பட்ஜட்: இடைக்கால செலவினமாக தயாரிக்க அரசாங்கம் முடிவு

பொருளாதார வளர்ச்சியை குறைந்தபட்சம் 8 சதவீதமாக நிலைத்திருக்கச் செய்து பணவீக்கத்தை 6 முதல் 7சதவீதம் வரை கட்டுப்படுத்தக்கூடிய வகையில் 2012ம் ஆண்டு முதல் 2014ம் ஆண்டு வரையிலான வரவு செலவுத்திட்டத்தை தயாரிக்க வேண்டுமென்று அமைச்சரவை திறைசேரிக்கு பணிப்புரை விடுத்துள்ளது என அமைச்சர் கெஹலிய ரம்புக்வெல்ல தெரிவித்தார். அமைச்சரவை முடிவுகளை அறிவிக்கும் ஊடகவியலாளர் மாநாட்டில் இந்த தகவலை அவர் வெளியிட்டார். அங்கு தொடர்ந்தும் கருத்துத் தெரிவித்த அமைச்சர்;

2012ம் ஆண்டுக்கான அரசாங்கத்தின் வரவுசெலவுத் திட்டம் இடைக்கால செலவின திட்டமாக தயாரிக்கப்படவுள்ளது. 2012ம் ஆண்டு முதல் 2014ம் ஆண்டு வரையிலான வரவு செலவுத்திட்டத்தை இடைக்கால செலவினத்திட்டமாக தயாரிக்க வேண்டுமென்று நிதி திட்டமிடல் அமைச்சர் என்ற முறையில் ஜனாதிபதி அவர்களினால் சமர்ப்பிக்கப்பட்ட யோசனை அமைச்சரவையினால் அங்கீகரிக்கப்பட்டுள்ளது. இதனடிப்படையில் 2012ம் ஆண்டுக்கான வரவு செலவுத்திட்டத்தை பின்வரும் வரம்புகளுக்கு ஏற்புடைய வகையில் தயாரிப்பதற்கு திறைசேரிக்கு அமைச்சரவை அங்கீகாரத்தை வழங்கியுள்ளது;

* பொருளாதார வளர்ச்சியை குறைந்தபட்சம் 8சதவீதமாக நிலைத்திருக்கச் செய்ய வேண்டும்.

* பணவீக்கம் 6 முதல் 7சதவீதத்திற்குள் மட்டுப்படுத்தப்பட வேண்டும்.

* வரவு செலவுத்திட்டத்தின் துண்டுவிழும் தொகையை மொத்த உள்நாட்டு உற்பத்தியில் தற்போது இருக்கும் 6.8சதவீத்தில் இருந்து 6.2சதவீதமாக குறைக்க வேண்டும்.

* தற்போதைய மொத்த உள்நாட்டு உற்பத்தியில் 80சதவீதமாக இருக்கும் மொத்த கடன் இலக்கு 75சதவீதமாக குறைக்கப்பட வேண்டும்.

* அரசாங்கம் கடைப்பிடிக்கும் தற்போதைய பொருளாதார கொள்கைக்கு ஏற்புடைய வகையில் மொத்த உள்நாட்டு உற்பத்தியில் குறைந்த பட்சம் 6 சதவீதமாக பொது முதலீடுகள் நிலைத்திருக்க வேண்டும்.

இத்தகைய கொள்கை வரம்புகளுக்கு அமையவே அடுத்தடுத்த ஆண்டுகளின் வரவு செலவுத் திட்டங்கள் தாயாரிக்கப்பட வேண்டுமென்று அமைச்சரவை திறைசேரிக்கு பணிப்புரை பிறப்பித்துள்ளது.