திருவட்டார் அருகே 7 வயது சிறுமி பாலியல் பலாத்காரம் : போலீசார் வாலிபரிடம் விசாரணை

திருவட்டார் : திருவட்டார் அருகே 3ம் வகுப்பு மாணவியை பாலியல் பலாத்காரம் செய்த வழக்கில் வாலிபரை போலீசார் பிடித்து விசாரித்து வருகின்றனர். திருவட்டார் போலீஸ் சரகத்திற்கு உட்பட்ட காட்டாத்துறை, பொன்விளையை சேர்ந்த ஜெயராஜ் ஞானதுரை, சுதா தம்பதியருக்கு ஏழரை மற்றும் ஆறு வயதில் இரண்டு பெண் குழந்தைகள் உள்ளனர்.

கடந்த மூன்று வருடங்களுக்கு முன் ஏற்பட்ட கருத்து வேறுபாடு காரணமாக கணவன், மனைவி இருவரும் பிரிந்து வாழ்ந்து வருகின்றனர். ஜெயராஜ் ஞானதுரை சொந்த ஊரான வள்ளியூரிலும், சுதா சென்னையில் வேலைக்கும் சென்றுள்ளதாக உறவினர் தரப்பில் தெரிவிக்கப்பட்டது. இதனால் குழந்தைகள் இருவரும் பொன்விளையில் சுதாவின் தாயார் கனகம் அரவணைப்பில் வாழ்ந்து வருகின்றனர். இருவரும் காட்டாத்துறையில் உள்ள அரசு பள்ளியில் படித்து வருகின்றனர்.

ஏழ்மை நிலையில் உள்ள கனகம் தினமும் கூலி வேலைக்கு சென்று குழந்தைகளை காப்பாற்றி வருகிறார். இதனால் பள்ளிக்கு செல்லும் குழந்தைகள் மாலை வீடு திரும்பியதும் கண்ணனூர், பெருங்குளத்தில் வசிக்கும் சுதாவின் சகோதரி எஸ்தர் வீட்டில் சென்று சாப்பிட்டு விட்டு, தங்கள் பாட்டி வேலைக்கு சென்று திரும்பியதும் வீடு திரும்புவது வழக்கம். இந்நிலையில் கடந்த 29ம் தேதி மாலை 6 மணியளவில் குழந்தைகள் இருவரும் சித்தி வீட்டில் இருந்து பாட்டி வீட்டிற்கு திரும்பி கொண்டிருந்தனர். அப்போது அப்பகுதியை சேர்ந்த வாலிபர் ஒருவர் குழந்தைகளிடம், "உங்கள் அப்பா, அம்மா வந்திருக்கிறார்கள், அவர்களை காட்டித் தருகிறேன்' என கூறியுள்ளார். இதைக்கேட்டதும் நீண்ட காலத்திற்கு பிறகு அப்பா, அம்மாவை பார்க்க போகிறோம் என்ற சந்தோஷத்தில் குழந்தைகள் இருவரும் அவருடன் சென்றனர்.

ஆனால் அந்த வாலிபர் இருவரையும் அருகில் உள்ள வாழைத்தோப்பிற்கு அழைத்து சென்று தங்கையை ஒரு இடத்தில் அமர வைத்துவிட்டு, மூத்தவளை தனியாக அழைத்து சென்று பாலியல் பலாத்காரம் செய்துள்ளார். இவரது அலறல் சப்தம் கேட்டு எதோ விபரீதம் நடப்பதை உணர்ந்த இளையவள் ஓடிச்சென்று பாட்டியிடம் நடந்த சம்பவம் குறித்து கூறியுள்ளார். பதறியடித்து கொண்டு ஓடி வந்த கனகம், சப்தம் போட்டவாறு வாழைத்தோப்பில் கற்களை தூக்கி வீசியுள்ளார். உடனடியாக அந்த வாலிபர் அங்கிருந்து தப்பியோடியுள்ளார்.

நடந்த சம்பவம் குறித்து குழந்தைகள் தரப்பில் போலீசிலும் புகார் கொடுக்கப்படவில்லை. இந்நிலையில் குழந்தையின் பிறப்புறுப்பில் காணப்பட்ட காயத்திற்கு சிகிச்சை பெற கனகம் நேற்று ஆசாரிப்பள்ளம் அரசு ஆஸ்பத்திரிக்கு குழந்தையை அழைத்து சென்றுள்ளார். அங்கு குழந்தையை பரிசோதித்த டாக்டர்கள் அதிர்ச்சியடைந்தனர். காயம் குறித்து டாக்டர்கள் குழந்தையிடம் கேட்ட போது நடந்த சம்பவங்களை கூறியுள்ளது. டாக்டர்கள் உடனடியாக போலீசாருக்கு தகவல் கொடுத்தனர்.
தகவலின் பேரில் திருவட்டார் இன்ஸ்பெக்டர் வெங்கடேஷ் தலைமையில் போலீசார் விசாரணை மேற்கொண்டு காட்டாத்துறை, பொன்விளையை சேர்ந்த மணி மகன் மணிகண்டனை(20) பிடித்து விசாரித்து வருகின்றனர். பாதிக்கப்பட்ட குழந்தை ஆசாரிப்பள்ளம் அரசு ஆஸ்பத்திரியில் சிகிச்சை பெற்று வருகிறது. இச்சம்பவம் மாவட்ட அளவில் பெரும் பரபரப்பை ஏற்படுத்தியுள்ளது.

தினமலர்

கடன்காறா உனக்கு ஏன் இந்த வெறி வீவேக்கின் தீர்ப்பு வெட்டிடுங்கள்

இம்மாதிரி சம்பவங்கள் நடைபெற காரணம் சட்டங்கள் கடுமையாக இல்லாததே