கோட்டையில் சுதந்திரதின விழா: ஜெயலலிதா நாளை கொடி ஏற்றுகிறார்; வீரச்செயல் புரிந்தவர்களுக்கு விருது வழங

சென்னை, ஆக. 14-


நாட்டின்
65-வது சுதந்திர தினவிழா நாளை (15-ந்தேதி) கொண்டாடப்படுகிறது. இதையொட்டி
டெல்லி செங்கோட்டையில் பிரதமர் மன்மோகன் சிங் தேசிய கொடியேற்றி வைத்து உரை
நிகழ்த்துகிறார். சென்னை புனித ஜார்ஜ் கோட்டை கொத்தளத்தில் காலை 9.30
மணிக்கு நடைபெறும் சுதந்திர தினவிழாவில் முதல்-அமைச்சர் ஜெயலலிதா தேசிய
கொடி ஏற்றி வைக்கிறார்.

இதற்காக கொத்தளத்தின் முன்
உள்ள அணிவகுப்பு மரியாதை மேடைக்கு வரும் ஜெயலலிதாவை தலைமைச் செயலாளர்
தேபேந்திரநாத் சாரங்கி வரவேற்று முப்படை தளபதிகள் போலீஸ் உயர் அதிகாரிகளை
அறிமுகம் செய்து வைக்கிறார். சரியாக காலை 9.30 மணிக்கு கொடியேற்றி வைத்து
உரை நிகழ்த்துகிறார். விழாவில் துணிவு மற்றும் வீரசாகசச் செயலுக்கான
கல்பனா சாவ்லா விருது, மாற்றுத் திறனாளிகளின் நலனுக்காகச் சிறப்பாகத்
தொண்டாற்றியவர்களுக்கான 6 விருதுகள், மகளிர் நலனுக்காகச் சிறப்பாகத்
தொண்டாற்றிய தொண்டு நிறுவனம் மற்றும் சமூகப் பணியாளருக்கான 2 விருதுகள்
ஆகியவற்றினை வழங்குகிறார்.

பின்னர் கோட்டை
நுழைவாயில் அருகே உள்ள பந்தலில் மாற்றுத்திறனுடைய குழந்தைகளுக்கு இனிப்பு
வழங்குகிறார். சுதந்திர தின விழா நிகழ்ச்சிக்கு வருகை தரும்
அழைப்பாளர்களின் வசதிக்காக சிவப்பு மற்றும் நீலம் ஆகிய இரண்டு வண்ணங்களில்
வாகன அனுமதி அட்டைகள் வழங்கப்படும். சிவப்பு நிற வாகன அனுமதி அட்டைகள் உள்ள
வாகனங்கள் போர் நினைவுச்சின்னம் வழியாக வந்து கோட்டை கொத்தளத்தின்
முன்னால், முக்கிய அழைப்பாளர்கள் அமர இருக்கை அமைக்கப்பட்டுள்ள பகுதியில்
அழைப்பாளர்களை இறக்கியபின், வாகனத்தை உள் நுழைவு வாயில் வழியாக புனித
ஜார்ஜ் கோட்டையின் உள்ளே உள்ள வளாகத்தில் நிறுத்திக் கொள்ளலாம்.

நீல
நிற அனுமதி அட்டை பெற்ற வாகனங்கள் ரிசர்வ் வங்கி சுரங்கப்பாதை வழியாகவோ
அல்லது புனித ஜார்ஜ் கோட்டை வாயில் வழியாகவோ வந்து ராஜாஜி சாலையில்
அமைக்கப்பட்டுள்ள சிறப்பு மாடத்தை வந்தடைய வேண்டும். சிறப்பு மாடத்தின்
அருகே அழைப்பாளர் இறங்கிக் கொண்டதும் இந்த வாகனங்களை புனித ஜார்ஜ்
கோட்டைக்கு எதிரே அமைந்துள்ள வாகன நிறுத்தப் பகுதியில் நிறுத்திக் கொள்ள
வேண்டும்.

அழைப்பாளர்களின் வசதிக்காக, புனித ஜார்ஜ்
கோட்டை வளாகத்திலும் மற்றும் அதற்கு எதிரே உள்ள கார் நிறுத்தப்
பகுதியிலும் நிறுத்தப்பட்டுள்ள வாகனங்களை ஒலிபெருக்கி மூலமாக அழைத்திட ஒலி
அழைப்பு வசதி செய்யப்பட்டுள்ளது. இதன்மூலம் அனைத்து வாகனங்களின்
இயக்கத்தையும் முறைப்படுத்தி எவ்வித இடையூறும் இல்லாத வகையில் சீரான
போக்குவரத்து, போக்குவரத்துக் காவல் துறையினரால் முறைப்படுத்தப்படும் என்று
தமிழக அரசு வெளியிட்டுள்ள செய்திக்குறிப்பில் குறிப்பிடப்பட்டுள்ளது.

இவளுக்கெல்லாம் எல்லாம் நேரம்தான் ஏத்தட்டும் ஏத்தட்டும்