அம்பாறை மாவட்டத்தில் பல இடங்களில் ஒரே இரவில் மர்ம மனிதர்கள் ஊடுருவல் _

by **முனாஸ் சுலைமான்** Sat 13 Aug 2011 - 21:22

அம்பாறை மாவட்டத்தில் தமிழ், முஸ்லிம் மக்கள் செறிந்து வாழும் ஆறுக்கு மேற்பட்ட இடங்களில் ஒரே இரவில் பல்வேறு கோணங்களில் கிறீஸ் மனிதர்கள் (மர்ம மனிதர்கள்) ஊடுருவியமையினால் மக்கள் மத்தியில் பீதியும் பதற்றமும் ஏற்பட்டுள்ளது. நேற்று முன்தினம் வியாழக்கிழமை இரவு 7 மணி முதல் 11 மணிக்கு இடைப்பட்ட நேரத்திற்குள் சம்மாந்துறை, காரைதீவு, கல்முனை, மருதமுனை, பெரிய நீலாவணை, பொத்துவில் உள்ளிட்ட இடங்களில் கிறீஸ் மனிதன் ஊடுருவியதாக செய்தி பரவியமையை அடுத்தே மேற்படி நிலைமை தோன்றியுள்ளது.

காரைதீவு விஷேட அதிரடிப்படை முகாம் இருந்த வளவுக்குப் பின்னால் உள்ள வயல் பிரதேசத்தில் மர்ம மனிதன் ஒருவன் பதுங்கி இருந்தமையினைக் கண்டு ஊரவர்கள் கூச்சலிட அவன் அவ்விடத்தை விட்டு ஓடியுள்ளான். இப்பகுதியில் மர்ம மனிதன் இருக்கலாம் என்ற சந்தேகத்தில் ஊரவர்கள் ஆயிரக்கணக்கில் திரண்டு தேடுதல் நடத்தியதுடன் இவ்விடயம் அயல் கிராமங்களான நிந்தவூர், மாளிகைக்காடு ஆகிய முஸ்லிம் கிராமங்களுக்கும் பரவ அங்கிருந்தும் மக்கள் பலர் ஒதுங்கியமையினை அவதானிக்க முடிந்தது.

சம்மாந்துறை கோறக்கல் பிரதேசத்தைச் சேர்ந்த தமிழ் பெண் ஒருவரைத் தாக்க முற்பட்ட மர்ம மனிதனை பெண்ணின் கூக்குரலைக் கேட்ட குழுவினர் விரட்டி வந்தபோது சம்மாந்துறை பொலிஸ் நிலைய வளவுக்குள் புகுந்ததாக தெரிவிக்கப்பட்ட செய்தியை அடுத்து சம்மாந்துறையில் பெரும் பரபரப்பு ஏற்பட்டது.

இச்சம்பவத்தைக் கேள்வியுற்ற பொதுமக்கள் ஆயிரக்கணக்கில் திரண்டு பொலிஸ் நிலையத்தை முற்றுகை இட்டதுடன் ஏற்பட்ட நிலைமையினை கட்டுப்பாட்டிற்குள் கொண்டு வருவதற்காக பொலிஸார் கண்ணீர் புகைக்குண்டு தாக்குதலை மேற்கொண்டதால் இதற்கெதிராக டயர்களை எரித்து மக்கள் தமது எதிர்ப்புக்களை வெளிப்படுத்தினர்.

கல்முனை அல்பஹ்றியா மகா வித்தியாலய எல்லைக்குள் இரண்டு மர்ம மனிதர்களைக் கண்டதாக வெளியான செய்தியை அடுத்து பாடசாலைச் சுற்றி மக்கள் பல்லாயிரக்கணக்கில் சூழ்ந்தும் மர்ம மனிதன் தப்பிவிட்டதாகத் தெரிவிக்கப்படுகின்றது. இதனால் கல்முனை, கல்முனைக்குடி, சாய்ந்தமருது பிரதேசங்களில் மக்கள் பதட்டமடைந்ததுடன் கூர்மையான ஆயுதங்களுடன் வீதிகளில் நடமாடியமையினையும் காண முடிந்தது.

மருதமுனை பெரிய நீலாவணை எரிபொருள் நிரப்பு நிலையத்திற்கு முன்னால் உள்ள வீதியில் மோட்டார் சைக்கிளில் கறுப்பு நிற ரீசேட் அணிந்த இரு மர்ம மனிதனை மக்கள் விரட்டிய சம்பவத்தினால் பிரதேசம் முழுவதும் பீதியில் மூழ்கியதுடன் பொல்லுகள் மற்றும் கூரிய ஆயுதங்களுடன் மோட்டார் சைக்கிளில் இளைஞர் குழுவினர் தேடுதலில் ஈடுபட்ட போதிலும் எவரும் பிடிபடவில்லை.

அயல் கிராமங்களில் மர்ம மனிதனின் ஊடுருவல் அதிகரித்துள்ள செய்தியையடுத்து துறைநீலாவணையில் ஒலிபெருக்கிகள் மூலம் மக்களைக் கவனமாக இருக்குமாறு அறிவித்தல் விடுக்கப்பட்டதுடன் இளைஞர்களின் ரோந்து நடவடிக்கையும் இடம்பெற்றது.

பொத்துவில் கிதாயா புரத்தில் இடம்பெற்ற மர்ம மனிதனின் தாக்குதலுக்குள்ளான ஒரு பிள்ளையின் தாயார் கல்முனை வைத்தியசாலையில் அனுமதிக்கப்பட்டுள்ளார். இச்சம்பவத்தை அடுத்து அங்கும் பல்வேறு எதிர்ப்பு நடவடிக்கைகள் நடைபெற்றன.

கிறீஸ் மனிதனின் ஊடுருவல் குறித்து கிராமங்கள் தோறும் செய்திகள் பரவியமையினால் மக்களின் இயல்பு நிலை பாதிக்கப்பட்டுள்ளது. முஸ்லிம்களின் ரமழான் மாதமாக இது இருப்பதனால் இரவு நேரத் தொழுகைக்காக பள்ளிவாசல்களுக்குச் செல்லும் பெண்களின் எண்ணிக்கை குறைவடைந்து வருகின்றது.

கிறீஸ் மனிதன் என உச்சரிக்கப்படுகின்ற போதிலும் பெண்களாலும் ஏனையோராலும் அடையாளம் காணப்பட்ட மர்ம மனிதர்களில் பெருமளவிலானோர் கிறீஸ் இல்லாமலேயே காணப்பட்டதாகவும் தெரிவிக்கப்படுகிறது. இவ் விடயத்தைப் பயன்படுத்தி சில ஆசாமிகள் வதந்திகளைப் பரப்பி வருவதாகவும் தெரிவிக்கப்படுகின்றது. மேற்படி சம்பவங்கள் சிலவற்றில் உண்மைத்தன்மை குறைவாக உள்ளதாகவும் நம்பப்படுகின்றது.

அரசியல் இலாபத்தினை அடைந்து கொள்ளும் நோக்கிலான திட்டமிடப்பட்ட செயற்பாடே இதுவெனவும் மக்கள் சந்தேகிக்கின்றனர். எது எவ்வாறிருந்தும் இவ்விடயம் குறித்து இப்பிரதேசங்களை பிரதிநிதித்துவப்படுத்தும் அரசியல் தலைமைகள் குறித்தும் விமர்சனங்கள் தெரிவிக்கப்படுகின்றன. கிறீஸ் மனிதனின் பெயரால் வதந்திகளைப் பரப்புபவர்கள் மீது அவதானமாக இருக்குமாறு மத அமைப்புக்கள் வேண்டுகோள் விடுத்துள்ளன. _