ஸ்பெக்ட்ரம் உரிமத்துக்காக எந்த வகையிலும் லஞ்சம் அளிக்கவில்லை: டாடா மறுப்பு

மும்பை, ஆக.4-

2ஜி ஸ்பெக்ட்ரம் அலைவரிசை வழங்கியதில் ஒன்றே முக்கால் லட்சம் கோடி ரூபாய் ஊழல் நடந்தது தொடர்பாக முன்னாள் மத்திய மந்திரி ஆ.ராசா கைது செய்யப்பட்டுள்ளார்.

விதிகளை மீறி ஸ்பெக்ட்ரம் உரிமம் வழங்கியதற்காக, கலைஞர் டி.வி.க்கு ரூ.200 கோடியை வழங்கியதாக `ஸ்வான்` நிறுவனம் மீது சி.பி.ஐ. குற்றஞ்சாட்டி உள்ளது. இது தொடர்பாக, ஸ்வான் நிறுவன அதிபர் சாகித் பால்வா கைது செய்யப்பட்டார்.

தற்போது, டெல்லி சி.பி.ஐ. சிறப்பு கோர்ட்டில் ஸ்பெக்ட்ரம் வழக்கின் வக்கீல் வாதம் தொடங்கியுள்ளது. எனவே, பால்வா வக்கீல் மேமன் நேற்று முன்தினம் வாதாடினார். அப்போது அவர், `டாடா நிறுவனத்துக்கு ஸ்பெக்ட்ரம் உரிமம் வழங்கியதற்காக ஆ.ராசாவின் சொந்த தொகுதியான பெரம்பலூரில் ஒரு மருத்துவமனைக்கு ரூ.20 கோடியை டாடா நிறுவனம் வழங்கியது.

எங்கள் மீதான குற்றச்சாட்டை போலவே உள்ள அந்த புகாரை சி.பி.ஐ. மூடி மறைக்கிறது' என தெரிவித்தார். சி.பி.ஐ. கோர்ட்டில் கூறப்பட்ட இந்த புகாரை டாடா குழும தலைவர் ரத்தன் டாடா மறுத்துள்ளார். மும்பையில், டாடா ஸ்டீல் நிறுவனத்தின் வருடாந்திர பொதுக்குழுக் கூட்டம் நேற்று நடந்தது. அதில் கலந்து கொண்டு பேசிய ரத்தன் டாடா, இந்த தகவலை தெரிவித்தார். அப்போது அவர் கூறியதாவது:-

ஆ.ராசாவுக்கு நாங்கள் ரூ.20 கோடியை அளிக்கவில்லை. மருத்துவமனைக்கும் மருத்துவ உபகரணம் வாங்கவும் பணம் அளித்ததாக கூறப்படுகிறது. அதாவது, மக்களுக்காக வழங்கப்பட்டதாக அர்த்தம். ஆனால், எந்த மருத்துவமனையும் கட்டப்படவில்லை. மருத்துவ கருவியும் வாங்கப்படவில்லை. ஒரு பைசா கூட தரப்படவில்லை.

கோர்ட் நடவடிக்கைகளை திசை திருப்பவே இதுபோன்ற புகார்கள் கூறப்படுகின்றன. நமது நாட்டில் உள்ள அவமதிப்பு சட்டங்களின்படி, கோர்ட்டில் இதுபோன்று ஒருவர் கூறி விட்டு தப்பித்துக் கொள்ள முடிகிறது. இது துரதிர்ஷ்டவசமானது. யாரும் கேட்கவில்லை 2ஜி ஸ்பெக்ட்ரம் அலைவரிசை விவகாரத்தில், பல்வேறு விஷயங்களை பகிரங்கமாக தெரிவிக்க முடியாது.

ஏனெனில், அனைத்து தகவல்களையும் விசாரணை அமைப்புகளிடம் கூறி விட்டோம். மேலும், இந்த விவகாரம் வழக்கு விசாரணை தொடர்புடையது என்பதால் கோர்ட்டு அவமதிப்பை நாங்கள் சந்திக்க நேரிடும். ஆ.ராசாவுக்கு நேரடியாகவோ அல்லது மறைமுகமாகவோ பணம் தருமாறு எங்களிடம் யாரும் ஒருபோதும் கேட்கவில்லை.

தூசு மற்றும் புழுதி ஆகியவை அடங்கிய பிறகு, உண்மை தெளிவாக வெளிப்படும் என்பதை மட்டும் நான் உறுதியாக தெரிவிக்கிறேன்.

இவ்வாறு ரத்தன் டாடா தெரிவித்தார்.

தூசு மற்றும் புழுதி ஆகியவை அடங்கிய பிறகு, உண்மை தெளிவாக வெளிப்படும் என்பதை மட்டும் நான் உறுதியாக தெரிவிக்கிறேன். @.