பொய்யான குற்றச்சாட்டுக்களை எம்மீது சர்வதேச சமூகம் சுமத்தி வருகின்றது: கோத்தபாய _

இலங்கைக்கு எதிரான பொய்யான குற்றச்சாட்டுக்களை சர்வதேசம் சுமத்தி வரும் சூழ்நிலையில் புலி பயங்கரவாதிகளின் கொடூரத்தை எடுத்தியம்பும் விதத்தில் தயாரிக்கப்பட்ட "காமினி' திரைப்படம் பாராட்டுக்குரியதாகும் என பாதுகாப்பு செயலாளர் கோத்தபாய ராஜபக்ஷ தெரிவித்தார். சிவில் பாதுகாப்பு வீரர்களின் பங்களிப்பும் யுத்த வெற்றிக்கு உதவியாக அமைந்தது என்றும் அவர் சுட்டிக்காட்டினார்.

அம்பாறை மாவட்ட ஐக்கிய மக்கள் சுதந்திர முன்னணியின் எம்.பி. ரியர் அட்மிரல் சரத் வீரசேகர புத்ததினத்தை மையமாக வைத்து இயக்கிய "காமினி' என்ற சிங்களத் திரைப்படம் நேற்று முன்தினம் வியாழக்கிழமை தேசிய திரைப்படக் கூட்டுத்தாபனத்தில் ஊடகவியலாளர்களுக்கு காண்பிக்கப்பட்டது.

இந்த நிகழ்விற்கு பாதுகாப்பு செயலாளர் கோதாபய ராஜபக்ஷவும் வருகை தந்திருந்தார். திரைப்படம் காண்பிக்கப்பட்ட பின்னர் ஊடகவியலாளர்களுக்கு கருத்து தெரிவிக்கும் போதே பாதுகாப்பு செயலாளர் இதனைத் தெரிவித்தார்.

அவர் தொடர்ந்து கருத்து தெரிவிக்கையில் சர்வதேச சமூகம் எம்மீது பொய்யான குற்றசாட்டுக்களை சுமத்தி வருகிறது. சனல் 4 போன்ற தொலைக்காட்சிகள் எது விதமான ஆதாரமும் இல்லாத பொய்யான நிகழ்ச்சிகளை ஒளிபரப்பி எமக்கு சேறு பூசுகின்றது.

இவ்வாறானதோர் சூழ்நிலையில் பலி பயங்கரவாதிகள் சிங்கள மக்களை மக்களை வெட்டிக் கொலை செய்து, சொந்த ஊர்களை விட்டு விரட்டிய தகவல்கள் அடங்கிய இத்திரைப்படம் தயாரிக்கப்பட்டமை பாராட்டுக்குரியது.

பயங்கரவாதிகள் இலங்கை மக்களை மட்டுமல்ல தமிழ் மக்களையும் துன்புறுத்தினார்கள் என்பது சித்தரிக்கப்பட்டுள்ளதோடு எமது படையினர் தமிழ் மக்களையும் பாதுகாத்தமையும் வெளிப்படுத்தப்பட்டுள்ளது.

2005 ஆம் ஆண்டு நான் பாதுகாப்புச் செயலாளராக பதவியேற்ற பின்னர் இவ்வாறான திரைப்பமொன்று தயாரிக்கப்படவேண்டுமென தெரிவித்திருந்தேன். கடற்படையில் தான் பெற்ற அனுபவம் மற்றும் தான் சார்ந்த பிரதேசத்தில் நடைபெற்ற உண்மைச் சம்பவத்தை திரைப்பட மாக்கியுள்ளார். ரியர் அட்மிரல் சரத் வீரசேகர சர்வதேசத்திற்கு இத்திரைப்படம் சிறந்த பதிலடியாகும். சிவில் பாதுகாப்பு படையினரும் யுத்திற்கு பங்களிப்பு செய்தனர். அவர்களுக்கு கடற்படையினரே மேலதிக பயிற்சிகளை வழங்கி அப்பதவிக்கு கௌரவத்தை வழங்கினர் என்றார்.

இங்கு கருத்து தெரிவித்த தகவல் ஊடகத்துறை அமைச்சர் கெஹலிய ரம்புக்வெல்ல இத்திரைப்படம் மூலம் சமூதயத்திற்குள் ஒரு மாற்றம் உருவாகும். முப்படைகளைப்போன்று சிவில் பாதுகாப்பு படையினரும் இன்று சம அந்தஸ்தை பெற்றுள்ளனர். யுத்தகாலத்தில் கிராமங்களை பாதுகாப்பதில் அவர்களின் பங்களிப்பு அளப்பரியதாகும் என்றார். அம்பாறை மாவட்டத்தில் கோணகல கிராமத்தில் 1999 ஆம் ஆண்டு இடம்பெற்ற பொதுமக்கள் மீதான புலிகள் நடத்திய தாக்குதலை மையமாக வைத்தே இத்திரைப்படம் தயாரிக்கப்பட்டுள்ளது.

எதிர்வரும் 19 ஆம் திகதி ஈ.ஏ.பி.குரூப் திரையரங்குகளில் இத்திரைப்படம் திரையிடப்படவுள்ளது. _