ஆங்கில வழி சமச்சீர் புத்தகம் பற்றாக்குறை தனியார் மெட்ரிக் பள்ளிகள் தவிப்பு

திருப்பூர் : சமச்சீர் கல்வி ஆங்கில வழிப்பாட புத்தகங்களில், ஒரு சில பாடப்புத்தகங்கள் பற்றாக்குறையால் மாணவ, மாணவிகளுக்கு அனைத்து புத்தகங்களும் வழங்க முடியாத நிலை ஏற்பட்டுள்ளது. கடந்த 15ம் தேதி தமிழகம் முழுவதும் அரசு பள்ளிகளில் சமச்சீர் பாடப்புத்தக வினியோகம் தொடங்கி, பெரும்பாலான மாவட்டங்களில் தமிழ்வழி புத்தகங்கள் அனைத்தும் வழங்கப்பட்டு விட்டன. திருப்பூர் மாவட்டத்தில் தமிழ்வழி பாடப்புத்தகங்கள் வழங்கப்பட்டு நேற்று முன்தினம் முதல் பாடங்கள் நடத்தப்பட்டு வருகிறது.

ஆனால், ஆங்கில வழிப்பாட புத்தகங்களில் ஒரு சில புத்தகங்கள் பற்றாக்குறை காரணமாக மாணவர்களுக்கு வகுப்புகள் எடுப்பதில் சிக்கல் ஏற்பட்டுள்ளதாக கூறப்படுகிறது. கடந்த ஆண்டில் தமிழக அரசு, தனியார் பதிப்பகங்களுக்கும் சமச்சீர் கல்வி புத்தகம் தயாரிக்க, அனுமதி வழங்கியது. பெரும்பாலான மெட்ரிக் பள்ளிகள், தமிழ்நாடு அரசு பாடநூல் கழகம் வெளியிட்ட புத்தகத்தை வாங்க விரும்பாமல், தனியார் பதிப்பகங்களிடம் புத்தகங்களை, கொள்முதல் செய்தன. இதை கணக்கில் கொண்டு, நடப்பாண்டில் ஆங்கிலவழி பாடப் புத்தகங்கள் குறைந்த அளவே அச்சிடப்பட்டுள்ளதாக தெரிகிறது.

ஆனால், சமச்சீர் கல்வி குறித்த குழப்பத்தால், தனியார் பதிப்பகங்கள் புத்தக உற்பத்தியில் இறங்கவில்லை. இதனால் மெட்ரிக் பள்ளிகளுக்கு போதிய அளவுக்கு தனியார் பதிப்பக புத்தகங்கள் கிடைக்கவில்லை. இதையடுத்து பெரும்பாலான சுயநிதி பள்ளிகள், தமிழ்நாடு அரசு பாடநூல் கழகத்தையே புத்தகங்களுக்கு அணுகியுள்ளன. இதில் அறிவியல், கணிதம், சமூக அறிவியல் ஆகிய பாட புத்தகங்கள் பற்றாக்குறை ஏற்பட்டுள்ளது. அரசு பள்ளிகளில் படிக்கும் ஆங்கில வழி மாணவ, மாணவியருக்கு கூட, முழுமையாக புத்தகங்கள் வழங்கவில்லை என கூறப்படுகிறது. இதனால் தனியார் மெட்ரிக் பள்ளிகள் பெரும்பாலானவற்றில், புத்தகம் வழங்கப்படாத நிலை தொடர்கிறது. இதனால் தனியார் பள்ளிகள் தவித்து வருகின்றன.