சட்டசபை ஓட்டெடுப்பில் ஆளும் கட்சி தோல்வி? :கவர்னர் கவாயிடம் எதிர்க்கட்சியினர் புகார் மனு

திருவனந்தபுரம் : நிதி நிலை அறிக்கை மீதான ஓட்டெடுப்பில் ஆளும் கட்சி தோல்வியடைந்து விட்டதாக, மாநில கவர்னர் ஆர்.எஸ்.கவாயிடம் எதிர்க்கட்சியினர் புகார் மனு அளித்தனர். கேரளாவில் ஏப்ரல் மாதம் நடந்து முடிந்த 13வது சட்டசபை தேர்தலில், ஓட்டு எண்ணிக்கை முடிவில் காங்கிரஸ் கட்சி தலைமையிலான ஐக்கிய ஜனநாயக முன்னணி கூட்டணி வெற்றி பெற்று, ஆட்சியை கைப்பற்றியது. இக்கூட்டணிக்கு எதிர்க்கட்சியினரை விட நான்கு எம்.எல்.ஏ.,க்கள் மட்டுமே அதிகம். புதிய ஆளும் கட்சியின் சார்பில், சட்டசபையில் நிதி நிலை அறிக்கையை, நிதியமைச்சர் கே.எம்.மானி தாக்கல் செய்தார். அதன் மீது, சில தினங்களாக விவாதம் நடந்து வந்தது.

இந்நிலையில், சபையில் நிதி நிலை அறிக்கை மீதான ஓட்டெடுப்பு நடத்த வேண்டும் என்று நேற்று எதிர்க்கட்சியினர் கோஷமிட்டனர். அப்போது, சபையில், ஆளும் கூட்டணி காங்கிரஸ் கட்சியைச் சேர்ந்த எம்.எல்.ஏ., ஹைபி ஈடன் மற்றும் கேரள காங்கிரஸ் கட்சி எம்.எல்.ஏ., டி.யு.குருவிளா ஆகியோர் சபையில் இல்லை. இதனால், ஓட்டெடுப்பில் ஆளும் கட்சி உறுப்பினர்களின் எண்ணிக்கை 62 ஆக குறைந்துவிட்டது. எதிர்க்கட்சியினருக்கு கூடுதல் எம்.எல்.ஏ.,க்கள் உள்ளனர். இதனால், சபாநாயகர் கார்த்திகேயன், முதல்வர் உம்மன் சாண்டி, அமைச்சர்கள் என அனைவரும் பதட்டமாகக் காணப்பட்டனர். ஓட்டெடுப்புக்கான நேரத்தை சபாநாயகர் நீட்டிக்கொண்டே இருந்தார். தொடர்ந்து எதிர்க்கட்சியினர், சபாநாயகரை கண்டித்து கோஷமிட்டவாறே, அவரது இருக்கைக்கு அருகே வந்தனர்.
உடனே, சபை பாதுகாவலர்கள், சபாநாயகரை சுற்றி சுவர் போல் நின்று பாதுகாப்பு அளித்தனர். சட்டசபையில் ஆளும் கட்சி பெரும்பான்மை பலத்தை இழந்துவிட்டது என்று கோஷங்களை எழுப்பியவாறே எதிர்க்கட்சித் தலைவர் அச்சுதானந்தன் தலைமையில் வெளிநடப்பு செய்தனர். எதிர்க்கட்சியினர் அனைவரும் வெளிநடப்பு செய்த தருணத்தை பயன்படுத்திக் கொண்ட சபாநாயகர், ஓட்டெடுப்பு நடத்தினார். நிதி நிலை அறிக்கைக்கு ஆதரவாக 69 ஓட்டுகள் பதிவானதால், வெற்றி பெற்றதாக அவர் அறிவித்தார்.

எதிர்க்கட்சிகள் சபையில் இல்லாத நேரத்தில் ஓட்டெடுப்பு நடத்தியதை கண்டித்து எதிர்க்கட்சியினர், மாநில கவர்னர் ஆர்.எஸ்.கவாயிடம் புகார் மனுவை நேரில் அளித்தனர். சட்டசபையில் நிறைவேற்றப்பட்ட நிதி நிலை அறிக்கைக்கு, மாநில கவர்னர் ஒப்புதல் அளிக்கக்கூடாது என அவர்கள் கவர்னரை கேட்டுக் கொண்டனர். இச்சம்பவம், கேரள அரசியலில் பெரும் சர்ச்சையை கிளப்பிவிட்டது. சபை நடவடிக்கையில் பங்கேற்காமல் இருந்த எம்.எல்.ஏ.,க்கள் மீது, சம்பந்தப்பட்ட கட்சித் தலைமை விளக்கம் கேட்கும் என எதிர்பார்க்கப்படுகிறது.


தினமணி