விடுதலைப்புலி சந்தேகநபர் “உகண்டா பாலா” கட்டுநாயக்கவில் கைது!

விடுதலைப்புலிகளின் முக்கிய உறுப்பினரும் மற்றும் ஆட்கடத்தலில் ஈடுபடுபவர் எனச் சந்தேகிக்கப்படும் “உகண்டா பாலா” என்பவர் கட்டுநாயக்க விமானநிலையத்தில் கைது செய்யப்பட்டுள்ளார் எனத் தெரிவிக்கப்படுகிறது.

குறித்த சந்தேகநபர் ஆட்கடத்தல் மற்றும் பயங்கரவாத நடவடிக்கைகளுடன் தொடர்புடையவர் என மலேசிய பொலிஸாரால் கைது செய்யப்பட்டு நாடு கடத்தப்பட்டுள்ளார்.

நாடு திரும்பும் போது கட்டுநாயக்க விமானநிலையத்தில் கைது செய்யப்பட்ட குறித்த சந்தேகநபர், மேலதிக விசாரணைகளுக்காக குற்றப்புலனாய்வுத் தடுப்புப்பிரிவில் தடுத்து வைக்கப்பட்டுள்ளார்.

இவர் 1990 ஆண்டு தொடக்கம் சிங்கப்பூர், மலேசியா, இந்தியா, தாய்லாந்து ஆகிய நாடுகளில் தலைமறைவாகியிருந்து விடுதலைப்புலிகளுக்கு உதவிகளை செய்து கொண்டு வேறுசில வியாபார நடவடிக்கைகளில் ஈடுபட்டுள்ளதாக தெரிவிக்கப்படுகிறது.

அத்துடன் சட்டவிரோதமான முறையில் தமிழர்களை ஐரோப்பிய நாடுகளுக்கு அனுப்பி வைத்தமை மற்றும் பல மில்லியன் பணத்தைப் பெற்றுக் கொண்டு ஆட்கடத்தலில் ஈடுபட்டமை ஆகிய குற்றச்சாட்டுக்களும் இவர் மீது சுமத்தப்பட்டுள்ளது.

குறித்த சந்தேகநபருக்கு உகண்டாவில் அரண்மனை போன்ற வீடு காணப்படுவதாகவும், இதனாலேயே அவரை உகண்டா பாலா என அழைப்பதாகவும் குற்றப்புலனாய்வுப் பொலிஸார் தெரிவித்தனர்.