பிரித்தானியவில் கலவரத்தின் போது ஆடைகளை கொள்ளையர்களிடம் பறிகொடுத்து நிர்வாணமாகச் சென்ற பாதசாரிகள் _

பிரித்தானியக் கலவரத்தின் போது வீதியால் சென்றவர்கள் கொள்ளையர்களால் ஆடைகளைக் களைய நிர்ப்பந்திக்கப்பட்டு நிர்வாணமாகச் செல்லவேண்டிய நிலை க்கு உள்ளான அதிர்ச்சியூட்டும் சம்பவங்களும் இடம்பெற்றுள்ளன.

நபரொருவரை ஆடைகளைக் களையுமாறு கலகக்காரர் ஒருவர் நிர்ப்பந்திக்கும் சம்பவத்தை வெளிப்படுத்தும் "சிசிரிவி' வீடியோக் காட்சி "ருவிட்டர்' இணையத்தளத்தில் வெளியிடப்பட்டதை அடுத்து பெரும் பரபரப்பு ஏற்பட்டுள்ளது.

இவ்வாறு வீதியில் சென்றவர்கள் ஆடைகளைக் கொள்ளையர்களிடம் பறிகொடுத்து நிர்வாணமாக வெளியேறிய சம்பவங்கள் பெர்மிங்ஹாம் மற்றும் டிப்போர்ட் நகர்களில் இடம்பெற்றுள்ளன.

அதேசமயம், ஹக்னி நகரில் கலகக்காரர்களிடமிருந்து பெய்ஸ்ரி போலின் பியர்ஸ் (வயது 45) என்ற மாது தனது கடையை பாதுகாக்கப் போராடும் காட்சியும் இணையத்தளத்தில் வெளியாகியுள்ளது.

மார்பகப் புற்றுநோயில் இருந்து குணமாகி பெரும் சிரமத்தின் மத்தியில் தனது தொழிலை நடத்திவரும் பெஸ்ரி போலின் பியர்ஸ், கலகக்காரர்களுடன் துணிந்து வாதிட்டு அவர்களது மனதை மாற்றி தனது கடையைப் பாதுகாத்துள்ளார்.

இந்நிலையில், மேற்படி "சிசிரிவி' கண்காணிப்பு வீடியோக் கருவிகளில் பதிவாகியுள்ள காட்சிகளை வைத்து வன்முறைகளில் ஈடுபட்டவர்களை அடையாளங் கண்டு கைதுசெய்து நீதியின் முன் நிறுத்தும் முயற்சியில் பிரித்தானிய பொலிஸார் ஈடுபட்டுள்ளனர். அதேசமயம், தென் லண்டனிலுள்ள குரோய்டன் பிரதேசத்தில் 26 வயது இளைஞர் ஒரு வர் காரொன்றில் துப்பாக்கியால் சுடப்பட்ட நிலையில் சடலமாக மீட்கப்பட்டுள்ளார்.

வன்முறைகளில் ஈடுபட்ட குற்றச்சாட்டில் கென்ட் நகரில் 18 வயது இளைஞர்கள் இருவரும், வேக்பீல்ட்டில் 19 வயது யுவதியொருவரும், கிளாஸ் கோவில் 16 வயதுச் சிறுவன் ஒருவனும் 18 வயது இளைஞன் ஒருவனும் கைதுசெய்யப்பட்டுள்ளனர். லண்டனில் பாதுகாப்பை உறுதிப்படுத்தி, சட்டம் ஒழுங்கை நிலைநாட்டும் வகையில் வழமையான பொலிஸ் உத்தியோகத்தர்களை விட 5 மடங்கு உத்தியோகத்தர்கள் நியமிக்கப்பட்டுள்ளனர். கலவரத்தால் பாதிக்கப்பட்டவர்களுக்கு உடனடி உதவியை வழங்குமாறு தொழிற் கட்சி யின் தலைவர் எட்மிலிபான்ட் அழைப்புவிடுத்துள்ளார்.