எலிக்காய்ச்சல் 60 பேர் உயிரிழப்பு

by **நண்பன்** Wed 17 Aug 2011 - 4:14

எலிக்காய்ச்சல் 60 பேர் உயிரிழப்பு
மர்லின் மரிக்கார்
எலிக்காய்ச்சல் (லெப்டோ பைரோஸிஸ்) காரணமாக இந்நாட்டில் கடந்த ஏழு மாதங்களில் 60 பேர் உயிரிழந்திருப்பதாக சுகாதார அமைச்சின் நோய் பரவுதல் தடுப்பு பிரிவு மருத்துவ நிபுணரொருவர் நேற்றுத் தெரிவித்தார்.

அதேநேரம் இக்காலப்பகுதியில் இக்காய்ச்சலுக்கு 4743 பேர் பாதிக்கப்பட்டுள்ளதாகவும் அவர் குறிப்பிட்டார். கம்பஹா, குருநாகல், ஹம்பாந்தோட்டை, களுத்துறை அகிய மாவட்டங்களிலேயே இந்நோய்க்கு அதிகளவிலானோர் உயிரிழந்ததாகவும் அவர் கூறினார்.

அதேநேரம் இக்காய்ச்சலுக்கு குருநாகல் மாவட்டத்தில் 1080 பேர் உள்ளாகியுள்ளனர். ஜனவரி மாதம் முதலாம் திகதி முதல் ஆகஸ்ட் மாதம் 12ம் திகதி வரையான காலப்பகுதியில் இந்நோய்க்கு குருநாகல் மாவட்டத்திலேயே அதிகளவிலானோர் உள்ளாகினர் எனவும் அவர் குறிப்பிட்டார்.

இது தொடர்பாக அவர் மேலும் கூறுகையில், எலிக்காய்ச்சலுக்குரிய நோய்க் காரணி கைவிடப்பட்ட வயல் வெளிகளிலும் சேற்று நிலங்களிலும் பெரிதும் காணப்படும். அதனால் இவ்வாறான இடங்களில் வேலைகளில் ஈடுபடும் போதும், நடமாடும் போதும் மிகுந்த முன்னெச்சரிக்கையோடு நடந்து கொள்ள வேண்டும்.

குறிப்பாக கை, கால்களில் காயங்களைக் கொண்டிரு ப்பவர்கள் மிக விழிப்பாக இருப்பது மிக அவசியம். சேற்று நிலங்களில் வெறுங்கால்களுடன் நடமாடவும் கூடாது. எலிக்காய்ச்சல் காணப்படும் பிரதேசங்களிலுள்ள மருத்துவ அலுவலக அதிகாரிகளின் அலுவலகங்களின் ஊடாக எலிக்காய்ச்சலைத் தவிர்த்துக் கொள்ளுவதற்கான மாத்திரைகள் இலவசமாக வழங்கப்படுகின்றன. அவற்றை முன் கூட்டியே பெற்று பாவிப்பது மிகவும் அவசியம் என்றார்.