சிரிய அதிபர் பதவி விலக வேண்டும்: ஒபாமா

அமெரிக்க அதிபர் ஒபாமா முதன் முறையாக அசாத் பதவி விலக வேண்டும் என பகிரங்கமாக தெரிவித்துள்ளார்.

சிரியாவில் அதிபர் அல் அசாத் ஆட்சிக்கு எதிராக மக்கள் போராடி வருகிறார்கள். அவர் பதவி விலக வேண்டும் என வலியுறுத்தி வருகின்றனர்.அதற்கு மறுத்து வரும் அவர் ராணுவத்தை ஏவி போராட்டத்தில் ஈடுபடும் மக்களை கொன்று குவித்து வருகிறார். ராணுவம் நடத்திய தாக்குதலில் இதுவரை 2 ஆயிரத்துக்கும் மேற்பட்டோர் கொல்லப்பட்டுள்ளனர். இதற்கு உலக நாடுகளும், ஐ.நா. சபையும் கடும் கண்டனம் தெரிவித்து வருகின்றன. இருந்தும் தாக்குதல் நிறுத்தப்படவில்லை.

இந்த நிலையில் அதிபர் அல் அசாத் உடனடியாக பதவி விலக வேண்டும் என்று அமெரிக்கா வலியுறுத்தியுள்ளது. இது குறித்து வெள்ளை மாளிகையில் இருந்து அதிபர் ஒபாமா ஒரு அறிக்கை வெளியிட்டுள்ளார். அதில் கூறியிருப்பதாவது:-

அரசியல் மாற்றம் செய்வதாகவும், மக்களின் போராட்டத்தை முடிவுக்கு கொண்டு வருவதாகவும் சிரியா அதிபர் அசாத் வாக்குறுதி அளித்து இருந்தார். அதை அவர் நிறைவேற்ற தவறிவிட்டார். மாறாக 2 ஆயிரத்துக்கும் மேற்பட்டோரை கொன்று குவித்துள்ளார். மேலும் தனது மக்களை சிறையில் அடைத்தும் சித்ரவதை செய்து வருகிறார். எனவே அவர் தனது ஆட்சியில் மாற்றம் செய்ய வேண்டும் அல்லது மக்களின் விருப்பப்படி அவர் பதவி விலக வேண்டும். இவ்வாறு அவர் கூறியுள்ளார்.

இவை தவிர அமெரிக்காவில் உள்ள சிரியாவின் எண்ணை நிறுவனங்களை முடக்கவும், சிரியாவில் இருந்து அமெரிக்காவுக்கான பெட்ரோலியம் மற்றும் எண்ணெய் ஏற்றுமதிக்கும் தடை விதித்து உத்தரவிட்டுள்ளார்.

தற்போது தான் அமெரிக்க அதிபர் ஒபாமா முதன் முறையாக அசாத் பதவி விலக வேண்டும் என பகிரங்கமாக தெரிவித்துள்ளார். இது அதிக முக்கியத்துவம் வாய்ந்ததாக கருதப்படுகிறது.

aahaa... nalla aarambam