முதல் பெண் அதிபர் பிரேசிலில் பதவியேற்பு

பிரேசிலியா : தென் அமெரிக்க நாடான பிரேசிலின் முதல் பெண் அதிபராக டில்மா ரூசெப்(63) நேற்று பதவியேற்றுக் கொண்டார். விழாவில் பேசிய அவர், விளிம்பு நிலையில் உள்ள பிரேசில் குடிமக்களைப் பாதுகாப்பதாகவும், அனைவருக்குமான ஆட்சியை அளிப்பதாகவும் உறுதியளித்தார். கடந்தாண்டு அக்டோபர் மாதம் பிரேசிலில் நடந்த அதிபர் தேர்தலில், டில்மா ரூசெப் வெற்றி பெற்றார். 2011, ஜனவரி 1ம் தேதியில் அவர் பதவியேற்பார் என்று அறிவிக்கப்பட்டது.

இதையடுத்து, அந்நாட்டின் புதிய மற்றும் முதல் பெண் அதிபராக டில்மா ரூசெப் நேற்று பதவியேற்றார். இந்நிகழ்ச்சியில், முன்னாள் அதிபர் லுலா டா சில்வா, வெனிசுலா அதிபர் ஹ்யூகோ சாவேஸ், அமெரிக்க வெளியுறவு அமைச்சர் ஹிலாரி கிளிண்டன் உள்ளிட்ட தலைவர்கள் பலர் கலந்து கொண்டனர். அதிபர் மாளிகைக்கு ரூசெப், காரில் அழைத்துச் செல்லப்பட்டார். அங்கு நடந்த விழாவில், நாட்டின் அதிபருக்குரிய அடையாளமான பச்சை நிறப் பட்டிகையை, முன்னாள் அதிபர் சில்வா, ரூசெப்புக்கு அணிவித்தார்.

இதையடுத்து, விழாவில் பேசிய ரூசெப் கூறியதாவது: பிரேசிலில் ஏற்கனவே பல முன்னேற்றங்கள் நிகழ்ந்துள்ளன. எனினும் இது ஒரு புதிய சகாப்தத்தின் துவக்கம் தான். நாட்டில் உள்ள விளிம்பு நிலை மக்களை நான் பாதுகாப்பேன்; அனைவருக்குமான ஆட்சியை நான் அளிப்பேன். எனக்கு முன்னால் அதிபராக இருந்த சில்வாவின் பணிகளைத் தொடர்வேன். இந்த நாட்டை புதிய பாதைக்கு அழைத்துச் சென்ற மாமனிதர் அவர். அவரது அரசால் மேற்கொள்ளப்பட்ட முன்னேற்றப் பணிகளைத் தொடர்வது, மக்களின் வலிமையை அதிகரிப்பது இவை தான், அவருக்கு நான் செலுத்தும் நன்றிக் கடன்.

பிரேசில் குடிமக்கள் உணவின்றி, வீடின்றி தவிக்கின்றனர்; குழந்தைகள் கைவிடப்படுகின்றனர். இந்தப் பிரச்னைகளைத் தீர்க்கும் வரை நான் ஓய்வெடுக்கப் போவதில்லை.இவ்வாறு ரூசெப் தெரிவித்தார்.

ரூசெப் அமைச்சரவையில் இடம் பெற்றுள்ள 37 அமைச்சர்களில் ஒன்பது பேர் பெண்கள் என்பது குறிப்பிடத்தக்கது. அவர் தனது பேச்சில், வரி சீர்திருத்தம், சுற்றுச்சூழல் பாதுகாப்பு, மேம்பட்ட சுகாதார நடவடிக்கைகள், பிராந்திய மேம்பாடு, நாட்டின் பொருளாதாரத்தைப் பாதுகாக்கும் நடவடிக்கைகள் பற்றியும் குறிப்பிட்டார்.

சவால்கள்: லுலா டா சில்வாவின் கடந்த எட்டாண்டுக் கால ஆட்சியில் பிரேசில் குறிப்பிடத்தக்க அளவு வளர்ந்துள்ளது. எனினும், உலகில் சமூக ஏற்றத்தாழ்வு அதிகளவில் உள்ள நாடுகளில் இதுவும் ஒன்றாக இருக்கிறது. புதிய அதிபரான ரூசெப்புக்கு அந்நாட்டின் கல்வி, சுகாதாரம், உட்கட்டமைப்பு ஆகிய துறைகளில் பல்வேறு சவால்கள் காத்திருக்கின்றன. அதேபோல், அவர் மீதான எதிர்பார்ப்பும் அதிகளவில் உள்ளது.
சில்வா கண்ணீர்: பதவியேற்பு விழாவை அடுத்து, முன்னாள் அதிபர் சில்வாவை அமைச்சர்கள், உலகத் தலைவர்கள் பலர் கட்டியணைத்து பிரியா விடை கொடுத்தனர். அப்போது, சில்வா கண் கலங்கினார். ரூசெப்பின் அரசுக்கு முக்கிய ஆலோசகராக சில்வா இருப்பார் என்று தகவல்கள் தெரிவிக்கின்றன.