நில ஒதுக்கீடு மோசடி: பீகார் சட்டசபையில் கடும் அமளி

by **யாதுமானவள்** Fri 22 Jul 2011 - 8:37

பாட்னா : நில ஒதுக்கீடு மோசடி தொடர்பாக, பீகார் சட்டசபையில் நேற்று கடும் அமளி நிலவியதால், சபை ஒத்தி வைக்கப்பட்டது. பீகார் மாநில தொழில் பகுதி மேம்பாட்டு ஆணையம் சார்பில் நடந்த நில ஒதுக்கீட்டில், முறைகேடுகள் அரங்கேறியுள்ளன. இது தொடர்பாக, சி.பி.ஐ., விசாரிக்க வேண்டும் என, எதிர்க்கட்சிகள் வலியுறுத்தி வருகின்றன.

இந்நிலையில், நேற்று காலை, பீகார் சட்டசபை கூடுவதற்கு முன், நுழைவாயிலில் திரண்ட ராஷ்டிரிய ஜனதா தளம் எம்.எல்.ஏ.,க்கள் பல்வேறு கோஷங்களை எழுப்பினர். பின்னர், சட்டசபைக்குள் நுழைந்தவர்கள், சபை துவங்கிய பிறகும் கோஷங்களை எழுப்பியபடி இருந்தனர். கேள்வி நேரத்தின் போது, ராஷ்டிரிய ஜனதா தளம் உறுப்பினர்கள் ராகவேந்திரா பிரதாப் சிங் மற்றும் சாம்ரத் சவுத்ரி ஆகியோருக்கு பேச வாய்ப்பளிக்கப்பட்டது.

அப்போது, "நில ஒதுக்கீட்டில் நடந்த முறைகேடுகள் தொடர்பாக விவாதிக்க ஒத்திவைப்பு தீர்மான நோட்டீஸ் கொடுத்தோமே, அது என்னவானது' என, சபாநாயகரிடம் கேட்டனர். இதற்கு பதிலளிக்க மறுத்த சபாநாயகர் சவுத்ரி, ""மற்றொரு வேளையில், இந்தப் பிரச்னை பற்றி பேசலாம்; தற்போது, கேள்வி நேரம் தொடர ஒத்துழையுங்கள்,'' என்றார். இதையடுத்து, சபையின் மையப் பகுதியில் திரண்ட ராஷ்டிரிய ஜனதா தளம் உறுப்பினர்கள் அனைவரும் கடும் அமளியில் ஈடுபட்டனர்.

இதர உறுப்பினர்களின் கேள்விகளுக்கு பதிலளிக்க, அமைச்சர்களை சபாநாயகர் சவுத்ரி கேட்டுக் கொண்டார். எனினும், எதிர்க்கட்சியினரின் தொடர் கோஷங்களால், குழப்பம் நீடிக்கவே, சபையை மதியம் 12 மணி வரை ஒத்தி வைத்தார். மீண்டும் சபை கூடியதும், பூஜ்ஜிய நேரம் துவங்கியது. அதன் பின், உறுப்பினர்களின் கவன ஈர்ப்பு தீர்மான நோட்டீசுகளுக்கு அமைச்சர்கள் பதிலளிக்க கேட்டுக் கொண்டார். அமைச்சர்கள் பதிலளிக்கவே, வேறு வழியில்லாமல், ராஷ்டிரிய ஜனதா தளம் எம்.எல்.ஏ.,க்கள் சபையிலிருந்து வெளிநடப்பு செய்தனர்.

சொத்து விவரம் தர உத்தரவு: ""எம்.எல்.ஏ.,க்கள் அனைவரும் தங்களின் அசையும் மற்றும் அசையா சொத்து விவரங்களை சமர்ப்பிக்க வேண்டும்,'' என பீகார் சட்டசபையின் சபாநாயகர் உதய் நாராயண் சவுத்ரி உத்தரவிட்டுள்ளார்.

நேற்று சட்டசபையில் அவர் பேசுகையில், ""எம்.எல்.ஏ.,க்கள் அனைவரும் ஒளிவு மறைவற்ற பொது வாழ்க்கையை மேற்கொள்ள வேண்டும். எனவே, அனைவரும் தங்களின் சொத்து விவரங்களை சமர்ப்பிக்க வேண்டும்,'' என்றார்.
இதற்கிடையில், ஒரே ஒரு சட்டசபை உறுப்பினரை மட்டும் கொண்டிருந்த ஜே.எம்.எம்., கட்சி, ஆளும் ஐக்கிய ஜனதா தளத்துடன் இணைந்தது. இதையடுத்து, சட்டசபையில் ஐக்கிய ஜனதா தளம் உறுப்பினர்கள் எண்ணிக்கை 115 ஆக அதிகரித்தது.

தினமணி