நம்பர்-1 இடத்தை இந்தியா இழந்தது: சிறந்த அணியிடம் தான் தோற்று இருக்கிறோம்; டோனி சொல்கிறார்

பர்மிங்காம், ஆக. 14-


இங்கிலாந்துக்கு
எதிரான 3-வது டெஸ்ட் போட்டியிலும் இந்திய அணி மோசமாக தோற்றது. இந்த தோல்வி
மூலம் இந்தியா தொடரை இழந்தது. ஏற்கனவே முதல் 2 டெஸ்டிலும் தோற்றது. மேலும்
இதன் மூலம் இந்திய அணி நம்பர்-1 இடத்தை இழந்தது.

இந்தியா
- இங்கிலாந்து அணிகள் மோதிய 3-வது டெஸ்ட் போட்டி பர்மிங்காமில் நடந்தது.
இந்தியா முதல் இன்னிங்சில் 224 ரன்னில் சுருண்டது. இங்கிலாந்து அணி முதல்
இன்னிங்சில் 710 ரன் குவித்தது. நேற்றைய 4-வது நாளில் இந்திய அணி 2-வது
இன்னிங்சில் 244 ரன்னில் ஆல்அவுட் ஆனது. இதனால் இன்னிங்ஸ் மற்றும் 242 ரன்
வித்தியாசத்தில் தோற்றது.

டோனி அதிக பட்சமாக 74 ரன்
எடுத்தார். ஆண்டர்சன் 4 விக்கெட் டும், பிராட், சுவான் தலா 2 விக்கெட்டும்
கைப்பற்றினார்கள். ஏற்கனவே லார்ட்ஸ் மைதானத்தில் நடந்த முதல் டெஸ்டில் 196
ரன்னிலும், நாடிங்காமில் நடந்த 2-வது டெஸ்டில் 319 ரன்னிலும் இந்தியா
தோற்றது.

டோனி தலைமையில் இந்திய அணி முதல் முறையாக
டெஸ்ட் தொடரை இழந்தது. 0-3 என்ற கணக்கில் தோற்றதால் 20 மாதங்களாக நம்பர்-1
இடத்தில் இருந்த இந்தியா அந்த இடத்தை இழந்தது. இங்கிலாந்து அணி நம்பர்-1
இடத்தை பிடித்தது. இந்த தோல்வி குறித்து இந்திய அணி கேப்டன் டோனி
நிருபர்களிடம் கூறியதாவது:-

எங்களது பேட்டிங்
சிறப்பாக அமையவில்லை. ஆனால் அதற்கான காரணம் தெரியவில்லை. இங்கிலாந்து
வீரர்கள் மிகவும் சிறப்பாக விளையாடினார்கள். நாங்கள் சிறந்த அணியிடம் தான்
தோற்று இருக்கிறோம். ஒவ்வொரு தொடரிலும் ஒட்டுமொத்த வீரர்களின் பங்களிப்பு
இருந்தது. இந்த தொடரில் எல்லாமே சரியாக அமையவில்லை.

இந்த
தொடர் தோல்வியால் எனது எண்ணத்தில் எந்தவிதமான மாற்றமும் ஏற் படவில்லை.
இந்திய அணி எப்போதுமே பெருமைக்கு உரிய அணி தான். எங்கள் வீரர்கள்
சிறப்பானவர்கள். அனைத்து போட்டிகளிலும் வெற்றி பெறுவது சாத்தியமில்லாதது.

நம்பர்-1
இடம் என்பது முக்கியமில்லை. தொடர்ந்து சிறப்பாக விளையாடுவது தான்
முக்கியம். நம்பர்-1 இடத்தை பிடித்த இங்கிலாந்து அணிக்கு எனது பாராட்டுகள்.
இங்கிலாந்து தொடருக்காக சிறப்பாக பயிற்சி பெற்றோம். ஆனால் தொடர் சிறப்பாக
அமையவில்லை.

இவ்வாறு டோனி கூறியுள்ளார்.

வெற்றி குறித்து இங்கிலாந்து அணி கேப்டன் ஸ்டா ரஸ் கூறியதாவது:-

கூக்கின்
பேட்டிங்கும், எங்களது பந்து வீச்சும் நன்றாக இருந்தது. இந்த வெற்றி
மிகுந்த மகிழ்ச்சி அளிக்கிறது. நம்பர்-1 இடத்தை பிடிப்பது நீண்ட நாள்
லட்சியமாக இருந்தது. தற்போது நம்பர்-1 இடத்தை பிடித்தது பெருமை அளிக்கிறது.


இவ்வாறு அவர் கூறினார்.

உப்புக்கு சப்பானி பதில் ..என்ன இருந்தாலும் வெற்றீ பெற இந்திய அணி போராடவில்லை என்பது என் கருத்து