தி.மு.க.வுக்கு மரபுப்படி தான் இருக்கை

சென்னை, ஆக.5-

செப்டம்பர் 14-ந் தேதி வரை சட்டசபை பட்ஜெட் கூட்டத்தொடர் நடக்கிறது. தி.மு.க. உறுப்பினர்களுக்கு மரபுப்படி தான் இருக்கை ஒதுக்கப்பட்டுள்ளது என்று சபாநாயகர் ஜெயக்குமார் கூறினார். நேற்றைய சட்டசபை கூட்டம் முடிந்ததும் அலுவல் ஆய்வுக் குழு கூட்டம் சபாநாயகர் ஜெயக்குமார் தலைமையில் நடந்தது. கூட்டம் முடிந்ததும் சபாநாயகர் ஜெயக்குமார் பேட்டி அளித்தார்.

அவர் கூறியதாவது:-

அடுத்து சட்டசபை 8-ந் தேதி கூடுகிறது. அன்று முதல் பட்ஜெட் மீது பொது விவாதம் தொடங்கி 12-ந் தேதி பதிலுரை வழங்கப்படுகிறது. 16-ந் தேதி முதல் மானியக் கோரிக்கைகள் மீது விவாதம் தொடங்குகிறது. அன்று வேளாண்மைத் துறை, 17-ந் தேதி எரிசக்தி, குறு, சிறு, நடுத்தர தொழில் நிறுவனங்கள் துறை, தொழில் துறை, 18-ந் தேதி நகராட்சி நிர்வாகம்-குடிநீர் வழங்கல் துறை,

ஊரக வளர்ச்சி துறை, 19-ந் தேதி கூட்டுறவு மற்றும் உணவுத்துறை, 22-ந் தேதி உயர்கல்வி மற்றும் பள்ளிக்கல்வித் துறை, 23, 24-ந் தேதி காவல், தீயணைப்பு, மதுவிலக்கு ஆயத்தீர்வை துறை, 25-ந் தேதி வீட்டு வசதி, விளையாட்டு மேம்பாடு, சிறப்பு பணிகள் செயலாக்கம், தகவல் தொழில்நுட்பவியல் துறை, 26-ந் தேதி நெடுஞ்சாலைகள் துறை, பொதுப்பணித்துறை, 29-ந் தேதி வணிக வரிகள், பதிவுத் துறை, சுற்றுச்சூழல், வனத்துறை, 30-ந் தேதி இந்து சமய அறநிலையத் துறை, செய்தித்துறை, சுற்றுலா, எழுதுபொருள் மற்றும் அச்சுத்துறை, செப்டம்பர் 5-ந் தேதி ஆதிதிராவிடர் நலத்துறை, பிற்படுத்தப்பட்டோர்

நலத்துறை, 6-ந் தேதி சமூக நலத்துறை, மாற்றுத் திறனாளிகள் நலத்துறை, 7-ந் தேதி சட்டத்துறை, 8-ந் தேதி போக்குவரத்து துறை, 9-ந் தேதி கால்நடை பராமரிப்பு, மீன் வளம், பால் வளத்துறை, 12-ந் தேதி மக்கள் நல்வாழ்வுத் துறை, 13-ந் தேதி கைத்தறித் துறை, தொழிலாளர் மற்றும் வேலைவாய்ப்புத் துறை, 14-ந் தேதி பொதுத் துறை, வருவாய்த் துறை, தமிழ் வளர்ச்சித் துறை மற்றும் சட்ட முன்வடிவுகள், அரசினர் அலுவல்கள். அலுவல் ஆய்வுக் குழு கூட்டத்தில் தி.மு.க. தவிர மற்ற கட்சியினர் கலந்து கொண்டனர். சட்டசபை தினமும் காலை 10 மணிக்கு கூடி மதியம் 2 மணிக்கு முடியும். கேள்வி நேரம் உண்டு.

இவ்வாறு அவர் கூறினார்.

தி.மு.க.வினருக்கு ஒரே பகுதியில் இடம் ஒதுக்கும் வரை கூட்டத் தொடர் முழுவதும் புறக்கணிக்கப் போவதாக தி.மு.க. மன்ற தலைவர் கூறியுள்ளாரே? என்று கேட்டதற்கு, ``மரபுப்படி தான் இருக்கைகள் ஒதுக்கப்பட்டுள்ளது. இதுகுறித்து எழுத்துப்பூர்வமாகவே தெரிவித்திருக்கிறோம்'' என்றார்.

தொடர் முழுவதுமே புறக்கணிப்பதாக கூறியிருக்கிறார்களே? என்று கேட்டதற்கு, ``அது அவர்களது விருப்பம்'' என்றார். வாய் மொழியாக ஒதுக்குவதாக உறுதியளித்தீர்கள் என்று கூறியுள்ளாரே? என்றதற்கு, ``அது தவறு'' என்றார். பேட்டியின் போது சட்டமன்ற செயலாளர் ஜமாலுதீன் உடனிருந்தார்.