கடவுச்சீட்டை விற்பனை செய்த சிங்களப் பெண் சிங்கப்பூரில் கைது

விசேட வெளிநாட்டு பயணக்கடவுச் சீட்டை வேறொருவருக்கு விற்ற குற்றத்துக்காக, இலங்கையைச் சேர்ந்த சிங்களப் பெண் ஒருவர் சிங்கப்பூரில் கைது செய்யப்பட்டு 6 மாதங்கள் சிறை வைக்கப்பட்டுள்ளார்.
ரேணுகா சஞ்சீவனி மத்துமகே என்ற 38 வயதுடைய சிங்களப் பெண்ணே இந்த தீர்ப்புக்கு உட்படுத்தப்பட்டுள்ளார்.

சில தினங்களுக்கு முன்னர் அவர் தமது கடவுச்சீட்டை 600 சிங்கப்பூர் டொலர்களுக்கு வேறொரு பெண்ணுக்கு விற்றதன் பின்னர், மீண்டும் கடந்த வியாழக்கிழமை அவர் தமது கடவுச்சீட்டு காணாமல் போனதாக சிங்கபூர் குடிவரவுத் திணைக்களத்தில் முறைப்பாடு செய்யச் சென்ற வேளையில் கைது செய்யப்பட்டார்.

பின்னர் நேற்று அவர் தொடர்பிலான வழக்கு இடம்பெற்ற போது, இந்த தீர்ப்பு வழங்கப்பட்டது.

எனினும் அவர் தமது கடவுச்சீட்டை விற்பனை செய்தமை எவ்வாறு தெரியவந்தது என்பது குறித்து நீதிமன்றம் தகவல் எதனையும் வெளியிடவில்லை.

இதற்கிடையில் அவரிடம் இருந்து கடவுச்சீட்டைப் பெற்றுக் கொண்ட பெண் தொடர்பிலான விசாரணை எதிர்வரும் திங்கட்கிழமை நடைபெறவுள்ளது.