26 லட்சம் லாரிகள் இயங்கவில்லை : சரக்குப் போக்குவரத்து முற்றிலும் நிறுத்தம்

by **யாதுமானவள்** Fri 19 Aug 2011 - 6:18

தமிழகத்தில், 4 லட்சத்து 95 ஆயிரம் லாரிகள் இயங்கவில்லை. தென் மாநிலங்கள் அளவில், 26 லட்சம் லாரிகள் இயங்காத நிலை ஏற்படும். அரசுக்கு, நாளொன்றுக்கு, 2,500 கோடி ரூபாய் வருவாய் இழப்பு ஏற்படும்'' என, தமிழ்நாடு மாநில லாரி உரிமையாளர் சம்மேளனத் தலைவர் நல்லதம்பி கூறினார். தென் மாநிலங்களில், நேற்று நள்ளிரவு முதல், லாரி நிறுத்தப் போராட்டம் நடக்கிறது. இதனால், சரக்குப் போக்குவரத்து முற்றிலும் ஸ்தம்பித்துள்ளது. இதனால், காய்கறி, பெட்ரோலியப் பொருட்கள் முதல் அனைத்து வகையான சரக்குகளுக்கும், தட்டுப்பாடு ஏற்படும் நிலை உருவாகி உள்ளது. இதனால், பொருட்கள் விலை உயரும் அபாயமும் ஏற்பட்டுள்ளது. இது குறித்து, நல்லதம்பி கூறியதாவது:
இன்று (நேற்று) நள்ளிரவு முதல், திட்டமிட்டபடி தென்னிந்திய அளவிலான, லாரி வேலை நிறுத்தப் போராட்டம் நடக்க உள்ளது. இந்த வேலை நிறுத்தப் போராட்டத்தால், தமிழகம் முழுவதும், 4 லட்சத்து, 95 ஆயிரம் லாரிகள் இயங்காது. அதுபோல் தமிழ்நாடு, கேரளா, கர்நாடகா, ஆந்திரா, புதுச்சேரி, மகாராஷ்டிரா என, தென் மாநிலங்கள் அளவில், 26 லட்சம் லாரிகள் இயக்காது. காஸ் டேங்கர் லாரிகள், வேலை நிறுத்தப் போராட்டத்தில் பங்கேற்கின்றன. அதுபோல், பெட்ரோலியப் பொருள் எடுத்துச் செல்லும் லாரிகளும் போராட்டத்தில் பங்கேற்கின்றன. அதனால், காஸ் உள்ளிட்ட அத்தியாவசியப் பொருட்களுக்கு, தட்டுப்பாடு ஏற்படும் அபாயம் உள்ளது. வேலை நிறுத்தப் போராட்டம் மூலம், லாரித் தொழிலை நம்பியுள்ள, 1 கோடி பேர் வேலையிழப்பர். மேலும், மத்திய, மாநில அரசுக்கு நாளொன்றுக்கு, 2,500 கோடி ரூபாய் வீதம், வருவாய் இழப்பு ஏற்படும். அதுபோல், லாரி உரிமையாளர்களுக்கு, நாளொன்றுக்கு 1,000 கோடி ரூபாய் வீதம் இழப்பு ஏற்படும். வேலை நிறுத்தப் போராட்டத்தால், வட மாநிலங்களில் இருந்து தென்னிந்தியாவிற்குள் சரக்கு லாரிகள் நுழையாது. பால், தண்ணீர், ரேஷன் பொருள், நாளிதழ் எடுத்துச் செல்லும் வாகனங்களுக்கு, போராட்டத்தில் இருந்து விலக்கு அளிக்கப்படுகிறது. இவ்வாறு, நல்லதம்பி தெரிவித்தார்.

மணல் லாரிகளும் பங்கேற்பு : "பல்வேறு கோரிக்கைகளை வலியுறுத்தி நடத்தப்படும் காலவரையற்ற லாரிகள் வேலை நிறுத்தத்தில் மணல் லாரிகளும் பங்கேற்கும்' என, மெட்ராஸ் லாரி உரிமையாளர்கள் சங்கத் தலைவர் தாமோதரன் தெரிவித்துள்ளார். இதுகுறித்து அவர் வெளியிட்டுள்ள அறிக்கை: மணல் லாரிகளுக்கு சுங்க வரி கட்டணம் வசூலிப்பதில்லை என்பது தவறான கருத்து. சென்னையிலிருந்து செங்கல்பட்டிற்கு (ஆறு சக்கரம்) ஒருமுறை சென்று வர 380 ரூபாய், சென்னையிலிருந்து விழுப்புரம் சென்று வர 880 ரூபாய், சுங்க வரி வசூலிக்கப்படுகிறது. எனவே, பல்வேறு கோரிக்கைகளை நிறைவேற்ற மத்திய அரசை வலியுறுத்தி, இன்று (நேற்று) நள்ளிரவு முதல் நடத்தப்படும் காலவரையற்ற லாரிகள் வேலை நிறுத்தத்தில், மணல் லாரிகளும் பங்கேற்கும். மாநில லாரி உரிமையாளர்கள் சங்கத் தலைவர் நல்லதம்பி, வேலை நிறுத்தம் வாபஸ் என கூறினால் மட்டுமே லாரிகள் இயங்கும். இவ்வாறு தாமோதரன் தெரிவித்துள்ளார்.

தினமலர்