகு இந்தியாவுடன் வழக்கமாக மேற்கொள்ளப்படும் துறைகளில் மட்டுமே அமெரிக்கா கவனம் செலுத்துகிறது. மாறாக ஆராய்ச்சி, மேம்பாடு, பொருள் வடிவமைப்பு, வர்த்தக ரீதியில் தயாரிப்பு உள்ளிட்டவற்றில் இந்தியாவுக்குத் தேவையான உதவிகளை அளிப்பதில் தேக்க நிலை நிலவுகிறது என்று குறிப்பிட்டார்.

இரு நாடுகளும் பயனடையும் வகையில் தொழில்நுட்ப பரிவர்த்தனைகளை மேற் கொள்வது குறித்து இக்கூட்டத்தில் விவாதிக்கப்பட்டது என்று அமெரிக்க தொழில்துறை மற்றும் பாதுகாப்புத்துறை துணை அமைச்சர் எரிக் எல். ஹிர்ஷ்கோர்ன் கூறினார்.

இம்மாதம் 19-ம் தேதி அமெரிக்க வெளியுறவுத்துறை அமைச்சர் ஹிலாரி கிளிண்டன் இரண்டு நாள் சுற்றுப் பயணமாக தில்லி வரவுள்ளார். அதற்கு முன்பாக இரு நாடுகளின் அதிகாரிகள் இடையிலான இந்த கூட்டத்தில் உயர் தொழில்நுட்ப பகிர்வு குறித்து விவாதிக்கப்பட்டது.

இரு நாடுகளிடையிலான வர்த்தக உறவில் நிலவும் தடைகளை அகற்றுவதோடு மட்டுமின்றி வர்த்தக வாய்ப்புகளையும் மேம்படுத்த வேண்டும். பாதுகாப்புத் துறையில் அமெரிக்காவுடன் இணைந்து செயல்பட இந்தியா ஆர்வமாக உள்ளது என்று குறிப்பிட்ட நிருபமா ராவ், கூட்டாக ஆராய்ச்சி மற்றும் அபிவிருத்தி பணிகளோடு தொழில்நுட்ப பகிர்வும் மேற்கொள்ளப்பட வேண்டும் என்று குறிப்பிட்டார்.

விமானத் துறை, விமான உதிரி பாகங்கள், விமான போக்குவரத்து நிர்வாகம், விமான பராமரிப்பு, விமான பாதுகாப்பு உள்ளிட்ட பணிகளில் இந்தியாவுடன் இணைந்து செயல்பட அமெரிக்காவுக்கு ஏராளமான வாய்ப்புகள் உள்ளன என்று நிருபமா ராவ் குறிப்பிட்டார்.

வரி விதிப்பில் நிலவும் தடைகளை அகற்ற வேண்டும் என்று அமெரிக்க தரப்பு பிரதிநிதிகள் கேட்டுக் கொண்டனர்.
அடுத்த ஐந்து ஆண்டுகளில் இந்திய ராணுவத்தை நவீனமயமாக்க அரசு திட்டமிட்டுள்ளது. 3,500 கோடி டாலர் செலவில் நவீனமயமாக்கும் இத்திட்டத்தை செயல்படுத்தும்போது அமெரிக்க நிறுவனங்களுக்கு பெருமளவு ஒப்பந்தம் கிடைக்கும் வாய்ப்பு உள்ளது.

வரி விதிப்பில் நிலவும் குறைபாடுகளை இந்தியா நீக்க வேண்டும் என்று வலியுறுத்திய ஹிர்ஷ்கோர்ன், கடந்த சில ஆண்டுகளில் அமெரிக்க நிறுவனங்களுக்கு 800 கோடி டாலர் அளவுக்கு ஆர்டர் கிடைத்துள்ளதாகக் குறிப்பிட்டார்.