ஊழலுக்கு எதிராக கோஷம்: அன்னா ஹசாரே போராட்டத்தில் 10 ஆயிரம் இளைஞர்கள்

by **நண்பன்** Sun 21 Aug 2011 - 11:30

ஊழலுக்கு எதிராக கோஷம்: அன்னா ஹசாரே போராட்டத்தில் 10 ஆயிரம் இளைஞர்கள்; அணி அணியாக திரள்கிறார்கள்

புதுடெல்லி, ஆக. 21-

ஊழலுக்கு எதிராக வலிமையான லோக்பால் மசோதா கொண்டு வரக் கோரி காந்தியவாதி அன்னா ஹசாரே டெல்லி ராம் லீலா மைதானத்தில் உண்ணா விரதம் இருந்து வருகிறார். கடந்த 16-ந் தேதி காலை அவரை போலீசார் கைது செய்த போதே அவர் உண்ணாவிரதத்தை தொடங்கி விட்டார். தொடர்ந்து திகார் ஜெயிலில் 2 நாட்களாக உண்ணாவிரதம் இருந்தார். அவருக்கு ராம்லீலா மைதானத்தில் உண்ணாவிரதம் இருக்க அனுமதி வழங்கப்பட்டது.

இதையடுத்து அங்கு உண்ணா விரதம் இருந்து வருகிறார். இன்று 6-வது நாளாக உண்ணாவிரதம் நீடித்தது.தனது கோரிக்கை நிறைவேறும் வரை உண்ணா விரதத்தை தொடர்வது என்பதில் அன்னா ஹசாரே உறுதியாக இருக்கிறார். அவர் வலிமையான லோக்பால் மசோதாவை நிறைவேற்ற மத்திய அரசுக்கு 15 நாள் “கெடு” விதித்துள்ளார். அதற்குள் பிரச்சினையை தீர்க்க மத்திய அரசு பல்வேறு வழியை கையாண்டு வருகிறது.

லோக்பால் மசோதா குறித்து பொதுமக்களிடம் கருத்து கேட்க முடிவு செய்துள்ளது. 15 நாட்களுக்குள் பொதுமக்கள் தங்கள் கருத்தை தெரிவிக்குமாறு காங்கிரசை சேர்ந்த அபிஷேக் சிங்வி தலைமையிலான பாராளுமன்ற நிலைக்குழு அறிவித்துள்ளது.

லோக்பால் மசோதா குறித்து தனிநபர், அமைப்புகள் கருத்துக்களை கூறலாம் அவற்றை பரிசீலனை செய்வோம். லோக்பால் மசோதா தற்போது பாராளுமன்ற நிலைக்குழு வசம் உள்ளது. பொதுமக்களிடம் கருத்துக்கள் பெறப்பட்ட பின்னரே, அது பாராளுமன்றத்துக்கு அனுப்பப்படும். இதற்கு காலதாமதம் ஆகும். எனவே அன்னா ஹசாரே அறிவித்த கெடுவுக்குள் சட்டம் நிறைவேறும் வாய்ப்பு இல்லை என்று அபிஷேக் சிங்வி தெரிவித்தார்.

அன்னா ஹசாரேவுக்கு இளைஞர்கள், படித்தவர்கள், மாணவ-மாணவிகள், அலுவலகங்களில் பணிபுரிவோர் பெருமளவில் ஆதரவு தெரிவித்துள்ளனர். ராம் லீலா மைதானத்தில் மட்டும் 10 ஆயிரம் பேர் திரண்டு இருக்கிறார்கள். அவர்கள் இரவு-பகலாக அங்கேயே உள்ளனர். கையில் தேசியகொடி பிடித்த வாறும், தேச பக்தி பாடல்கள் பாடியவாறும் இருக்கிறார்கள்.

அன்னா ஹசாரே உடலால் சோர்வடைந்தாலும் இளைஞர் தரும் ஆதரவால் உள்ளத்தால் உறுதியாக இருக்கிறார் என்று சமூக ஆர்வலர் ஒருவர் கூறினார். கிரிக்கெட்டில் மூழ்கிப் போய் இருந்த இளைஞர்கள் அதை ஒத்தி வைத்து விட்டு இப்போது நாடு முழுவதும் அன்னாஹசாரேக்கு ஆதரவாக களத்தில் இறங்கி உள்ளனர்

நகரங்களில் ஆங்காங்கே சாலைகளில் அணி அணியாக திரண்டு ஊர்வலம், பேரணி நடத்துகிறார்கள். இதில் கல்லூரி மாணவ-மாணவிகள் பெரும் திரளாக கலந்து கொண்டுள்ளனர். சென்னை, பெங்களூர் உள்பட முக்கிய நகரங்களில் அவரது ஆதரவாளர்கள் 6-வது நாளாக உண்ணாவிரதம் இருந்து வருகிறார்கள். இளைஞர்கள் படித்தவர்கள் மத்தியிலும், நகர்ப் புறங்களிலும் ஊழலுக்கு எதிராக பெரும் எழுச்சி ஏற்பட்டுள்ளது.

இது மத்திய அரசுக்கு பெரும் தலை வலியை ஏற்படுத்தி உள்ளது.லோக்பால் மசோதா தொடர்பாக மத்திய அரசு பேச்சு நடத்தவும், அன்னா ஹசாரே குழுவினருடன் ஆலோசனை நடத்தவும் தயாராக இருப்பதாக பிரதமர் மன்மோகன்சிங் அறிவித்தார். பாராளுமன்ற நடப்பு கூட்டத் தொடரிலேயே வலிமையான லோக்பால் மசோதா நிறைவேற்றப்பட வேண்டும், இது குறித்து அரசிடம் பேச தயாராக இருக்கிறோம். ஆனால் அரசிடம் இருந்து முறைப்படி எந்த அழைப்பும் வரவில்லை என்று அன்னா ஹசாரே குழுவைச் சேர்ந்த அரவிந்த் கெஜ்ரிவால் தெரிவித்தார்.

இதற்கிடையே அன்னா ஹசாரே உடல்நிலையை நேற்று மருத்துவ குழுவினர் பரிசோதித்தனர். அன்னா ஹசாரேயுடன் ஆயிரக்கணக்கான ஆதரவாளர்களும் ராம்லீலா மைதானத்தில் உண்ணாவிரதம் இருக்கி றார்கள். அவர்களில் பலர் சோர்வடைந்து விட்டனர். இதனால் ராம்லீலா மைதானத்தில் ஆம்புலன்ஸ்களும், மருத்துவ குழு வாகனங்களும் தயார் நிலையில் வைக்கப்பட்டுள்ளன.