அன்னா ஹசாரே இன்று காலை பொலிஸாரால் கைது

தடையை மீறி உண்ணாவிரதம் இருப்பேன் என்று அறிவித்திருந்த சமூக ஆர்வலர் அன்னா ஹசாரே இன்று காலை உண்ணாவிரத இடத்திற்கு செல்வதற்கு முன்பாக டெல்லி பொலிசாரால் கைது செய்யப்பட்டார்.

அன்னா ஹசாரேவோடு சமூக ஆர்வலர்கள் அரவிந்த் கேஜரிவால், கிரண்பேடி மற்றும் மனீஷ் சிசோதியா ஆகியோரும் கைது செய்யப்பட்டனர். வலுவான லோக்பால் மசோதாவை உருவாக்கக் கோரி இன்று முதல் உண்ணாவிரதப் போராட்டம் நடத்தப் போவதாக சமூக ஆர்வலர் அன்னா ஹசாரே அறிவித்திருந்தார்.

டெல்லியில் ஜந்தர் மந்தர் அருகே அவர் உண்ணாவிரதம் இருக்க அனுமதி கோரியிருந்தார். எனினும் டெல்லி கிரிக்கெட் மைதானம் அருகே உள்ள ஜெயபிரகாஷ் நாராயண் மைதானத்தில் உண்ணாவிரதம் இருக்க டெல்லி பொலீஸ் அனுமதி அளித்தது.

மேலும் உண்ணாவிரதம் தொடர்பாக 22 நிபந்தனைகளையும் விதித்திருந்தது. இதில் 6 நிபந்தனைகளை அன்னா ஹசாரே குழு ஏற்கவில்øலை.இதனையடுத்து உண்ணாவிரதம் நடத்த டெல்லி பொலிஸ் அனுமதி மறுத்தது. மேலும் ஜெயபிரகாஷ் நாராயண் மைதானத்தை சுற்றியுள்ள பகுதியில் தடை உத்தரவும் பிறப்பிக்கப்பட்டது.

உண்ணாவிரதத்திற்கு அனுமதி மறுக்கப்பட்டது சட்டவிரோதமானது என்று கூறிய அன்னா ஹசாரே தடையை மீறி உண்ணாவிரதப் போராட்டம் நடைபெறும் என்று அறிவித்திருந்தார்.அதன்படி இன்று காலை அவர் உண்ணாவிரதப் போராட்டத்திற்காக தயாராகி கொண்டிருந்தார். கிழக்கு டெல்லியில் அவர் தங்கியிருந்த குடியிருப்பு பகுதியில் நூற்றுக்கணக்கான சமூக ஆர்வலர்கள் திரண்டிருந்தனர்.

இதனிடையே உண்ணாவிரத இடத்திற்கு அவர் செல்வதற்கு முன்பாகவே டெல்லி பொலிசார் அவரை கைது செய்தனர். கைது செய்யப்படுவதற்கு முன்பாக பொலிசார் அவரிடம் உண்ணாவிரதத்தை கைவிடுமாறு வலியுறுத்தினர். அதனை ஹசாரே ஏற்க மறுத்ததை அடுத்து அவர் கைது செய்யப்பட்டார்.

சுமார் 15 பொலிஸ் அதிகாரிகள் ஹசாரேவை சந்தித்து பேசினர். வீட்டை விட்டு வெளியே வர வேண்டாம் என்று அவர்கள் கூறினர். ஆனால் ஹசாரே அதனை ஏற்க மறுத்து வீட்டை விட்டு வெளியே வந்து உண்ணாவிரத இடத்தை நோக்கி செல்ல முயன்றார். அப்போது கைது செய்யப்பட்டார்.

ஹசாரேவோடு சமூக ஆர்வலர்கள் அரவிந்த் கேஜரிவால், கிரண்பேடி மற்றும் மனீஷ் சிசோதியா ஆகியோரும் கைது செய்யப்பட்டனர்.ஹசாரே கைது செய்யப்படும் போது நூற்றுக்கணக்கான ஆர்வலர்கள் பாரத் மாதாகி ஜே என்று கோஷங்களை எழுப்பியபடி அவர் கைது செய்யப்படுவதை தடுக்க முயன்றனர். அதனையும் மீறி பொலிசார் அவரை அழைத்துச் சென்றனர்.

பொலிசாரிடம் ஹசாரே தரப்பினர் எதற்காக கைது நடவடிக்கை என்று கேட்டனர். அதற்கு பொலிசார் அவர் கைது செய்யப்படவில்லை. முன்னெச்சரிக்கை நடவடிக்கையாக அழைத்துச் செல்லப்படுவதாக மட்டுமே தெரிவித்தனர். இந்த விளக்கத்திற்கு ஹசாரே தரப்பினர் கடும் கண்டனம் தெரிவித்தனர்.

காங்கிரசு இவரை பெரியா ஆளாய் ஆக்குதுங்கோ . :!.: