நறநற பழக்கமா?

என் தம்பியின் மகன் இரவு தூக்கத்தில் பற்களை நறநறவென்று பற்கள் விழுந்துவிடும் அளவுக்குக் கடிக்கிறான். கடந்த ஆறு மாத காலமாக டாக்டரிடமிருந்து மருந்து வாங்கிக் கொடுத்தும் பலனில்லை. இந்தப் பிரச்னை எதனால் ஏற்படுகிறது. இதை மாற்ற வழி என்ன?

நீங்கள் பையனுடைய வயதையும் வேலை செய்கிறாரா? அல்லது படிக்கிறாரா? என்ற முக்கிய விபரத்தையும் குறிப்பிடவில்லை. இருந்தாலும் இதற்கான காரணங்களைத் தனித்தனியாகக் குறிப்பிட முடியும்.

ள்ற்ழ்ங்ள்ள் எனப்படும் மன அழுத்தம் இன்று வேலை செய்யும் அலுவலர்களிடமும், பள்ளிக்குச் செல்லும் குழந்தைகளிடமும் அதிகம் காணப்படுகிறது. அலுவலகத்தில் அதிகாரிகளிடம் நேரடியாகக் காண்பிக்க முடியாத, வார்த்தைகளால் திட்டமுடியாதவற்றை அனைத்தையும் இரவு தூக்கத்தில் தாராளமாகச் செய்து மனம் மகிழ்ச்சியையும் திருப்தியையும் அடைகிறது. அப்போது மனதில் எழும் கொந்தளிப்பு, பற்களை நறநறவென்று கடிக்கச் செய்யும். மனதில் ஸத்வம் எனும் உயர்ந்த குணத்தை மறைத்து ரஜஸ் மற்றும் தமோ குணங்களின் தீய ஆதிக்கத்தினால், மனம் வயப்படும்போது, மனதில் எழும் சஞ்சலங்கள், கனவு எனும் வழியாகச் செயலுருவம் பெறும்போது அதன் தாக்கமே இந்தப் பற்களைக் கடிப்பது என்று கூறலாம்.

இதற்குத் தீர்வுதான் என்ன? மனதில் ஸத்வ குணத்தை வளர்த்துக் கொள்வதுதான் ஒரே வழி. அதனை வளர்த்துக் கொள்வதால் என்ன பயன்? பகுத்தறிவு, பொறுமை, சந்தோஷம், மென்மை, தயை, பாபச் செயல்களில் வெறுப்புணர்ச்சியுடன் கூடிய வெட்கம், சரளமானதன்மை, மனத் தெளிவு, பற்றற்று இருத்தல், உடல் லேசாக இருத்தல் இவை எல்லாம் வளர்ந்து விடும். இதைப் பெறுவதற்கான உணவு என்ன?

பருப்புடன் நெய் சேர்ந்த அன்னத்தைக் கெட்டியாக முதலாவதாகவும், புளிப்பு உப்பு இவை தூக்கி நிற்கும் திரவம் கலந்த அன்னத்தை இரண்டாவதாகவும், மோருடன் கூடிய அன்னத்தைக் கடைசியிலும் உண்ண வேண்டும். எதற்காக இந்த வரிசைக் கிரமம்?


பருப்பு சேர்ந்த அன்னம் கெட்டியாக இருப்பதுடன் நெய் கலந்தமையால் விறுவிறுப்பற்று நெய்ப்புத்தன்மை மிகுந்ததாகவும், சிறிது தாமதித்து ஜீரணமாவதாகவும், ருசியுள்ளதாகவும் இருக்கும். இவை பெரும்பாலும் ஸத்வகுணத்தைப் பெருக்க வல்ல குணங்கள். இது உணவில் முதல் அம்சமாக அமைவதால் விரும்பிப் புசிக்கப்பட்டு பெருமளவில் உட்சென்று பின்வருவருவனவற்றிற்குச் சிறிதளவே இடம் அளிக்கிறது.

பருப்பு அன்னத்தை அடுத்து வருவது புளிப்பு, உப்பு மேலோங்கியிருப்பதால் இது ரஜோ குணத்தை ஓரளவு அதிகமாக்கும். ஆனால் ஸத்வ குணத்தைத் தரும் ஆகாரம் முன்பே அதிக அளவில் உட்சென்றுவிட்டது.

கடைசியாகச் செல்லும் மோருடன் கூடிய அன்னம் தமோ குணமுள்ளது. மோர் தயிரிலிருந்து உண்டாகிறது. மோரை விடத் தயிராக உபயோகிக்கும்போது தமோ குணம் அதிகமாகும். இந்த வரிசையமைப்பும் அளவு அமைப்பும் ஸ்தவ குணம் ஓங்கி நிற்கவும் மற்ற இருகுணங்கள் இதற்கு அனுசரணையாக இருக்கவும் தக்கவாறு அமைக்கப்பட்டுள்ளது கவனித்தக்கது. இதனால் கிடைக்கும் லாபம் அலுவலகத்தில் அதிகாரிகளின் மேல் ஏற்படும் கோபத்தை, அலுவலகத்திலிருந்து கிளம்பும்போது, அங்கேயே விட்டுவிட்டு, வீட்டில் நிம்மதியாக உறங்க முடியும் என்பதே.

நறநற பழக்கமா?-2

இரவுத் தூக்கத்தில் Frustration எனும் ஏமாற்றம் கொள்ளச் செய்யும் நிகழ்வுகளும், Suppressed anger எனும் ஒடுக்கப்பட்ட கோபமும், பற்களைக் கடிக்கச் செய்யலாம். இதுவும் மனதைச் சார்ந்தே இருப்பதால், ஆயுர்வேத மூலிகை மருந்தாகிய மஹாகல்யாணக கிருதம், பிராம்மீகிருதம் போன்றவற்றை, எது உகந்ததோ அதை ஆயுர்வேத மருத்துவரின் நல் உபதேசப்படி காலை, மாலை வெறும் வயிற்றில் சாப்பிட்டு வர, நிறைவான பலனை விரைவாகப் பெறலாம்.
சிலர் Agressivem personality எனும் வகையைச் சார்ந்தவராக இருப்பர். அதாவது பிறர் மீது ஏற்படும் வெறுப்பு, கோபம் ஆகியவற்றை அவர் முன்பே காண்பிப்பதுடன் நிற்காமல், இரவிலும் அதைத் தொடர்வதால் பற்களைக் கடிப்பார்கள். மனதைச் சாந்தப்படுத்தும் சில ஆயுர்வேத சிகிச்சைமுறைகளான சிரோவஸ்தி எனும் மூலிகைத் தைலத்தை தலையில் நிறுத்தி வைத்தல், சிரோதாரா எனும் மூலிகைத் தைலத்தை தலையில் ஊற்றுதல் போன்றவற்றைச் செய்து கொள்வது நல்லது.
Abnormal allignment of teeth எனும் பற்களின் வரிசைக் கிரமம் சீராக இல்லாமல் இருப்பதாலும் பற்களை இரவு தூக்கத்தில் கடிக்கலாம். இதை ஒரு பல் மருத்துவரால் மட்டுமே சரி செய்ய இயலும். பற்கள் ஒன்றுடன் ஒன்று உரசாமல் இருப்பதற்கான Night mouth guards என்னும் பல் கவசங்கள் தற்சமயம் வந்துள்ளன.
உடலில் ஏற்படும் வேறு சில உபாதைகளாலும் சிலர் பற்களைக் கடிப்பதுண்டு. உதாரணத்திற்குப் பார்க்கின்ஸன்ஸ் நோய் எனும் நரம்புகளை வலுவிழக்கச் செய்து, உடல் அங்க அசைவுகளை முடக்கும் உபாதையில் Bruxism எனும் பற்களைக் கடிக்கும் உபாதை ஏற்படுவதாக நவீன ஆராய்ச்சியாளர்கள் கூறுகிறார்கள். பார்க்கின்ஸன் உபாதை நீங்குவதால், இந்த உபாதையும் நீங்கிவிடும்.
மனதைச் சார்ந்த உபாதைகளை மாற்றும் மாத்திரைகள், செயற்கையான மன அமைதிதரும் டிரான்க்விலைஸர் மருந்துகள் சாப்பிடுபவர்களிடமும் இரவில் பற்களைக் கடிக்கும் பிரச்னை சிலரிடம் ஏற்படுகிறது. இதை மிகக் கவனமுடன் சரி செய்ய வேண்டும். மானஸ்மித்ரம் எனும் ஆயுர்வேத மருந்து உதவக்கூடும்.
வயிற்றில் புழு பூச்சி இருந்தால் சிலர் பற்களை இரவில் கடிப்பார்கள். அவற்றை நீக்கும் வாயுவிடங்கம் சாப்பிட, இந்த உபாதை நீங்கிவிடும்.


படுக்கும் முன் ஆப்பிள் பழத்தைக் கடித்துச் சாப்பிடுவது அல்லது கேரட் ஒன்றைக் கடித்துச் சாப்பிடுவது போன்றவற்றால் முகத்தைச் சார்ந்த தசைநார்கள் இறுக்கம் தவிர்க்கப்பட்டு, அவை லேசாக ஆகிவிடுவதால், பற்களைக் கடிப்பது குறையலாம். படுக்கும் முன் வெதுவெதுப்பான வெந்நீரில் போட்டுப் பிழிந்தெடுத்தத் துணியை முகச் சதையின் மீது போட்டு உறங்குவதாலும் இப்பிரச்னையைச் சமாளிக்கலாம். படுக்கும் முன் வெதுவெதுப்பான நீரில் குளித்து, உடலைப் பிடித்துவிடச் சொல்வதும் நல்லதே.
மல்லாந்து படுத்து உறங்குவதன் மூலம் பற்களைக் கடிப்பதைக் குறைக்கலாம். வெதுவெதுப்பான அல்லது சூடான மூலிகை டீயைப் படுக்கும் முன் குடிக்கலாம். ஆனால் மதுபானம் கூடவே கூடாது. கால்சியம், மெக்னீசியம் சத்துள்ள மருந்துகளைத் தொடர்ந்து சாப்பிட இந்த உபாதையைக் குறைக்கவும், பின் விளைவுகளைத் தவிர்க்கவும் செய்யலாம். படுக்கையில் அமர்ந்து மூச்சுப் பயிற்சியைச் சில நிமிடங்கள் செய்வதன் மூலம் தசை நார்கள் தொய்வு நீங்கி நிம்மதியான உறக்கம் பெறுவதன் வாயிலாகவும் பற்களைக் கடிப்பதைத் தவிர்க்கலாம்.