கடனை கேட்டால் மிரட்டுகின்றனர் டி. ராஜேந்தர், சிம்பு மீது பொலிஸில் புகார்

கடனை கேட்டால் மிரட்டுகின்றனர்
டி. ராஜேந்தர், சிம்பு மீது பொலிஸில் புகார்
நடிகர் டி. ராஜேந்தர் மற்றும் அவரது மகன் நடிகர் சிலம்பரசன் ஆகியோர் தர வேண்டிய பணத்தை திரும்ப கேட்டால் மிரட்டல் விடுக்கின்றனர் என்று திருச்சியைச் சேர்ந்த திரைப்பட விநியோகஸ்தர் புகார் அளித்துள்ளார்.

இது குறித்து திருச்சியைச் சேர்ந்த ராமமூர்த்தி என்பவர், சென்னை பொலிஸ் ஆணையாளர் அலுவலகத்தில் நேற்று முன்தினம் ஒரு புகார் அளித்தார். அதில், கூறியிருப்பதாவது

திரைப்பட விநியோகஸ்தர் மற்றும் திரைத்துறையினருக்கு கடனுக்கு பணம் கொடுத்து வருகிறேன். கடந்த 1998 – 99 ஆம் ஆண்டு டி. ராஜேந்தருக்கு குறைந்தபட்ச உறுதி என்கிற ஒப்பந்த அடிப்படையில் அவரது மோனிசா என் மோனாலிசா என்ற படத்திற்கு ரூ. 59 இலட்சம் பணம் கொடுத்தேன். அப்படத்தின் திரையரங்கு வசூல் மூலம் ரூ. 25 இலட்சம் மட்டுமே கிடைத்தது. திரையரங்க உரிமையாளர்களின் வற்புறுத்தலால் மேலும் ரூ. 3 இலட்சம் கொடுத்தார்.

மீதிப் பணமான ரூ. 31 இலட்சம் பணமும் எனக்கு சேர வேண்டிய 15 சதவீத தொகையையும் கொடுக்கவில்லை. இது தொடர்பான வழக்கு சென்னை உயர் நீதிமன்றத்தில் நிலுவையில் உள்ளது. இந்நிலையில் பணத்தை திரும்ப தருவதாக டி. ராஜேந்தர் உறுதி அளித்தார். டி. ராஜேந்தர் வீட்டிற்கு சென்று பார்த்தபோது அவரது மகன் சிலம்பரசன் என்கிற சிம்பு என்னை மிரட்டினார். டி. ராஜேந்தர் என்னை காலி செய்து விடுவதாக எச்சரித்தார். இந்நிலையில் கடந்த 3 ஆம் திகதி டி. ராஜேந்தர் வீட்டிற்கு சென்று அவரையும், சிலம்பரசனையும் பார்த்தேன். இருவரும் என்னை மிரட்டினர்.

சிலம்பரசன் என்னை உயிரோடு எரித்து கொலை செய்துவிடுவேன் என்று எச்சரித்தார்.

முகத்தில் அறைந்து வீட்டை விட்டு வெளியே தள்ளினார்.

பணத்தையும் தர மறுக்கின்றனர். இதனால் இவர்களால் என் உயிருக்கு ஆபத்து உள்ளது. சமரசம் பேச வீட்டிற்கு அழைத்து டி. ராஜேந்தரும், சிலம்பரசனும் என்னை மிரட்டினார்கள். எனவே, இருவர் மீதும் உரிய நடவடிக்கை எடுக்க வேண்டும். இவ்வாறு புகார் மனுவில் கூறப்பட்டுள்ளது.

ஒரே புகார் தான் இந்த ஆட்சியில்