கல்வித்துறைக்கேற்ற அனைத்து வசதிகளும் இலவசமாக வழங்கப்படும்

by **நண்பன்** Fri 29 Jul 2011 - 14:15

கல்வித்துறைக்கேற்ற அனைத்து வசதிகளும் இலவசமாக வழங்கப்படும்
அழகியற்கலை ஆசிரியர் நியமன நிகழ்வில் அமைச்சர் பந்துல
லோரன்ஸ் செல்வநாயகம்
அழகியற் கலைத்துறைக்கு மூவாயிரத்துக்கு மேற்பட்ட பட்டதாரி ஆசிரியர்களை ஒரே தடவையில் நியமிக்கின்றமை இலங்கையின் கல்வி வரலாற்றில் இதுவே முதற்தடவையாகுமென கல்வியமைச்சர் பந்துல குணவர்தன தெரிவித்தார்.

இந்நியமனங்களை வழங்கக் கோரி அநாவசிய ஆர்ப்பாட்டங்களில் ஈடுபட்டவர்கள் அதன்மூலம் சுமார் 700 நியமனங்களையே பெற்றுக் கொள்ள முடிந்திருக்கும். எனினும் ஜனாதிபதி தலைமையிலான அமைச்சரவை இத்துறைக்கு மூவாயிரத்துக்கும் மேற்பட்ட நியமனங்களை வழங்கி பெருமைப்படுத்தியுள்ளது எனவும் அமைச்சர் சுட்டிக்காட்டினார்.

அழகியற்கலைப் பட்டதாரிகளுக்கு ஆசிரியர் நியமனங்களை வழங்கும் வைபவம் நேற்று ஜனாதிபதி மஹிந்த ராஜபக்ஷவின் தலைமையில் அலரிமாளிகையில் நடைபெற்றது.

அமைச்சர்கள் முக்கியஸ்தர்கள் பலரும் கலந்து கொண்ட இந்நிகழ்வில் மேலும் உரையாற்றிய அமைச்சர்,

அழகியற் கலைப் பிரிவுக்கு மூவாயிரத்துக்கு மேற்பட்ட பட்டதாரி ஆசிரியர்களை நியமிப்பது தொடர்பில் நான் அமைச்சரவைப் பத்திரத்தை சமர்ப்பித்த போது ஜனாதிபதி மஹிந்த ராஜபக்ஷ எந்தவித தயக்கமுமின்றி அதற்கு அங்கீகாரமளித்தார். அதற்காக நாம் அவருக்கு நன்றி கூறக் கடமைப்பட்டுள்ளோம்.

கடந்த 3 வருடகால யுத்தத்தின் சத்தம் எமது கலாசாரத்தின் ஒரு பகுதியாகியிருந்தமை குறிப்பிடப்பட வேண்டியது. அத்தகைய நிலையிலும் அரசாங்கம் கல்வித்துறையில் மிகுந்த கவனம் செலுத்தியது.

இலவசக் கல்வி, இலவசப் பாடநூல், இலவசச் சீருடை என இலவசமாக சகலதையும் வழங்கும் ஒரே நாடு இலங்கை மட்டுமே.

பட்டதாரிகள், கற்றோரைக் கணக்கில் எடுக்காத காலம் ஒன்றிருந்தது. ஜனாதிபதி மஹிந்த ராஜபக்ஷ அவர்களுக்கு உரிய கெளரவமளிப்பவர்.

இயந்திர உபகரணங்களையன்றி நாட்டின் சொத்துக்களான எதிர்கால சந்ததியைப் பொறுப்பேற்கும் புதிய ஆசிரியர்கள் கெளரவமான நல்லொழுக்கமுள்ள பிரஜைகளாக உருவாக்க வேண்டிய பொறுப்புடை யவர்கள் எனவும் அமைச்சர் தெரிவித்தார்.