தனுஷின் ஸ்பெஷல் பிறந்த நாள்

பிரபல நடிகரும், சூப்பர் ஸ்டார் ரஜினிகாந்தின் மருமகனுமான தனுஷ், இன்று தன்னுடைய 28வது பிறந்த நாளை கொண்டாடுகிறார். இயக்குநர் மற்றும் தயாரிப்பாளருமான கஸ்தூரி ராஜாவின் இளைய மகனான தனுஷ், 28.07.1983-ல் பிறந்தவராவார். இவரது உண்மையான பெயர் வெங்கடேஷ் பிரபு ஆகும். 'துள்ளுவதோ இளமை' மூலம் தனது மகனை சினிமாவிற்கு அறிமுகப்படுத்தி வைத்தார் கஸ்தூரி ராஜா. சினிமாவிற்காக வெங்கடேஷ் பிரபு என்ற இவரது பெயரை தனுஷ் என்று மாற்றி வைத்தார். இதன்பிறகு 'காதல் கொண்டேன்', 'திருடா திருடி', 'பொல்லாதவன்', 'யாரடி நீ மோகனி', 'படிக்காதவன்', 'உத்தம புத்திரன்', 'ஆடுகளம்', 'வேங்கை' உள்ளிட்ட பல வெற்றிப்படங்களில் நடித்திருக்கிறார். 'ஆடுகளம்' படத்தில் நடித்தமைக்காக இவருக்கு தேசிய விருது கிடைத்தது என்பது குறிப்பிடத்தக்கது. சூப்பர் ஸ்டார் ரஜினிகாந்தின் மூத்த மகளான ஐஸ்வர்யாவை திருமணம் செய்து கொண்டார். இவர்களுக்கு யாத்ரா, லிங்கா என இரண்டு மகன்கள் உள்ளனர். தனுஷ் நடிகராக மட்டுமல்ல பாடகராகவும் வெள்ளித்திரையில் உலா வருகிறார். தேசிய விருது பெற்ற சந்தோஷம், மாமனார் ரஜினி நலம் பெற்று வீடு திரும்பிய உற்சாகம், கூடவே ரஜினி குடும்பத்தின் அதிகாரப்பூர்வ தொடர்பாளர் எனும் அளவுக்கு அதிகப்படியான உரிமை கிடைத்த மகிழ்ச்சியிலிருக்கும் தனுஷுக்கு அவருடைய பிறந்த தேதியும், வயதும் (28) ஒன்றாகவே இன்று அமைந்திருக்கிறது என்பது சிறப்பாக குறிப்பிட வேண்டிய அம்சமாகும். இந்த சந்தோஷத்தை மேலும் அதிகரிக்க மனைவி ஐஸ்வர்யாவை இயக்குநராக புரமோட் செய்துள்ளார் தனுஷ். ஆம்... ஐஸ்வர்யா ரஜினி இயக்கும் முதல் படத்தில் ஹீரோவாக நடிக்கிறார் தனுஷ். தனுஷ் பிறந்த நாளான இன்றே இந்தப் புதுப்படமும் துவங்குகிறது. இந்தப் படத்தில் தனுஷும், ஸ்ருதி ஹாஸனும் ஜோடி சேர்கிறார்கள். புதுமுகம் ஒருவர் இசையமைக்கிறார். இன்னும் படப் பெயரை அறிவிக்கவில்லை ஐஸ்வர்யாவும், தனுஷும். வேல்ராஜ் ஒளிப்பதிவு செய்கிறார். இந்தப் படத்துக்காக ஒரு பாடல்கூட பதிவு செய்யப்பட்டுவிட்டது. விஜய் யேசுதாஸ், ஸ்வேதா மேனன் பாடியுள்ளனர். இந்தப் பாடலைத்தான் இன்று ஷூட் செய்கிறார்கள். படப்பிடிப்பு சென்னை மற்றும் புறநகரிலேயே இருக்குமாம். இந்தப் படப்பிடிப்பு காரணமாக, ரசிகர்களை நாளை சந்திக்கிறாராம் தனுஷ். வாழ்த்துகள் மாப்ள........