இளம்பெண்ணை தாக்கி மாயமான மர்மமனிதன்! ஊரணியில் பதற்றநிலை

மட்டக்களப்பு மாவட்டத்தில் ஊரணி பிரதேசத்தில் மர்மமனிதர் ஒருவர் பெண் ஒருவரை தாக்கிய சம்பவத்திற்கு எதிர்ப்பு தெரிவித்து தற்போது அங்கு பதற்றநிலை நிலவி வருவதாக தெரிவிக்கப்படுகிறது.

25 வயதுடைய குறித்த பெண் வீட்டின் மொட்டை மாடியில் இருந்த போது மர்மமனிதர் கத்திக்குத்தினை மேற்கொண்டதோடு கையிலும் கத்தியால் வெட்டியதாக பொலிஸார் தெரிவிக்கின்றனர்.

காயமடைந்த குறித்த பெண் மட்டு.போதனா வைத்தியசாலையில் அனுமதிக்கப்பட்டுள்ளார்.

இதனையடுத்து சம்பவத்திற்கு எதிர்ப்பு தெரிவித்து அப்பிரதேச மக்கள் பொலிஸ் நிலையத்துக்கு முன்பாக உள்ள வீதியில் டயர்களை எரித்து ஆர்ப்பாட்டத்தில் ஈடுப்பட்டுள்ளனர்.

இதன்போது, ஆர்ப்பாட்டக்காரர்களை கலைப்பதற்காக பொலிஸார் கண்ணீர் புகை பிரயோகம் மேற்கொண்டதாக தெரிவிக்கப்படுகிறது.

இதேவேளை, தமிழ் தேசியக் கூட்டமைப்பின் மட்டக்களப்பு மாவட்ட பாராளுமன்ற உறுப்பினர் சீ.யோகேஸ்வரன் மட்டக்களப்பு போதனா வைத்தியசாலைக்கு விஜயம் செய்ததுடன், ஆர்ப்பாட்டத்தில் ஈடுபட்ட பொதுமக்களிடமும் கலந்துரையாடியுள்ளார்

இதேவேளை நேற்று இரவு மட்டக்களப்பு மாவட்டத்தின் பெரும்பாலான பிரதேசங்களில் கிறீஸ் பூதங்களின் நடமாட்டம் காணப்பட்டதாகவும் அதற்கு பொலிஸார் எந்தவித நடவடிக்கைகளையும் மேற்கொள்ளவில்லை எனவும் தெரிவித்து மக்கள் இந்த ஆர்ப்பாட்டத்தில் ஈடுபட்டள்ளனர்.

இதன் காரணமாக பிரதேசத்தின் போக்குவரத்து தடைப்பட்டுள்ளதாக தெரிவிக்கப்படுகிறது.