எதிர்க் கட்சித் தலைவர் தெரிவில் ஐ.தே.க. உறுப்பினரிடையே குழப்பம்

சிலாபம் நகரசபை
எதிர்க் கட்சித் தலைவர் தெரிவில் ஐ.தே.க. உறுப்பினரிடையே குழப்பம்
அதிக விருப்புவாக்கு பெற்ற தமிழரை ஓரம்கட்ட முயற்சி?
கே. அசோக்குமார்
சிலாபம் நகர சபைக்கு 1428 அதிக விருப்பு வாக்குகளைப் பெற்று முதலாவதாக தெரிவான ஐ. தே. க. உறுப்பினரான அப்பலோ ராஜ் என்பவரை 1051 விருப்பு வாக்குகளைப் பெற்று மூன்றாவதாக தெரிவான உறுப்பினர் ஓரம்கட்ட முயற்சித்த சம்பவமொன்று நேற்று சிறிகொத்தாவில் நடைபெற்றுள்ளது.

உள்ளூராட்சி சபைகளுக்கு தெரிவான ஐ.தே. க. உறுப்பினர்களுக்கு நேற்று ஐ. தே. க. தலைமையகத்துக்கு அழைப்பு விடுக்கப்பட்டிருந்தது.

ஐ. தே. க. உறுப்பினர்களாக தெரிவான சர்ச்சைக்குரிய எதிர்க்கட்சித் தலைமை பொறுப்புகள் வழங்கப்பட்டன.

எனினும் சிலாபம் நகர சபைக்குரிய எதிர்க்கட்சி தலைமைப் பொறுப்பு வழங்கப்படவில்லை. இது தெளிவாக ஐ. தே. க. பொதுச் செயலாளர் திஸ்ஸ அத்தநாயக்கவிடம் அப்பலோ ராஜ் வினவிய போது, இன்னும் தெரிவானவர்கள் தொடர்பான உத்தியோகபூர்வ பட்டியல் தலைமையத்துக்கு கிடைக்கவில்லை என்றார்.

இதன் உண்மை நிலை தொடர்பாக புத்தளம் மாவட்ட ஐ.தே.க. எம்.பி. ரங்கே பண்டாரவிடம் அப்பலோ ராஜின் ஆதரவாளர்கள் தொலைபேசி மூலம் வினவிய போது, குறிப்பிட்ட பெயர்ப் பட்டியல் புத்தளம் தெரிவத்தாட்சி அலுவலர் ஊடாக கடந்த 27ம் திகதியே அனுப்பி வைத்ததாக தெரிவித்தார். குறைவான விருப்பு வாக்குகளை பெற்றாலும் நான் சிரேஷ்ட உறுப்பினர் என்பதால் எனக்கே எதிர்க்கட்சித் தலைமைப் பொறுப்பு வழங்க வேண்டும்.

இல்லையேல் சிலாபம் நகரில் பெரும் குழப்பமே நடக்கும் என மூன்றாவதாக தெரிவான உறுப்பினர் சிறிகொத்தாவுக்கு வெளியே கர்ஜித்து விட்டு சென்றுள்ளார். அதிக விருப்பு வாக்குகளைப் பெற்றுத் தெரிவானவர் ஒரு தமிழர் என்பதாலேயே ஐ.தே.க. அவரை ஓரம்கட்டுகிறதா என அப்பலோ ராஜின் ஆதரவாளர்கள் கேள்வி எழுப்புகின்றனர். இந்நிலையில் சிலாபம் நகர சபைக்கு எதிர்க்கட்சி தலைமைப் பொறுப்பு வழங்கப்படாமலேயே உறுப்பினர்கள் சிறிகொத்தாவிலிருந்து திரும்பிச் சென்றனர்.

:”@: