ஆஸி. இலங்கை ஒருநாள் தொடர்: மாலிங்க, தரங்க, சாமர பங்கேற்பு

-அவுஸ்திரேலியாவுக்கு எதிரான ஒருநாள் தொடரில் பங்கேற்க உள்ள இலங்கை அணியில், வேகப்பந்துவீச்சாளர் லசித் மாலிங்க, ஆரம்ப துடுப்பாட்ட வீரர் உபுல் தரங்க உள்ளிட்டோருக்கு வாய்ப்பு அளிக்கப்பட்டுள்ளது.

இலங்கை சென்றுள்ள அவுஸ்திரேலிய அணி, ஐந்து போட்டிகள் கொண்ட ஒருநாள் கிரிக்கெட் தொடரில் பங்கேற்கிறது. முதல் போட்டி, பள்ளேகல மைதானத்தில் இன்று நடக்கிறது. ஒருநாள் தொடருக்கான 16 பேர் கொண்ட அணியை, இலங்கை கிரிக்கெட் சபை நேற்று அறிவித்தது.

இதில் சமீபத்தில் முடிந்த இரண்டு போட்டிகள் கொண்ட இருபது-20 தொடரில் பங்கேற்காத, வேகப்பந்துவீச்சாளர் லசித் மாலிங்க, ஆரம்ப துடுப்பாட்ட வீரர் உபுல் தரங்க, இடைநிலை துடுப்பாட்ட வீரர் சாமர சில்வா உள்ளிட்டோருக்கு வாய்ப்பு அளிக்கப்பட்டுள்ளது.

இளம் வேகப்பந்துவீச்சாளர் ஷமிந்தா எரங்கா, புதுமுக வீரராக தேர்வு செய்யப்பட்டுள்ளார். இருபது-20 தொடரில் சுழற்பந்துவீச்சாளர்களின் ஆதிக்கம் மேலோங்கி இருந்ததால், ஒருநாள் தொடருக்கு ஐந்து சுழற்பந்துவீச்சாளர்கள் தேர்வு செய்யப்பட்டுள்ளனர்.

16 பேர் கொண்ட இலங்கை அணி: தில்ஷன் (தலைவர்), மெத்யூஸ் (துணை தலைவர்), சங்க்கார, மஹெல ஜயவர்தன, உபுல் தரங்க, சாமர சில்வா, லசித் மாலிங்க, தினேஷ் சாண்டிமல், ஜீவன் மெண்டிஸ், அஜந்த மெண்டிஸ், சுரங்கா லக்மால், சுராஜ் ரந்திவ், ரங்கன ஹேரத், திசர பெரேரா, நுவான் குலசேகர, ஷமிந்தா எரங்கா.

இலங்கை மற்றும் அவுஸ்திரேலிய அணிகள், இதுவரை 72 முறை ஒருநாள் போட்டியில் மோதியுள்ளன. இதில் அவுஸ்திரேலியா 47, இலங்கை 22 போட்டிகளில் வெற்றி பெற்றன. மூன்று போட்டிகளுக்கு முடிவு இல்லை. ஒருநாள் தொடரில் பங்கேற்க, அவுஸ்திரேலிய அணி நான்காவது முறையாக இலங்கை சுற்றுப்பயணம் செய்துள்ளது. முன்னதாக மோதிய மூன்று தொடர்களில் இலங்கை 2 (1983, 1992), அவுஸ்திரேலியா ஒரு முறை (2004) தொடரை கைப்பற்றின.

இன்றைக்கு ஆரம்ப வீரர்கள் சொதப்பி்ட்டாங்க