பல்கலை தவிர்ந்த உயர் கல்வி நிறுவன மாணவர்களுக்கும் வழங்க நடவடிக்கை

by **நண்பன்** Sat 6 Aug 2011 - 4:13

தலைமைத்துவப் பயிற்சி விஸ்தரிப்பு:
பல்கலை தவிர்ந்த உயர் கல்வி நிறுவன மாணவர்களுக்கும் வழங்க நடவடிக்கை
ரிட்மா திசாநாயக்க
பல்கலைக்கழகத்துக்கு தெரிவான மாணவர்களுக்கு வழங்கப்பட்ட தலைமைத்துவப் பயிற்சியை ஏனைய உயர்கல்வி நிறுவனங்களுக்கும் விஸ்தரிக்க உயர்கல்வி அமைச்சு நடவடிக்கை எடுத்துள்ளது. நவீன தொழில்நுட்பத்துக்கான தேசிய நிறுவகம் உள்ளிட்ட ஏனைய உயர்கல்வி நிறுவனங்களுக்குத் தெரிவானவர்களுக்கும் தலைமைத்துவப் பயிற்சி வழங்கப்படவுள்ளதாக உயர்கல்வி அமைச்சு தெரிவித்துள்ளது.

பல்கலைக்கழகங்களுக்குத் தெரிவான மாணவர்களுக்கு வழங்கப்பட்ட தலைமைத்துவ பயிற்சி வெற்றியளித்திருப்ப தால் ஏனைய உயர் கல்வி நிறுவனங் களுக்கும் தலைமைத்துவ பயிற்சி விஸ்தரிக்கப்படவுள்ளது என உயர் கல்வி அமைச்சின் மேலதிக செயலாளர் பி. ஜி. ஜெயசிங்க தெரிவித்தார்.

ஏனைய உயர்கல்வி நிலையங்களுக்குத் தெரிவு செய்யும் மாணவர்களுக்கும் தலைமைத்துவப் பயிற்சி வழங்கப்பட வேண்டுமென பெற்றோர் பலரிடமிருந்து கோரிக்கை அதிகரித்திருப்பதாகவும் அவர் தெரிவித்தார். இது தொடர்பில் மேலும் கருத்துத் தெரிவித்ததாவது, உயர்கல்வி அமைச்சின் கீழுள்ள தொழில்நுட்பக் கல்லூரி உள்ளிட்ட ஏனைய உயர்கல்வி நிறுவனங்களுக்கும் தெரிவானவர்களுக்கு உயர்கல்வி அமைச்சர் தலைமைத்துவ பயிற்சி நெறியை அறிமுகப்படுத்தி வைக்கவுள்ளார்.

இலங்கையில் நாடளாவிய ரீதியில் 16 உயர்கல்வி நிறுவனங்கள் காணப்படுகின்றன. இவர்களுக்கு வருடாந்தம் மூவாயிரத்து ஐநூறு பேர் தெரிவாகின்றனர். அடுத்த வருடத்திலிருந்து உயர் கல்வி நிறுவனங்களுக்கு தெரிவானவர்களின் எண்ணிக்கை நான்காயிரத்து ஐநூறு முதல்ஐயாயிரம் ஆக அதிகரிக்கப்படவுள்ளது. இவ்வாறு தெரிவு செய்யப்படுவோருக்கு, பல்கலைக்கழக மாணவர்களுக்கு வழங்கப்பட்டதைப் போன்ற தலைமைத்துவப் பயிற்சி வழங்கப்படும் என உயர் கல்வி அமைச்சின் மேலதிக செயலாளர் பி. ஜி. ஜெசிங்க மேலும் தெரிவித்தார்.