சி. பி. ஐ. முன்பாக ஆஜராகுமாறு தயாநிதிமாறனுக்கு விரைவில் உத்தரவு

சி. பி. ஐ. முன்பாக ஆஜராகுமாறு
தயாநிதிமாறனுக்கு விரைவில் உத்தரவு




டில்லி

முன்னாள் தொலைத் தொடர்புத்துறை அமைச்சர் தயாநிதி மாறநின் நெருக்கடியால் தான் எனது
ஏர்செல் நிறுவன பங்குகளை மிகக் குறைந்த விலைக்கு மலேசியாவின் மேக்சிஸ்
நிறுவனத்துக்கு விற்றேன் என்று ஏர்செல் நிறுவனத்தின் முன்னாள் அதிபர் சிவசங்கரன்
சிபிஐயிடம் வாக்குமூலம் அளித்துள்ளார்.
ஏர்செல் நிறுவனத்துக்கு கூடுதல் ஸ்பெக்ட்ரம் கேட்டு, விண்ணப்பித்தபோது அதைத் தராமல்
காலதாமதம் செய்த தயாநிதி மாறன், பின்னர் நிறுவனத்தை மேக்ஸிஸ் நிறுவனத்துக்கு விற்ற
பின்னர் அதற்கு 14 மண்டலங்களில் உரிமம் ஒதுக்கித் தந்தார் என்றும் சிவசங்கரன்
கூறியுள்ளார்.
இது குறித்து சிபிஐ விசாரணை நடத்தி வருகிறது. இந்த விசாரணையில், மேக்சிஸ் நிறுவனம்
சன் தொலைக்காட்சியின் டிடிஎச் சேவையில் பல நூறு கோடி முதலீடு செய்திருப்பது தெரிய
வந்தது. இந் நிலையில், இந்த விவகாரத்தில் தங்களுடன் ஒத்துழைக்குமாறு மேக்ஸிஸ்
நிறுவனத்திடம் கோர சிபிஐ முடிவு செய்துள்ளது. இது தொடர்பாக மேக்ஸிஸ் நிறுவனத்துக்கு
சிபிஐ விரைவில் கடிதம் அனுப்பவுள்ளது.
இதை ஏற்று மேக்ஸிஸ் ஒத்துழைப்பு தராவிட்டால், அந்த நிறுவனம் மீதும் சிபிஐ வழக்குப்
பதிவு செய்யலாம் என்று தெரிகிறது. இது தொடர்பாக தயாநிதி மாறனிடம் சிபிஐ
விசாரிக்கவுள்ளது.
முதல் கட்டமாக சிவசங்கரன் கூறிய புகார்களுக்கு தயாநிதி மாறனிடம் சிபிஐ விளக்கம்
கேட்க முடிவு செய்துள்ளது.
இந்நிலையில் 2 ஜி ஊழலில் கைது செய்யப்பட்டுள்ள யுனிடெக் வயர்லெஸ் நிர்வாக இயக்குனர்
சஞ்சய் சந்திரா மற்றும் ஸவான் டெலிகாம் இயக்குநர் வினோத் கோயங்கா ஆகியோர் தாக்கல்
செய்த பிணை மனுக்கள் குறித்து பதிலளிக்குமாறு சிபிஐக்கு உச்ச நீதிமன்றம் நோட்டீஸ்
அனுப்பியுள்ளது. தான் கடந்த 108 நாட்களாக சிறையில் உள்ளதாகவும், இந்த வழக்கில்
தனக்கு எதிரான விசாரணை முடிந்துவிட்டதாக சிபிஐ தெரிவித்துள்ளதாகவும் சந்திரா தனது
உச்ச நீதிமன்றத்தில் தாக்கல் செய்த மனுவில் குறிப்பிட்டுள்ளார்.

நன்றி பகிர்வுக்கு