மீண்டும் ஸ்ருதிஹாசன்

by **நேசமுடன் ஹாசிம்** Fri 19 Aug 2011 - 9:54

கால்ஷீட் பிரச்சனையால் "3" படத்திலிருந்து அமலாபால் நீக்கப்பட்டதையடுத்து,
தனுஷ்க்கு ஜோடியாக ஏற்கனவே பேசப்பட்ட கமல்ஹாசனின் மகள் ஸ்ருதிஹாசன் நடிக்க இருக்கிறார்.

டைரக்டர் கஸ்தூரி ராஜா தயாரிப்பில், ஐஸ்வர்யா தனுஷ் இயக்குநராக அவதரித்து இருக்கும் படம்"3". இப்படத்தில் ஐஸ்வர்யாவின் கணவர் தனுஷை, ஹீரோவாக நடிக்கிறார். படத்தில் தனுஷ்க்கு ஜோடியாக அமலா பால் நடிப்பதாக இருந்தது. கடந்தவாரம் கூட இப்படத்தின் பத்திரிக்கையாளர்கள் சந்திப்பில் தனுஷ், அமலாபால், ஐஸ்வர்யா தனுஷ் உள்ளிட்ட பலர் கலந்து கொண்டனர்.

இந்நிலையில் தெலுங்கு படம் சிலவற்றில் அமலாபால் கமிட் ஆகிவிட்டதால், "3" படத்திற்கான கால்ஷீட் பிரச்சனை ஏற்பட்டது. இதனால் "3" படத்திலிருந்து அமலாபால் நீக்கப்பட்டார். இதனையடுத்து வேறு ஒரு நாயகியை தேடும் பணி நடந்து வந்தது. அதில், கமலின் மூத்தமகள் ஸ்ருதிஹாசன் "3" படத்தில் நடிக்க இருப்பதாக அறிவிக்கப்பட்டுள்ளது.

இதுகுறித்து தனுஷ் கூறுகையில், அமலாபால் ஏற்கனவே ஒப்புக்கொண்டிருந்த படத்தின் படப்பிடிப்பு முடிவடையாததால், `3 படத்துக்கு அவரால் கால்ஷீட் கொடுக்க முடியவில்லை. அதனால் அமலாபால் மாற்றப்பட்டு, அவருக்கு பதில் ஸ்ருதிஹாசன் ஒப்பந்தம் செய்யப்பட்டிருக்கிறார். நானும், ஸ்ருதிஹாசனும் நடிக்கும் காட்சிகள் விரைவில் படமாக்கப்பட உள்ளன என்றார்.

ஆரம்பத்தில் இப்படத்தில் அமலாபால்க்கு முன்னதாக ஸ்ருதிஹாசன் தான் நடிப்பதாக இருந்தார். ஆனால் தெலுங்கில் சில படங்களில் பிஸியாக இருந்ததால், அவர் நடிக்க முடியாமல் போனது. இப்போது மீண்டும் அவருக்கே இந்த வாய்ப்பு கிடைத்திருக்கிறது.