எரிபொருள் நிரப்பு நிலையங்கள் பற்றுச்சீட்டு கட்டாயம் வழங்க வேண்டும்: பெற்றோலிய அமைச்சு

எரிபொருள் நிரப்பு நிலையங்களிலிருந்து பாவனையாளர்களுக்கு பற்றுச்சீட்டினை வழங்க வேண்டியது கட்டாயமாக்கப்பட்டிருப்பதாக பெற்றோலிய வளத்துறை அமைச்சு அறிவித்துள்ளது.

இது தொடர்பில் நாட்டின் சகல நிரப்பு நிலையங்களுக்கும் அறிவுறுத்தப்பட இருப்பதாக அரச தகவல் திணைக்களம் விடுத்துள்ள அறிக்கையில் குறிப்பிட்டுள்ளது.

எனினும் இத்திட்டம் எப்போதிலிருந்து அமுலுக்கு வருகின்றது என்பது தொடர்பில் அவ்வறிக்கையில் குறிப்பிடப்பட்டிருக்கவில்லை.

அதில் மேலும் கூறப்பட்டுள்ளதாவது, நாட்டிலுள்ள அனைத்து எரிபொருள் நிரப்பு நிலையங்களிலிருந்தும் பாவனையாளர்களுக்கு எரிபொருள் விநியோகிக்கப்படும் போது அதற்கான பற்றுச்சீட்டு வழங்கப்பட வேண்டியது கட்டாயமாக்கப்பட்டுள்ளது.

இதற்கான சகல ஏற்பாடுகளும் மேற்கொள்ளுமாறு பெற்றோலிய வளத்துறை அமைச்சர் சுசில் பிரேம்ஜயந்த பெற்றோலிய கூட்டுத்தாபனத்தின் தலைவர் ஹரி ஜெயவர்தனவுக்கு அறிவுறுத்தல் வழங்கியுள்ளார்.

இதன் பிரகாரம் அனைத்து நிரப்பு நிலையங்களையும் அறிவுறுத்தும் செயற்றிட்டம் பெற்றோலிய வளக் கூட்டுத்தாபனத்தின் விநியோகப் பிரிவினால் மேற்கொள்ளப்படவுள்ளது.

எரிபொருள் விநியோகிக்கப்படும் சந்தர்ப்பங்களில் பாவனையாளர்களுக்கு பற்றுச்சீட்டினை வழங்குவதன் மூலம் அவர்களது பாதுகாப்புக்கு நடவடிக்கை எடுக்கப்பட்டதாக அமைச்சர் சுசில் பிரேம்ஜயந்த தெரிவித்துள்ளார்