2ஜி ஸ்பெக்ட்ரம் ஒதுக்கீட்டில் பிரதமர் தலையிடவில்லை’

2ஜி ஸ்பெக்ட்ரம் ஒதுக்கீட்டில் பிரதமர் தலையிடவில்லை’
பிரதமர் அலுவலகம் விளக்கம்
2ஜி ஸ்பெக்ட்ரம் ஒதுக்கீட்டில் பிரதமர் மன்மோகன்சிங் தலையிடவில்லை என பிரதமர் அலுவலகம் நேற்று முன்தினம் மறுப்பு தெரிவித்துள்ளது.

2ஜி ஸ்பெக்ட்ரம் ஊழல் தொடர்பாக முன்னாள் மத்திய மந்திரி ஆ. ராசா கைது செய்யப்பட்டு திகார் சிறையில் அடைக்கப்பட்டுள்ளார். இந்த ஊழல் தொடர்பான வழக்கு விசாரணை டில்லி சிறப்பு சி. பி. ஐ. நீதிமன்றில் நடைபெறுகிறது. தற்போது குற்றச்சாட்டு மீதான வாதம் தொடங்கி விட்டது. எனவே ஆ. ராசா கோர்ட்டில் ஆஜராகி கடந்த வாரம் வாதிட்டார்.

அப்போது அவர், 2ஜி ஸ்பெக்ட்ரம் ஒதுக்கீடு குறித்து பிரதமர் மன்மோகன் சிங்குக்கு அனைத்து தகவல்களையும் தெரிவித்ததாக கூறினார். மேலும் ஸ்பெக்ட்ரம் ஒதுக்கீட்டின் போது நிதி அமைச்சராக இருந்த மத்திய அமைச்சர் ப. சிதம்பரம், மத்திய அரசு தலைமை சட்டத்தரணி வாகன்வதி ஆகியோர் பெயரையும் குறிப்பிட்டார். தொலைத் தொடர்பு துறைக்கு 2008 ஆம் ஆண்டு ஜனவரி 23 ஆம் திகதி அன்று அதிகார பூர்வமற்ற தகவல் ஒன்றை பிரதமர் அலுவலகம் அனுப்பியது. ஸ்பெக்ட்ரம் ஒதுக்கீடு அல்லது கட்டண நிர்ணய நடைமுறை ஆகியவை மிகவும் ஆரம்ப கட்டத்தில் இருந்தது. தொலைத் தொடர்பு துறையுடன் அதிகார பூர்வமற்ற முறையில் தகவல்களை பகிர்ந்துகொள்ளவே பிரதமர் விரும்பினார். முறையான தொடர்பை மேற்கொள்ளவோ, ஒதுக்கீடு குறித்து முழு அளவில் அறியவோ அவர் விரும்பவில்லை.

ஸ்பெக்ட்ரம் ஒதுக்கீட்டை பெறும் செல்போன் நிறுவனங்களுக்கு குறைந்தபட்ச தகுதி இருப்பதை கருத்தில் கொள்ளுமாறு பிரதமர் அலுவலகம் கருத்து தெரிவித்தது. ஏற்கனவே ஸ்பெக்ட்ரம் வைத்துள்ள நிறுவனங்களுக்கு கூடுதல் சந்தாதாரர்களை பெறும் வகையில் ஸ்பெக்ட்ரம் அனுமதிக்கலாம் என்றும் ஆரம்பகட்டத்தில் உள்ள நிறுவனங்களுக்கு வழக்கமான கட்டண அடிப்படையிலேயே ஸ்பெக்ட்ரம் வழங்க வேண்டும் என்றும் ஆலோசனை கூறப்பட்டது. அதே நேரத்தில், ஆரம்ப கட்ட நிலையில் உள்ள ஸ்பெக்ட்ரம் அலைவரிசை தவிர மீதம் உள்ள அனைத்து அலைவரிசையையும் ஏலத்தில் விடவும் கருத்து தெரிவிக்கப்பட்டது. ஏற்கனவே உள்ள செல்போன் நிறுவனங்களுக்கும், புதிய நிறுவனங்களுக்கும் இடையே ஒரு சமநிலையை தோற்றுவிக்க குறிப்பு அனுப்பப்பட்டது.

ஆலோசனைகளாகவும், அதிகாரபூர்வமற்ற கருத்து பரிமாற்றங்களாகவும் உள்ள இந்த கருத்துக்களை ஸ்பெக்ட்ரம் அலைவரிசை ஒதுக்கீடு மற்றும் கட்டண நிர்ணய விவகாரங்களில் பிரதமர் அலுவலகம் தலையீடு செய்ததாக கருதக்கூடாது.

இந்த பரிந்துரைகளின் அடிப்படையில் தொலைத் தொடர்பு ஒழுங்கு முறை ஆணையம் மற்றும் முக்கிய செல்போன் நிறுவனங்களுடன் ஆலோசனை நடத்த அவற்றை பிரதமர் அலுவலகம் அனுப்பியது.

ஏற்கனவே செல்போன் சேவையில் உள்ள நிறுவனங்களுக்கும் புதிய நிறுவனங்களுக்கும் இடையே மோதல் ஏற்படலாம் என்பதை நன்கு அறிந்ததால் இந்த விவகாரத்தை தொலைத்தொடர்பு ஒழுங்கு முறை ஆணையத்துடன் சேர்ந்து தொலைத்தொடர்பு அமைச்சகம் விரிவாக ஆலோசனை செய்ய வேண்டும் என பிரதமர் கருதினார். எனவே பிரதமர் அலுவலகத்தில் இருநுது தொலைத் தொடர்பு துறை அமைச்சகத்துக்கு அனுப்பப்பட்ட கடிதமானது அந்த அமைச்சகத்தில் பரிசீலனைக்கான அதிகாரபூர்வமற்ற ஆலோசனைகளே.

இதன் வாயிலாக, ஸ்பெக்ட்ரம் உரிமங்கள் வழங்கியதிலோ அல்லது கட்டணம் நிர்ணயம் செய்ததிலோ பிரதமரும், பிரதமர் அலுவலகமும் தலையிட்டதாக எந்த வகையிலும் கருத முடியாது என தெளிவாகிறது.