தமிழகம், புதுச்சேரி உட்பட 6 மாநிலங்களில் 18ம் தேதி காலவரையற்ற லாரி ஸ்டிரைக்

சென்னை: அகில இந்திய மோட்டார் டிரான்ஸ்போர்ட் காங்கிரஸ் தலைவர் ஜி.ஆர்.சண்முகப்பா சென்னையில் நேற்று அளித்த பேட்டி:
தேசிய நெடுஞ்சாலைகளில் 1997 ஒப்பந்தப்படி சுங்க கட்டணமாக (1 கிலோ மீட்டருக்கு) காருக்கு 40 காசு, இலகு ரக வாகனங்களுக்கு 70 பைசா, லாரி, பஸ் போன்ற வாகனங்களுக்கு ரூ.1.20 பைசா வசூலிக்கப்பட்டு வந்தது. இதை மத்திய அரசு கடந்த 2008ம் ஆண்டு உயர்த்தியது.
பொதுவாக சாலைகளை 5 ஆண்டுகளுக்கு தான் ஒப்பந்ததாரர்கள் பயன்படுத்தி கொள்ளலாம். ஆனால், மத்திய அரசு 26 ஆண்டுகள் வரை ஒப்பந்ததாரர்களுக்கு தாரை வார்த்துள்ளது. இதனால், தனியார் ஒப்பந்ததாரர்கள் சுங்க கட்டணத்தை அவர்கள் இஷ்டத்துக்கு ஏற்ற வாய்ப்புள்ளது. எனவே, 6 வழிச்சாலைக்கான சுங்கவரியை வேலை துவங்குவதற்கு முன்பே வசூலிக்கப்படுவதை நிறுத்த வேண்டும்.
இது சம்பந்தமாக கடந்த டிசம்பர் 4ம் தேதி மத்திய அரசுடன் நடந்த பேச்சு வார்த்தையின் போது, சில கோரிக்கைகள் கையெழுத்திடப்பட்டன. ஆனால், இன்று வரை இந்த கோரிக்கைகள் நிறைவேற்றப்படவில்லை. இதை உடனடியாக நிறைவேற்ற வேண்டும். மேலும், மூன்றாம் நபர் காப்பீட்டு பிரிமீயம் 68 சதவீதமாக உயர்த்தப்பட்டுள்ளதை குறைக்க வேண்டும். டீசல் மீதான வரி மாநிலத்திற்கு மாநிலத்திற்கு வேறுபாடு உள்ளது. இதை ஒழுங்குபடுத்த வேண்டும். டயர் மீது விதிக்கப்பட்டுள்ள 40 சதவீத வரியை திரும்ப பெற வேண்டும் உள்ளிட்ட 5 அம்ச கோரிக்கைகளை வலியுறுத்தி வருகிற 18ம் தேதி நள்ளிரவு முதல் தென் இந்திய அளவில் காலவரையற்ற லாரிகள் வேலை நிறுத்த போராட்டத்தை தொடங்க உள்ளோம்.
அன்றைய தினம் மொத்தம் 26 லட்சம் லாரிகள் இந்த வேலை நிறுத்த போராட்டத்தில் ஈடுபட உள்ளன. லாரிகள் வேலை நிறுத்தத்தால் ஒரு நாளைக்கு ரூ.2500 கோடி வரை வரி இழப்பு ஏற்படும் என்றார்.

இது உண்மைதான் .சென்னையில் இருந்து ராமேஷ்வரம்வரைப் போனால் கிட்டதட்ட 500ரூபாய் சாலை சுஙக வரியாக வசூலிக்கிறர்கள் .அதுக்கு கார்ல போகாம பஸ்லயோ அல்லது டரைன்லயோ இதே பணத்துல போய்விடலாம் .இதுக்கு முத்ல் இடத்திலேயே தொடர் பயணத்திற்கு ஒரு கட்டனம் வாங்கிவிட்டு கடைசி வரை அதே சீட்டிலேயே செல்ல அனுமதிக்க வேண்டும் .இடையில் வருபவர்களுக்கு மட்டும் அந்தந்த சாவடிகளில் வசூலிக்கலாம்