கர்நாடக அமைச்சரவை மீண்டும் விரிவாக்கம் 5 புதிய அமைச்சர்கள் பதவி ஏற்பு

by **நண்பன்** Sat 13 Aug 2011 - 10:32

கர்நாடக அமைச்சரவை மீண்டும் விரிவாக்கம்
5 புதிய அமைச்சர்கள் பதவி ஏற்பு

கர்நாடக அமைச்சரவை நேற்று முன்தினம் 2வது தடவையாக விஸ்தரிப்பு செய்தபோது 5 புதிய
அமைச்சர்கள் பதவி ஏற்றனர். அவர்களுக்கு கவர்னர் பதவிப் பிரமாணம் செய்து வைத்தார்.
லோக் அயுக்தாவின் சுரங்க முறைகேடு அறிக்கையில் குற்றம் சாட்டப்பட்டதை அடுத்து
எடியூரப்பா தனது முதலமைச்சர் பதவியை ராஜினாமா செய்தார். அதை தொடர்ந்து சதானந்த கவுடா
கடந்த 4 ஆம் திகதி புதிய முதலமைச்சராக பதவி ஏற்றார். எடியூரப்பா அணி அந்தகுமார் அணி
என்று 2 அணிகள் உருவானதால் மந்திரி பதவிகளை பகிர்ந்து கொள்வதில் நீண்ட இழுபறி
ஏற்பட்டது.
இதைத் தொடர்ந்து கடந்த 8 ஆம் திகதி ராஜ்பவனில் நடந்த விழாவில் 21 புதிய மந்திரிகள்
பதவி ஏற்றனர். இவர்கள் அனைவருமே எடியூரப்பா அரசில் இருந்தவர்கள். அவர்களுக்கு முன்பு
வகித்த துறையே ஒதுக்கப்பட்டது.
இந்த நிலையில் அமைச்சரவையை மீண்டும் விரிவுபடுத்துவது குறித்து முதலமைச்சர் சதானந்த
கவுடா டில்லிக்கு சென்று மேலிட தலைவர்களுடன் தீவிரமாக ஆலோசனை நடத்தினார்.
யார் யாரை அமைச்சரவையில் சேர்ப்பது என்பது குறித்து பட்டியல் ஒன்றையும் அவர்
எடுத்துச் சென்றார். அவருடன் கட்சியின் மாநில தலைவர் ஈசுவரப்பா, எடியூரப்பாவின்
ஆதரவாளரான அமைச்சர் ஆச்சார்யா ஆகியோரும் சென்றிருந்தனர். சுமார் 2 நாட்கள் நடைபெற்ற
தீவிர ஆலோசனைக்கு பின் 2வது கட்டமாக 5 பேரை மந்திரி சபையில் சேர்ப்பது என்று முடிவு
எடுக்கப்பட்டது.
இந்த நிலையில் மேலும் 5 பேருக்கு அமைச்சர் பதவிப் பிரமாணம் செய்து வைக்குமாறு
முதலமைச்சர் சதானந்த கவுடா கவர்னரை கேட்டுக் கொண்டார். அதை ஏற்று நேற்று முன்தினம்
மாலை ராஜ்பவனில் உள்ள கண்ணாடி மாளிகையில் புதிய அமைச்சர்கள் பதவி ஏற்பு விழா நடந்தது.
இதில் சுயேச்சை எம். எல். ஏ. வர்த்தூர் பிரகாஷ் (கோலார் தொகுதி) சி. பி. யோகேஷ்வர்
(சென்னபட்னா), ராஜூ கவுடா (சுரபுர), பாலச்சந்திர ஜார்கிஹோளி (அரபாவி), ஆனந்த்
அஸ்னோடிகர் (கார்வார்) ஆகிய 5 பேர் புதிய அமைச்சர்களாக பதவி ஏற்றனர். அவர்களுக்கு
ஆளுநர் பரத்வாஜ் பதவிப் பிரமாணமும் ரகசிய காப்பு பிரமாணமும் செய்து வைத்தார். இதைத்
தொடர்ந்து கர்நாடக அமைச்சரவையின் எண்ணிக்கை 26 ஆக உயர்ந்துள்ளது.
நேற்று முன்தினம் பதவி ஏற்றவர்களில் வர்த்தூர் பிரகாஷ் உட்பட 3 பேர் அமைச்சரவைக்கு
புதியவர்கள். மற்ற பாலச்சந்திர ஜார்கிஹோளி, ஆனந்த் அஸ்னோடிகர் ஆகிய 2 பேரும்
எடியூரப்பா அரசில் அமைச்சர்களாக இருந்து இடையில் நீக்கப்பட்டவர்கள்.