பதினாறு - Pathinaru

காதல் என்றால் பொய், ஏமாற்று வேலை என ஒரு வாதம் இருந்து கொண்டே இருக்கும். இன்னொரு வகையில், காதல் என்றால் உண்மை, கடவுள் போன்ற வாதமும் இருக்கும். உண்மைக் காதல் என்றுமே தோற்காது என ஒரு சாரார் கூறுவார்கள். காதலர்கள் தோற்றாலும், காதல் என்றுமே தோற்காது என ஆண்டாண்டு காலமாகக் கூறுவார்கள். இவை எல்லாவற்றையும் மையப்படுத்தி தமிழ் சினிமாவில் நிறைய காதல் படங்கள் வந்து போயிருக்கின்றன. அப்படியான கதைக் களத்துடன் வெளிவந்திருக்கும் படம் தான் இந்த 'பதினாறு'.
சிவா - மது ஷாலினி காதலர்கள். சாதாரண பள்ளி, கல்லூரி காதல் தான். தனியாகச் சந்திப்பது, சுற்றுவது என அவர்களது கல்லூரி நாட்கள் கழிகின்றன. பெண்ணின் பெற்றோர்களுக்கு இவர்கள் காதல் பிடிக்கவில்லை. காதல் பொய்யானது என்ற கருத்தை எடுத்துரைத்து மனதை மாற்ற முயல்கிறார்கள். முடியாது போகவே 'பதினாறு' என்ற ஒரு கதைப் புத்தகத்தை (டைரி) இருவருக்கும் வாசிக்க கொடுத்து, 'இப்படித் தான் காதல் இருக்கும்' என தெளிவு படுத்துகிறார்கள்.
டைரியில் இருக்கும் கதை ஒரு அழகான கிராமத்திற்கு அழைத்துச் செல்கிறது. படத்தின் பெரும்பகுதி அங்கேயே நகர்ந்து விடுகின்றது. அந்த கிராமத்திலும் ஒரு அழகான காதல் கதை உண்டு. அந்த கதையை படித்த பின்பும் மனம் மாறாத சிவா, அந்த கதையில் இடம்பெற்ற பாத்திரங்களைத் தேடிப் புறப்படுகிறார். அவ்வாறு புறப்பட்ட சிவாவிற்கு கிடைத்த விடை என்ன? எத்தனையோ காதல் கதைகள் இருந்தும் பதினாறு கதையை மது ஷாலினியின் அம்மா இந்த ஜோடியிடம் படிக்கக் கொடுக்க காரணம் என்ன? சிவா - மது காதல் கடைசியில் கைகூடியாதா, இல்லையா? என்பது உள்ளிட்ட இன்னும் பல வினாக்களுக்கு இனிமையாகவும், இளமையாகவும் விடையளிக்கிறது படத்தின் மீதிக்கதை!
'சிவா என்றாலே சிரிப்பு' என்று சொல்லும் அளவுக்கு பேர்வாங்கிய அதே சிரிப்பு கதாநாயகன் சிவாதான் இதே படத்திலும் பிரதிபலிக்கிறார். மச்சான் மச்சான் என்று காதலியை செல்லமாக அழைக்கும் சிவாவுக்கு ஆங்காங்கே அவருக்கே உரித்தான நையாண்டித்தனமும், நக்கலும் வெளிப்பட்டாலும் படத்தின் இயல்பு மாறாமல் நகரத்து காதலராக நடித்திருக்கிறார். சிவா-மது ஷாலினியின் காதல் இனிப்பு என்றால், கிராமத்து காதல் கோடியான வினிதா, கிஷோர் காதல் ஆந்திர காரத்தையே மிஞ்சும் அளவுக்கு அமைந்திருக்கிறது.
மது ஷாலினியின் நடிப்பும், முகமும் முன்னணி நடிகைகளின் வரிசையில் இடம்பிடிக்க தேவையான தகுதிகள்.
அப்புறம் அந்த ப்ளாஷ்பேக்.. (புதுமுகங்கள் வினிதா, கிஷோர்) டென்த் படிக்கிற வயசு. மனசு முழுக்க கிளைடாஸ்கோப் கொட்டி ரசிக்கிறார்கள் இருவரும். இளவரசிக்கு ஐ, கோபிக்கு ஜி என்று அடையாளம் கொள்ளும் கோபி, சுவர் முழுக்க 16... 16 என்று எழுதிவைக்க, இந்த 6 என்பது ஆங்கில எழுத்தான ஜி என்பதே அப்புறம்தான் விளங்குகிறது! ஒரு காட்சியில் முறைப் பையனோடு பைக்கில் போகும் வினிதா தென்னை மரங்களில் எழுதப்பட்டிருக்கும் நம்பர்களில் ஒன்றான 16 ஐ பார்த்து பரவசப்படுவது விசிலடித்து ரசிக்க வேண்டிய விஷூவல்!
கோபத்தில் கடுகடுப்பாகும் வினிதா, தன் குடும்பத்தையே எதிர்த்துக் கொண்டு செய்கிற அட்டகாசங்கள் ஒவ்வொன்றும் பயங்கரம். நேரில் பார்க்கிற ரசிகர்கள் நாலு அறை விட்டால் கூட ஆச்சர்யம் இல்லை. அவன் சம்பாத்தியத்துல ஒரு துணி மணி கூட வாங்கி தர முடியாது என்ற ஒற்றை வார்த்தைக்காக கோவிலுக்குள் புகுந்து கொண்டு எல்லாவற்றையும் அவிழ்த்துப்போடும் அவளது கோபம் இவள் பெண்ணா, பேயா என்றே கலங்க வைக்கிறது.
வினிதாவின் காதல் தாண்டவத்தை பார்த்து படபடக்கும் அப்பாவாக நடித்திருக்கும் பத்திரிகையாளர் குணாவின் நடிப்பு சிறப்பு. எல்லை மீறி அட்டகாசம் செய்யும் பெண்ணை கட்டுப்படுத்த முடியாமல் கலங்கி தவிப்பதை தனது பாடிலேங்குவேஜ் மூலம் வெளிப்படுத்தி ரசிகர்களிடம் பலே வாங்கிச்செல்கிறார்.
சின்னத்திரை நடிகர், இயக்குநர் அபிஷேக், 'கனாக்காணும் காலங்கள்' புகழ் பாண்டி உள்ளிட்ட சிலரும் வருகிறார்கள். ஒரு காட்சியில் வந்தாலும் கஸ்தூரியின் கதாபாத்திரம் பலமாக மனதில் நிற்கிறது.
இடைவேளைக்குப்பிறகு தனது காதலில் நாயகி உறுதியாக இருப்பது போல் காட்ட நினைத்தவர் வீம்பு பிடித்த பெண்ணாக காட்டியது திரைக்கதை கோளாறா? கேரக்டர் வடிவமைப்பில் ஏற்பட்ட பிழையா?
பொதுவாக எல்லாரையும் நல்லவராக காட்ட நினைக்கும் இயக்குநரின் நல்லஎண்ணம் புரிகிறது. ஆனால் முறை மாமனை, நல்லவனாக காட்டியதால் அவர் மீது பரிதாபம் ஏற்பட்டு இந்த காதல் ஜோடி சேர்ந்துதான் ஆக வேண்டுமா? என்ற எண்ணம் நமக்கு ஏற்படுவது படத்தின் வெற்றிக்கு மாபெரும் மைனஸ்.
அச்சு அசலான கிராமம். அங்கு அச்சுவெல்லத்தை விளைய வைத்த மாதிரி வசனங்கள் என்று கவனிக்க வைத்திருக்கிறார் வசனகர்த்தா மகாலிங்கம்! கிராமம், நகரம் என்று எல்லா திசைகளிலும் நமது கையை பிடித்துக் கொண்டு நடக்கிறது யுவன் சங்கர்ராஜாவின் பின்னணி இசை. பாடல்களும் இனிமை. அருள்தாசின் ஒளிப்பதிவில் கிராமம் குளுமை.
ஒரு சூப்பர் ஹிட் ஆக வேண்டிய படத்தை இயக்குநர் கவனக்குறைவால் சாதாரண லவ் சப்ஜெக்ட் ஆக்கி விட்டாரே!
பதினாறு - பருவக் கோளாறு!

@.