ரஞ்சித் சிங்

ரஞ்சித் சிங் கி.பி. 1780 - ஆம் ஆண்டு நவம்பர் மாதம் 13 - ஆம் நாள் இன்றைய பாகிஸ்தான் குஜ்ரன்வாலா மாவட்டத்தில் பிறந்தார். இவரது தந்தையார் பெயர் மகாசிங். இவர் சுகர்சாகியா (Sukerchakia) என்ற சீக்கியப் பிரிவு ஒன்றின் தலைவர். தாயார் ராஜ் கவுர், இவர் ஜிண்டு என்னும் பகுதியின் இளவரசி. 1792 - ஆம் ஆண்டு மகா சிங் காலமான பின் ரஞ்சித் சிங் சுகர்சாகியா குழுவின் தலைவரானார். இவரது 15 - வது வயதில் கன்கயா குழு தலைவரின் மகளை மணந்து கொண்டார்.

கி.பி. 1799 - ஆம் ஆண்டு தம் பேராசை பிடித்த மாமி சதாகவுரின் உதவியுடன் அன்றைய பஞ்சாபின் தலைநகராயிருந்த லாகூரை கைப்பற்றினார். 1801 - ஆம் ஆண்டு தம்மை பஞ்சாபின் பேரரசராக தம்மை அறிவித்துக் கொண்டார். சீக்கிய குருமார்களின் பெயரில் நாணயங்களை வெளியிட்டு அவர்களின் மரபினைப் போற்றினார். அடுத்த ஆண்டு அமிர்தசரசை கைப்பற்றினார். பஞ்சாபில் சிதறியிருந்த சிறுசிறு அரசுகளையும், பத்தான் அரசுகளையும் கைப்பற்ற திட்டமிட்டார்.

பின்னர், அவர் வடக்கேயும், மேற்கேயும் பரவியிருந்த ஆப்கானிய குறுநில மன்னர்கள் மீது படையெடுத்தார். 1818 - ஆம் ஆண்டு முல்தானையும், அடுத்த ஆண்டு காஷ்மீரத்தையும் கைப்பற்றினார். சிந்து ஆற்றின் மறுகரையிலிருந்த மன்கேராவும், அதனைச் சுற்றியுள்ள பகுதிகளும் 1822 - ஆண்டு அவர் வசமாயின. 1823 - இல் பெசாவர் இவரால் கைப்பற்றப்பட்டது.

கி.பி. 1820 - ஆம் ஆண்டு ரஞ்சித் தம் படையை நவீனப்படுத்தும் பணியை மேற்கொண்டார். காலாட்படைகளுக்கும், துப்பாக்கி படைகளுக்கும் பயிற்சி அளிக்க வெளிநாட்டுப் படைத்தலைவர்களை அமர்த்தினார். அவரது படையில் சீக்கியர்கள், முஸ்லீம்கள், இந்துக்கள் என அனைத்து மதத்தினரும் இருந்தனர். அதே போல் இவரது அமைச்சரவையிலும் பிற மதத்தினர் இடம்பெற்றிருந்தனர். இவரது நவீனப் படை 1823 - இல் ஆப்கானிய, பத்தானிய படைகளை நவுசாரா என்னுமிடத்தில் தோற்கடித்தது.

கி.பி. 1838 - ஆம் ஆண்டு ஆக்லாந்து பிரபுவுடன் ஏற்பட்ட உடன்படிக்கையின்படி ஆங்கிலேயருடன் இணைந்து ஆப்கானிஸ்தான் மீது படையெடுத்தனர். வெற்றி விழா நடைபெற்றுக் கொண்டிருந்த போது பிரோஸ்பூரில் தங்கியிந்த ரஞ்சித் சிங் நோய்வாய்ப்பட்டு 1839 - ஆண்டு ஜூன் மாதம் 27 - ஆம் நாள் மரணமடைந்தார்