வியக்க வைக்கும் விண்வெளி "உருளைக் கிழங்கு'

அமெரிக்காவின் "நாசா' விண்வெளி ஆய்வு அமைப்பு "டான் புரோப்' என்ற விண்கலத்தை 2007 செப்.27ம் தேதி ஏவியது. வியாழன் கோளை நோக்கி செல்லும் வழியில் இந்த விண்கலம், கடந்த ஜூலை 16ம் தேதி, "வெஸ்டா' என அழைக்கப்படும் விண்கல்லின் சுற்றுவட்டப்பாதையை அடைந்தது. பெரீரீரீரீய்ய்ய்ய்யயய உருளைக்கிழங்கைப் போன்ற இந்த விண்கல் பற்றிய போட்டோக்களை "டான் புரோப்' அனுப்ப துவங்கி விட்டது. இந்த விண்கலம், அடுத்த ஆண்டு வரை வெஸ்டா பற்றி ஆய்வு செய்யும். பின் மீண்டும் பயணித்து "செரஸ்' என்ற சிறு கோளை 2015ம் ஆண்டு அடையும். விண்வெளியில், ஒரு கோளின் சுற்றுவட்டப்பாதையிலிருந்து விலகி அடுத்த கோளுக்கு செல்லும் முதல் விண்கலம் இதுதான்.


விண்வெளி ஆராய்ச்சியில் மைல்கல்: "டான் புரோப்' விண்கலம், தற்போது மேற்கொண்டு வரும் ஆய்வு, முக்கியத்துவம் வாய்ந்தது. இந்த விண்கலம், தற்போது வெஸ்டாவில் உள்ள பாறைகளின் தாதுப்பொருட்களை ஆராய்கிறது. இதற்கான பிரத்யேக கருவிகள் விண்கலத்தில் உள்ளன. 2025ம் ஆண்டில் விண்கல்லுக்கு, விண்வெளி வீரர்களை அனுப்ப, அமெரிக்கா திட்டமிட்டுள்ளது. இதற்கான முன்னோட்டமாக இந்த விண்கலத்தின் தகவல்கள் இருக்கின்றன. "டான் புரோப்' அனுப்பும் செய்திகளில் இருந்து, சூரிய மண்டலம், கோள்கள் தோன்றிய விதம், அவற்றின் செயல்பாடுகளை விரிவாக அறியலாம்.

"டான் புரோப்' விண்கலம், பூமியில் இருந்து 188 மில்லியின் கி.மீ., தூரத்தில் உள்ளது. வெஸ்டாவின் ஈர்ப்புவிசையை உணரும் வண்ணம், விண்கலத்தின் என்ஜினை வடிவமைத்துள்ளனர். வெஸ்டா சுற்றுவட்டப்பாதையில் இருக்கும் விண்கலம், விண்கல்லுக்கு பல ஆயிரம் கி.மீ., தூரத்தில் இருக்கிறது. இந்த இடைவெளி காலப்போக்கில் குறைந்து கொண்டே வரும். விண்கல்லுக்கு 200 கி.மீ., அப்பால் இருந்தே ஆராய்ச்சியில் ஈடுபட்டால் போதும் என வல்லுனர்கள் கூறுகின்றனர்.

"வெஸ்டா' விண்கல்: "வெஸ்டா' விண்கல் 1807ம் ஆண்டு கண்டுபிடிக்கப்பட்டது. செவ்வாய், வியாழன் கோள்களுக்கு இடையே வெஸ்டா அமைந்துள்ளது. இந்த இரு கோள்களுக்கிடையே நான்கு விண்கல்கள் அமைந்துள்ளன. ஆரம்பத்தில் வெஸ்டா கிரகம் என அறிவிக்கப்பட்டது. பின் மேற்கொண்ட ஆராய்ச்சியினால், சூரிய குடும்பத்தில் இருந்து பிரிந்து வந்த விண்கல் என தெரிந்தது.

பூமியில் விழும் எரிகற்கள்: வெஸ்டாவின் மையம் உலோகத்தை அடிப்படையாகக் கொண்டிருக்கலாம். அதனைச் சுற்றி சிலிகேட் பாறைகள் அமைந்துள்ளன. இதன் கீழிருந்த பல அடுக்குகள் பிரிந்து, பூமியில் எரிகற்களாக விழுகின்றன. பூமியில் விழும் ஒவ்வொரு 20 எரிகற்களில் ஒன்று வெஸ்டாவினுடையது என நாசா கூறுகிறது.
சிறிய கோள் செரஸ்: செரஸ் கோள், வெஸ்டா ஆகியவை சுவாரஸ்யமானவை. இந்த இரண்டின் மேற்புறமும் சூடாக இருந்து பின் பாறையாக இறுகியுள்ளன. செரஸ் கோள் 950 கி.மீ., விட்டம் கொண்டது. மிகவும் உறுதியான பாறைகளால் இதன் மேற்பரப்பு காணப்படுகிறது.

இந்த கோள் அடிப்பாகத்தில் அதிகளவு தண்ணீரையும், பனிப்பாறைகளையும் கொண்டிருக்கலாம் என கருதப்படுகிறது. செரஸ் கோள், வெஸ்டாவில் எரிமலைக் குழம்புகள் வழிந்து ஓடுகின்றன. எவ்வாறு பாறைகள் உருவாகின்றன என இதை வைத்து வல்லுனர்கள் ஆராய்கின்றனர்.

தினமணி

##* :”@: